ဩဂုတ် ၆-၂၀၂၂
GG(VOM)
ပို့ကုန်ရငွေ ဒေါ်လာကို ရာနူန်းပြည့် မြန်မာကျပ်ငွေလဲလှယ်စရာမလိုတော့ဘဲ ၆၅ ရာခိုင်နူန်းသာ လဲလှယ်ဖို့ ဗဟိုဘဏ်က မနေ့က ဩဂုတ် ၅ ရက်နေ့မှာ တရားဝင် ပြောင်းလဲသတ်မှတ်ပေးလိုက်ပါတယ်။
ကျန်တဲ့ နိုင်ငံခြားသုံးငွေ ၃၅ ရာခိုင်နူန်းကို ပိုကုန်လုပ်ငန်းရှင်တွေအနေနဲ့ လိုအပ်တဲ့နေရာတွေအတွက် သုံးစွဲခွင့် ရှိကြောင်း ၊ ပို့ကုန်လုပ်ငန်းရှင်တွေအတွက် ဖြေလျှော့မှု လုပ်ပေးလိုက်တာဖြစ်တယ်လို့ ဗဟိုဘဏ်ဒုတိယဥက္ကဋ္ဌ ဦးဝင်းသော်ကပြောပါတယ်။
“ဖြေလျှော့လိုက်တာပေါ့၊အရင်ကမူဝါဒတခုအရ လိုအပ်ချက်အရ၁၀၀ ရာခိုင်နူန်းကို ဘဏ်ကိုရောင်း ခိုင်းတာ။အခုကတော့ ၃၅ ရာခိုင်နူန်းကို သုံးစွဲခွင့်ပေးလိုက်တာပေါ့။ တခြားသော sector တွေမှာလိုအပ်တာတွေသုံးခွင့်ရဖို့အတွက် ပေးလိုက်တာပေါ့ဆိုလိုတာကတော့ ဖြေလျှော့မှုပေးလိုက်တာပေါ့။ ” လို့ ဗဟိုဘဏ်ဒုတိယဥက္ကဋ္ဌ ဦးဝင်းသော်ကပြောပါတယ်။
အခုလို ဗဟိုဘဏ်က ပို့ကုန်ရငွေတွေကို ၆၅ ရာခိုင်နူန်းသာ လဲလှယ်ခိုင်းပြီး ၃၅ ရာခိုင်နူန်းကို ပို့ကုန်လုငန်းရှင်ရဲ့နိုင်ငံခြားငွေစာရင်းထဲကိုင်ခွင့်ပြုပြီး သုံးခွင့်ပေးလိုက်တာဟာ ပို့ကုန်သမားတွေအတွက် အရင်ကထက်ပိုအဆင်ပြေကြောင်း ၊ အရင်ကထက် လုပ်ရကိုင်ရ ပိုကောင်းလာနိုင်ဖွယ်ရှိတယ်လို့ ပို့ကုန်လုပ်ငန်းရှင်တဦးကပြောပါတယ်။
“အခုလို ၆၅ ရာခိုင်နူန်းကို ဗမာငွေ ၂၁၀၀ နဲ့ရှင်းပေးမယ် ၊ ကျန်တဲ့ ၃၅ ရာခိုင်နူန်းကို မိမိနိုင်ငံခြားငွေစာရင်းထဲမှာပဲ လွတ်လပ်စွာသုံးစွဲခွင့်ပြုတယ်ဆိုတဲ့ပုံစံနဲ့ထုတ်ပြန်လိုက်တော့ သွင်းကုန် ပို့ကုန်လုပ်သူတွေအတွက် အရင် ၁၈၅၀ ထက်တော့ ပိုတိုးတက်ကောင်းမွန်လာတယ်လို့ပြောချင်တယ် “လို့ မူဆယ်ဆန်ကုန်စည်ဒိုင် ဒုတိယဥက္ကဋ္ဌဦးမင်းသိန်းက ပြောပါတယ်။
အရင်က ၁ဒေါ်လာကို ၁၈၅၀ နူန်း သတ်မှတ်ပြီး ပြည်ပပို့ကုန်သမားတွေရဲ့ပို့ကုန်ငွေ အားလုံးကို ဗဟိုဘဏ်က မြန်မာငွေလဲလှယ်ဖို့ သတ်မှတ်ခဲ့တာကြောင့် ပြည်ပပို့ကုန်လုပ်ငန်းတွေ ရပ်တန့်လုနီးပါးဖြစ်သွားခဲ့ရတယ်လို့ သိရပါတယ်။
ပဲ၊ပြောင်း၊ နှမ်း ၊ မြေပဲကို နယ်စပ်ကနေတင်ပို့မှုကို ဒေါ်လာနဲ့သာဆောင်ရွက်ဖို့ သတ်မှတ်ထားသလို ကုန်ဖိုးကြိုငွေပေးသွင်းပြီး Advanced TT စနစ်နဲ့သာခွင့်ပြုဖို့ နဲ့ ငွေဝင်လာကြောင်းအထောက်အထားတင်ပြနိုင်မှသာ ပို့ကုန်ကြော်ငြာလွှာ ထုတ်ပေးဖို့ ဗဟိုဘဏ်က ဇူလိူင်လ ၂၈ ရက်နေ့ရက်စွဲနဲ့ အသိပေးထားတာလည်း ရှိပါတယ်။
အရင်ကတော့ ပို့ကုန်ရငွေဟာ နယ်စပ်ဂိတ်ကနေ ပို့ကုန်ပစ္စည်းတွေတင်ပို့ပြီးနောက် ၄၅ ရက်အတွင်း ပြည်တွင်းဘဏ်ဆီကို မဖြစ်မနေ ဝင်ရောက်ရမှာဖြစ်ပြီး နယ်စပ်ကုန်သွယ်မှုကနေရတဲ့ ပို့ကုန်ရငွေကို ဗဟိုဘဏ် သတ်မှတ်စျေးနဲ့ ဘဏ်ကိုရောင်းချရတာဖြစ်ပါတယ်။
#voiceofmyanmar #VOM #ပို့ကုန်ရငွေ #ဗဟိုဘဏ်
