Day: November 10, 2023

    မက္ကဆီကိုစီးတီး၊ နိုဝင်ဘာ-၁၀-၂၀၂၃ မျိုးဆက်(VOM) မက္ကဆီကိုနိုင်ငံအလယ်ပိုင်း ဆန်လူးဝစ်ပိုတိုဆီပြည်နယ်တွင် ကွန်တိန်နာကားအတွင်း ပိတ်မိနေတဲ့ အိမ်နီးချင်နိုင်ငံတွေက ရွှေ့ပြောင်းဒုက္ခသည် ၁၂၃ ဦးကို ကယ်တင်ခဲ့ကြောင်း အာဏာပိုင်တွေက ပြောပါတယ်။ သူတို့ကို မက္ကဆီကိုစီးတီးမြောက်ဘက် ၃၇၂ မိုင်အကွာမှာ တွေ့ရှိခဲ့တာဖြစ်ပြီး အများစုကတော့ ဂွါတီမာလာ၊ နီကာရာဂွါနှင့် ဟွန်ဒူးရပ်စ်တို့မှဖြစ်ပြီး အချို့ကတော့ အယ်လ်ဆာဗေဒို၊ အီကွေဒေါနဲ့ ကျူးဘားတို့မှဖြစ်ပါတယ်။ သော့ခတ်ထားသော နောက်တွဲယာဉ်ထဲကနေ အော်ဟစ်သံတွေကို ဒေသခံတယောက်က ကြားခဲ့ပြီးနောက် အာဏာပိုင်တွေက ရှာဖွေတွေ့ရှိခဲ့ခြင်းဖြစ်ပြီး ဒုက္ခသည်တွေထဲမှာ ကလေးငယ် ၃၄ ဦးပါဝင်ပါတယ်။ ရွှေ့ပြောင်းဒုက္ခသည်တွေ ဘယ်ကို ဦးတည်သွားရောက်မယ်ဆိုတာနဲ့ပတ်သက်ပြီး အသေးစိတ်အချက်အလက်တွေကို တာဝန်ရှိသူတွေက ထုတ်ဖော်ပြောဆိုခြင်းမရှိပေမယ့် ဒုက္ခသညတွေဟာ အမေရိကန်ကို သွားရောက်ဖို့ ကြိုးပမ်းနေကြဖွယ်ရှိပါတယ်။ နောက်တွဲယာဉ်အတွင်းတွေ့ရှိရသူတွေဟာ လက်ရှိမှာ မက္ကဆီကိုတောင်ပိုင်းကနေ အမေရိကန်ကို သွားရောက်နေကြတဲ့ လူခုနှစ်ထောင်ကျော်ပါဝင်တဲ့ ယာဉ်တန်းကဟုတ်မဟုတ် ရှင်းလင်းစွာ မသိရသေးပါဘူး။ Ref:BBC

  တဲလ်အဗစ်၊ နိုဝင်ဘာ-၁၀-၂၀၂၃ မျိုးဆက်(VOM) ဂါဇာကမ်းမြှောင်ဒေသမှာ အရပ်သားတွေကို ဘေးလွတ်ရာရှောင်တိမ်းနိုင်ရေးအတွက် နေ့စဉ် လေးနာရီကြာ အပစ်ရပ်ပေးဖို့ကို အစ္စရေးက စတင်အကောင်အထည်ဖော်နေပြီလို့ အမေရိကန်က ပြောပါတယ်။ ဒါဟာမှန်ကန်တဲ့ ဆုံးဖြတ်ချက်ဖြစ်ပြီး ဂါဇာဒေသကို အကူအညီအထောက်အပံ့တွေရရှိနိုင်ရေးအတွက် ဆက်လက်ထောက်ခံသွားမယ်လို့ အမေရိကန်သမ္မတ ဂျိုးဘိုင်ဒင်က ပြောပါတယ်။ အစ္စရေးစစ်တပ်ဟာ ဟာမတ်စ်တို့ဖမ်းဆီးထားတဲ့ ဓါးစာခံတွေ ပြန်မလွတ်မချင်း တိုက်ခိုက်မှုတွေကို ရပ်မှာမဟုတ်ဘူးလို့ အခိုင်အမာပြောဆိုထားပါတယ်။ ဓါးစာခံတွေလွတ်မြောက်ရေးအတွက် အမေရိကန်နဲ့အစ္စရေး ထောက်လှမ်းရေးခေါင်းဆောင်တွေဟာ ကာတာမှာ တွေ့ဆုံဆွေးနွေးခဲ့ကြောင်း ရိုက်တာသတင်းဌာနက ဖော်ပြထားပါတယ်။ ဟားမတ်စ်တို့ရဲ့ နိုင်ငံရေးရုံးဟာ ဒိုဟာမှာရှိနေပါတယ်။ ဟားမတ်စ်အဖွဲ့ထိပ်တန်းတာဝန်ရှိသူတွေဟာ လက်ရှိဂါဇာအခြေအနေတွေနဲ့ပတ်သက်ပြီး ကိုင်ရိုမှာ အီဂျစ်တာဝန်ရှိသူတွေနဲ့ တွေ့ဆုံဆွေးနွေးခဲ့ကြပါတယ်။ အစ္စရေးစစ်တပ်ဟာ မကြာသေးမီက ဂါဇာမြောက်ပိုင်းရှိ ဟားမတ်စ်တို့ရဲ့ ပစ်မှတ်တွေကို အပြင်းအထန်တိုက်ခိုက်ခဲ့ပြီး ဂါဇာမြောက်ပိုင်းဟာ ဟားမတ်စ်တွေရဲ့ ထိန်းချုပ်မှုမရှိတော့ဘူးလို့ အခိုင်အမာပြောဆိုထားပါတယ်။ Ref:NHK Photo:Getty Images

  Voice of Myanamar လူသိများသော ကမ္ဘာကျော် အကြီးဆုံး အပြာရောင်စိန်များထဲမှတခုဖြစ်သည့် ဟုပ်စိန်ကို ပိုင်ရှင်ဖြစ်သူ နယူးယောက်ကုန်သည်တယောက်က ဝါရှင်တန်ဒီစီရှိ စမစ်ဆိုနီယံအင်စတီကျုသို့ ၁၉၅၈ ခုနှစ် နိုဝင်ဘာ ၁၀ ရက်တွင် လှူဒါန်းခဲ့သည်။