ဘရပ်ဆဲလ်၊ ဒီဇင်ဘာ-၁၂-၂၀၂၃
မျိုးဆက်(VOM)
ဥရောပသမဂ္ဂ (အီးယူ) ဟာ မြန်မာစစ်တပ်နဲ့ ဆက်နွယ်နေတဲ့ လူပုဂ္ဂိုလ် လေးယောက်နဲ့ ကုမ္ပဏီနှစ်ခုကို အရေးယူပိတ်ဆို့မှုတွေ ထပ်မံချမှတ်လိုက်ပါတယ်။
အရေးယူပိတ်ဆို့မှု ချမှတ်ခံရတဲ့ လူပုဂ္ဂိုလ်လေးဦးကတော့ နစကအဖွဲ့ဝင် ဒုတိယဗိုလ်ချုပ်ကြီး ညိုစောနဲ့ နိုင်ငံခြားရေးဝန်ကြီး ဦးဝဏ္ဏမောင်လွင်အပါအဝင် လေးဦးဖြစ်ပြီး ကုမ္ပဏီတွေကတော့ မြန်မာစစ်တပ်အတွက် လက်နက်တွေ ထောက်ပံ့ပေးနေတယ်ဆိုတဲ့ Star Sapphire Group of Companies နဲ့ Royal Shune Lei Company Limited တို့ဖြစ်ပါတယ်။
အရေးယူပိတ်ဆို့ခံရတဲ့ စာရင်းမှာပါဝင်သူတွေနဲ့ ကုမ္ပဏီတွေရဲ့ ပိုင်ဆိုင်မှုတွေကို ထိန်းချုပ်ထားမှာဖြစ်ပြီး သူတို့နဲ့ တိုက်ရိုက်ဖြစ်စေ သွယ်ဝိုက်လို့ဖြစ်စေ အကျိုးအမြတ်ရရှိစေမယ့် လုပ်ငန်းအရင်းအမြစ်တွေကို ပိတ်ပင်သွားမှာဖြစ်တယ်လို့ သိရပါတယ်။
ဥရောပသမဂ္ဂဟာ မြန်မာနိုင်ငံကို လက်နက်တင်ပို့မှု၊ အတိုက်အခံတွေကို ဖိနှိပ်ဖို့အတွက် အသုံးပြုတဲ့ ဆက်သွယ်ရေးဆိုင်ရာ ကိရိယာတွေ တင်သွင်းမှု၊ စစ်တပ်နဲ့ နယ်ခြားစောင့်တပ်အသုံးပြုနိုင်မယ့် ထုတ်ကုန်တွေ တင်ပို့မှုနဲ့ ပူးပေါင်းစစ်ရေးလေ့ကျင့်တာတွေကို တားမြစ်တဲ့ အရေးယူပိတ်ဆို့မှုတွေကို ယခင်ကတည်းက ချမှတ်ထားပါတယ်။
မြန်မာနိုင်ငံမှာ အကြမ်းဖက်မှုတွေ ဆက်လက်တိုးပွားလာနေပြီး ကာလရှည်ကြာ ပဋိပက္ခဆီကို ဦးတည်နေတဲ့ အပေါ် ဥရောပသမဂ္ဂက အလေးအနက်စိုးရိမ်ပူပန်ကြောင်းနဲ့ လူ့အခွင့်အရေးချိုးဖောက်မှုဖြစ်စဉ်တွေအပေါ် ပြစ်တင် ရှုတ်ချထားပါတယ်။
Ref: European Council
Photo: Reuters
