ဝါရှင်တန်၊ ဒီဇင်ဘာ-၁၂-၂၀၂၃
မျိုးဆက်(VOM)
လက်နက်ကိုင် ပဋိပက္ခတွေဖြစ်ပွားနေတဲ့ မြန်မာနိုင်ငံရဲ့ စီးပွားရေးတိုးတက်မှုနှုန်းဟာ ၂၀၂၄ ခုနှစ် မတ်လထိ ၁ ရာခိုင်နှုန်းသာရှိလိမ့်မယ်လို့ ကမ္ဘာ့ဘဏ်ရဲ့ ဒီဇင်ဘာ ၁၂ ရက် ထုတ်ပြန်ချက်မှာ ဖော်ပြထားပါတယ်။
ကမ္ဘာ့ဘဏ်ရဲ့ နှစ်စဉ် မြန်မာ့စီးပွားရေး စောင့်ကြည့်မှု လေ့လာချက်အစီရင်ခံစာမှာတော့ မြန်မာနိုင်ငံရဲ့ လာမယ့်ဘဏ္ဍာရေးနှစ်အတွက် ပြည်တွင်း အသားတင်ထုတ်လုပ်မှု(ဂျီဒီပီ) ဟာ ၂ ရာခိုင်နှုန်းမှာ ရပ်တန့်နေမယ်လို့ ခန့်မှန်းထားပါတယ်။
အောက်တိုဘာနှောင်းပိုင်းမှစပြီး မြန်မာနိုင်ငံအနှံ့အပြားမှာဖြစ်ပွားနေတဲ့ ပဋိပက္ခတွေကြောင့် အိုးအိမ်စွန့်ခွာ ထွက်ပြေးမှု၊ လုပ်သားရှားပါးမှု၊ ထောက်ပံ့ရေးစရိတ်တွေ မြင့်တက်လာတယ်လို့ ကမ္ဘာ့ဘဏ်ရဲ့ အစီရင်ခံစာမှာ ဆိုပါတယ်။
လက်နက်ကိုင်တိုက်ပွဲတွေကြောင့် အဓိကကျတဲ့ ကုန်သွယ်ရေးလမ်းကြောင်းတွေ အထူးသဖြင့် တရုတ်နဲ့နယ်စပ်ကုန်သွယ်ရေး အရေးပါတဲ့ ရှမ်းပြည်မြောက်ပိုင်းက နယ်စပ်ဂိတ်တွေရပ်တန့်ခဲ့သလို ထိုင်း၊ အိန္ဒိယတို့နဲ့ ကုန်သွယ်ရေးလမ်းကြောင်းတွေလည်း ပြတ်တောက်ခဲ့ရပါတယ်။
စီးပွားရေးလုပ်ငန်းညွှန်းကိန်းတွေဟာလည်း ၂၀၂၃ ခုနှစ် နှစ်လယ်ကတည်းက ဆိုးရွားလာနေခဲ့ပြီး မတ်လကတည်းက ၁၆ ရာခိုင်နှုန်း ပိုမိုကျဆင်းခဲ့ကာ စက်တင်ဘာလမှာ ၅၆ ရာခိုင်နှုန်းသာ လည်ပတ်နိုင်ခဲ့တယ်လို့ ကမ္ဘာ့ဘဏ်ရဲ့ အစီရင်ခံစာမှာ ဖော်ပြထားပါတယ်။
Ref: Nikkei Asia
Photo: Ken Kobayashi
