ဝါရှင်တန်၊ မေ-၅-၂၀၂၅
ရတီ(VOM)
အမေရိကန်နဲ့ ကမ္ဘာ့နိုင်ငံတွေအကြား ကုန်သွယ်ရေးစစ်ပွဲ အရှိန်မြင့်နေချိန်မှာ ပြည်ပနိုင်ငံတွေက ထုတ်လုပ်တဲ့ ရုပ်ရှင်တွေကို အခွန် ၁၀၀ ရာခိုင်နှုန်း ကောက်ခံမယ်လို့ ဒေါ်နယ်ထရန့်က ပြောပါတယ်။
အမေရိကန်ရုပ်ရှင် ထုတ်လုပ်ရေးလုပ်ငန်းတွေ ကျဆင်းနေတာကြောင့် ဒီလိုအခွန်ကောက်ခံမယ့် အစီအစဉ်ကို စတင်ဖို့ အမေရိကန်ကုန်သွယ်ရေး ကိုယ်စားလှယ်ကို ညွှန်ကြားထားတယ်လို့ သူက ဆိုပါတယ်။
အခြားနိုင်ငံတွေဟာ ရုပ်ရှင်ရိုက်ကူးသူတွေနဲ့ စတူဒီယိုတွေကို ဆွဲဆောင်ဖို့ မက်လုံးပေးကမ်းလှမ်းနေကြတာဟာ အမျိုးသားလုံခြုံရေး ခြိမ်းခြောက်မှုလို့ ထရန့်က ပြောပါတယ်။ အမေရိကန်ထုတ် ရုပ်ရှင်ကားတွေ ပိုမိုမြင်တွေ့လို့တယ်လို့ သူက ပြောပါတယ်။
သူ ကျမ်းသစ္စာမကျိန်ဆိုခင်မှာ နာမည်ကျော် သရုပ်ဆောင်သုံးယောက်ဖြစ်တဲ့ Jon Voight ၊ Mel Gibsonနဲ့ Sylvester Stallone တို့ကို ဟောလိ၀ုဒ်မှာ စီးပွားရေးအခွင့်အလမ်းတွေ မြှင့်တင်ပေးနိုင်ရေးအတွက် အထူးသံတမန်တွေအဖြစ် ခန့်အပ်ခဲ့ပါတယ်။
လက်ရှိမှာတော့ အမေရိကန်ရုပ်ရှင်လုပ်ငန်းဟာ စိန်ခေါ်မှုတွေရှိပေမယ့် ကမ္ဘာတဝန်းမှာ ရုပ်ရှင်ထုတ်လုပ်ရေး အဓိကဗဟိုချက်အဖြစ် ဆက်လက်ရှိနေတယ်လို့ ProdPro သုသေသနအဖွဲ့က ပြောပါတယ်။ ပြီးခဲ့တဲ့နှစ်အတွင်း ရုပ်ရှင်ထုတ်လုပ်ရေးအတွက် ဒေါ်လာ ၁၄ ဒဿမ ၅၄ ဘီလီယံ အသုံးပြုခဲ့တယ်လို့ ဆိုပါတယ်။ ဒါပေမယ့် ၂၀၂၂ ခုနှစ်ထက် ၂၆ ရာခိုင်နှုန်းကျဆင်းခဲ့ပါတယ်။
ဇန်နဝါရီလမှာ သမ္မတရာထူး ပြန်လည်ရရှိခဲ့တဲ့ ဒေါ်နယ်ထရန့်ဟာ ကမ္ဘာတဝန်းရှိ နိုင်ငံတွေအပေါ် အခွန်စည်းကြပ်မှုတွေ ပြုလုပ်နေခဲ့ပြီး အမေရိကန်ရုပ်ရှင်သမားတွေပါ ထိခိုက်ခဲ့ပါတယ်။ ဧပြီလအတွင်းမှာတော့ တရုတ်နိုင်ငံဟာ နိုင်ငံမှာပြသခွင့်ပြုမယ့် အမေရိကန်ရုပ်ရှင်အရေအတွက်ကို လျှော့ချမယ်လို့ ပြောပါတယ်။
ဒေါ်နယ်ထရန့်ကတော့ အခုလို အခွန်တွေကောက်ခံတာဟာ အမေရိကန်ကုန်ထုတ်လုပ်မှုကို မြှင့်တင်ပေးပြီး အလုပ်အကိုင်တွေကို ကာကွယ်ပေးမယ်လို့ သူက စောဒကတက်ထားပေမယ့် ရလဒ်အနေနဲ့ ကမ္ဘာ့စီးပွားရေး ကမောက်ကမဖြစ်ကာ ကုန်စည်စျေးနူန်းတွေ မြင့်တက်လာဖွယ်ရှိနေပါတယ်။
Ref:BBC
Photo:Getty Images
