မန္တလေး -သြဂုတ် ၂၁-၂၀၂၆
KKA (VOM)
မန္တလေးမြို့၊ အောင်မြေသာစံမြို့နယ်၊ အိုးဘိုရပ်ကွက်မှာ တနှစ်မှာ တကြိမ်ပဲ ကျင်းပလေ့ရှိတဲ့ အိုးပုတ်ပွဲတော်ကို ဒီနေ့ ဩဂုတ် ၂၁ ရက်မှာ ပြုလုပ်နေပါတယ်။ ဒီနေ့ ကျင်းပပြုလုပ်တယ်ဆိုပေမယ့် ပွဲတော်မစခင် ၁၉ ရက်နေ့ကတည်းက လာရောက်လည်ပတ်သူတွေနဲ့ စည်ကားနေတာကို တွေ့ရပါတယ်။
ဒီအိုးပုတ်ပွဲတော်ကို မြန်မာရက်နဲ့ သတ်မှတ်ပြီး နှစ်စဉ် ဝါခေါင်လဆန်း ၈ ရက်နေ့ ကျင်းပခဲ့တာလည်း ဖြစ်ပါတယ်။ အရင်က ပွဲတော်ဟာ ညနေပိုင်းမှာပဲ စည်ကားခဲ့ပြီး အခုအခါမှာတော့ မနက်ပိုင်းကတည်းက စည်ကားနေတာပဲ ဖြစ်ပါတယ်။
”အိုးပုတ်တွေက လှတယ်။ တစုတစည်း တွေ့ရတော့ ပျော်ပါတယ်။ ကျင်းပတဲ့ နှစ်တိုင်း လာဖြစ်ပါတယ်။ အရင်နှစ်တွေထက် ပိုစည်တယ်လို့ ခံစားရတယ်” လို့ လာရောက်လည်ပတ်နေတဲ့ မန္တလေးမြို့ခံ ကိုညီညီလွင်က VOM ကို ပြောပါတယ်။
နောက်ထပ် မြို့ခံတဦးဖြစ်တဲ့ ဒေါ်ဌေးဌေးကလည်း “တနှစ်မှာ တရက်ပဲ ကျင်းပတဲ့ပွဲမို့ လာကြပါလို့ ဖိတ်ခေါ်ပါတယ်” လို့ ပြောပါတယ်။
ဒီအိုးပုတ်ပွဲတော်ကို အသက် ၁၈ နှစ်ကတည်းက ခုအသက် ၆၀ ကျော်အထိ အိုးပုတ်ရောင်းချနေတဲ့ ဒေါ်ဖြူဖြူကလည်း “ဟိုတုန်းကနဲ့ အခုက ကွာတာပေါ့။ အရင်က အိုးပုတ် ၁၀ လုံးကို တထောင်နဲ့ ရောင်းရတယ်။ အခုက တလုံး ၅၀၀ နဲ့ ရောင်းနေရတယ်။ ကားခတွေကလည်း ဈေးကြီး၊ ဆိုင်ခန်းခတွေကလည်း ဈေးကြီးလာတယ်” လို့ ပြောပါတယ်။
အခုနှစ် ကျင်းပတဲ့ အိုးပုတ်ပွဲတော်မှာ ရောင်းချတဲ့ ဆိုင်ခန်းတခန်းကို နေရာ အကျဉ်း/အကျယ်ပေါ် မူတည်ပြီး တသိန်းကနေ သုံးသိန်းအထိ ပေးနေရတဲ့အတွက် ဈေးသည်အများစု အဆင်မပြေကြဘူးလို့ အိုးပုတ်ရောင်းချနေသူတစ်ဦးက VOM ကို ပြောပါတယ်။
အရင်က ဆိုင်ခန်းတခန်းကို သောင်းဂဏန်းသာ ပေးခဲ့ရပြီး အခုက ကန်ထရိုက်ပေးလိုက်တဲ့အတွက် ဆိုင်ခန်းခတွေ ဈေးကြီးနေတာလည်း ဖြစ်ပါတယ်။
