နိုဝင်ဘာ ၂၁ ၊ ၂၀၂၅
CC (VOM)
ရွေးကောက်ပွဲဥပဒေနဲ့ အရေးယူခံထားရတဲ့အထဲက အမျိုးသားသုံးယောက်နဲ့ အမျိုးသမီး တယောက်တို့ကို သက်ဆိုင်ရာ မြို့နယ်တရားရုံးတွေက နိုဝင်ဘာ ၁၉ ရက်က နှစ်ရှည်ထောင်ဒဏ်တွေ အသီးသီး ချမှတ်လိုက်တယ်လို့ သိရပါတယ်။
ရန်ကုန်တိုင်း ၊ လှိုင်သာယာအနောက် မြို့နယ် နဲ့ လှိုင်သာယာ အရှေ့ပိုင်းမြို့နယ် တရားရုံးက အသက် ၂၃ နှစ် အရွယ် ကိုရန်နိုင်ကြည်ဝင်း နဲ့ အသက် ၂၄ နှစ် အရွယ် ကိုအောင်ရဲထွဋ်တို့ကို ထောင်ဒဏ် ၄၉ နှစ်စီချမှတ်ခဲ့ပြီး အသက် ၁၉ နှစ်အရွယ် မယမင်းထက် ကိုတော့ ထောင်ဒဏ် ၄၂ နှစ်ချမှတ်ခဲ့တာ ဖြစ်တယ်လို့ သိရပါတယ် ။
ရန်နိုင်ကြည်ဝင်း နဲ့ အောင်ရဲထွဋ်တို့ကို ရွေးကောက်ပွဲများကို နှောင့်ယှက်ဟန့်တား ဖျက်ဆီးခြင်းမှ ကာကွယ်ပေးရေးဥပဒေပုဒ်မ ၂၃(က)အရ အမှု ခုနှစ်ခုစွဲဆိုခဲ့ကာ နှစ်ရှည်ထောင်ဒဏ် ချမှတ်ခဲ့တာဖြစ်ပြီး မယမင်းထက်ကိုလည်း ပုဒ်မ ၂၃ ( က) အရ ခြောက်မှုစွဲဆိုခဲ့ပြီး နှစ်ရှည်ထောင်ဒဏ် ချမှတ်ခဲ့တာဖြစ် တယ်လို့သိရပါတယ်။
လှိုင်သာယာ အရှေ့ပိုင်းမြို့နယ် နဲ့ အနောက်ပိုင်းမြို့နယ်မှာ စက်တင်ဘာလတုန်းက ရွေးကောက်ပွဲ ဆန့်ကျင်ရေး ပိုစတာတွေ လိုက်ကပ်ခဲ့တဲ့အတွက် ဖမ်းဆီးခံခဲ့ရတာဖြစ်ပြီး ဖမ်းဆီးပြီး နှစ်လအကြာမှာ ထောင်ဒဏ်ချမှတ်ခဲ့တာ ဖြစ်တယ်လို့ သိရပါတယ်။
” ထောင်ကျမယ် ဆိုတာသိပေမယ့် ဒီလောက် အများကြီး ချခံရမယ်လို့တော့ မထင်ခဲ့ဘူး ။ ပုဒ်မတခုတည်းကိုပဲ အမှုတွေသီးခြားထပ်ဖွင့်ပြီး လုပ်လိုက်တော့ ပြစ်ဒဏ်က ပိုများသွားတယ် သိရတယ်။ အသက်ငယ်ငယ်လေးတွေ ပါ။ အခုတော့ သူတို့ဘဝက လွတ်ငြိမ်းမျှော်ဖို့ပဲရှိတော့တယ် ။ ဒီဥပဒေနဲ့ လွတ်အောင် နေကြပါဗျာ ။ ” လို့ မိသားစုနဲ့ နီးစပ်တဲ့ လိူင်သာယာ အနောက်ပိုင်းမြို့နယ် နေထိုင်သူတယောက်ကပြောပါတယ်။
အလားတူ မွန်ပြည်နယ် ချောင်းဆုံမြို့နယ်က အသက် ၆၅ နှစ်အရွယ် ဦးကျော်မြင့်ကို မော်လမြိုင် ခရိုင်တရားရုံးက ပါတီစုံဒီမိုကရေစီအထွေထွေရွေးကောက်ပွဲများကို နှောင့်ယှက် ဟန့်တားဖျက်ဆီးခြင်းမှ ကာကွယ်ပေးရေး ဥပဒေပုဒ်မ ၂၆ (က)/၂၄ (က) အရ ထောင်ဒဏ် ၁၇ နှစ်ချမှတ်လိုက်တယ်လို့ သိရပါတယ်။
နိုဝင်ဘာ ၄ ရက်နေ့က ချောင်းဆုံမြို့နယ်၊ ကွမ်ရိုက်ရွာ အုပ်ချုပ်ရေးမှူးရုံးမှာ ကပ်ထားတဲ့ ရွေးကောက်ပွဲဝင်ရောက်ယှဉ်ပြိုင်မယ့် လွှတ်တော်ကိုယ်စားလှယ်လောင်းတွေရဲ့ အမည်စာရင်းပါ စာရွက်ကို ဆုတ်ဖြဲ ဖျက်ဆီးခဲ့တဲ့အတွက် ဦးအောင်မြင့်ကို နိုဝင်ဘာ ၅ ရက်မှာ ဖမ်းဆီးခဲ့ပြီး ၁၅ ရက်အကြာမှာ ထောင်ဒဏ်ချမှတ်ခဲ့တာ ဖြစ်တယ်လို့ သိရပါတယ်။
” ရွေးကောက်ပွဲ ဥပဒေနဲ့ အရေးယူခံရရင် အာမခံလည်း ရတာမတွေ့သလို ခံဝန်နဲ့ပြန်လွှတ်ပေးတာ မျိုးလည်းမရှိသေးဘူး ။ အမှုဖွင့် ရုံးတင်ပြီဆိုတာနဲ့ သိပ်မကြာဘူး ထောင်ဒဏ်ချခံရတယ် ။ ဆိုတော့ဗျာ ကိုယ်က ပြည်တွင်းမှာ နေနေတဲ့ သူမျိုးဆိုရင် ကိုယ့်အန္တရာယ်ကို ကိုယ့်ဘာသာကြည့်ရှောင်ကြပါ။ ရွေးကောက်ပွဲ ဥပဒေနဲ့ညိရင် ဘယ်သူမှ မကယ်နိုင်ဘူး ။ ” လို့ နိုင်ငံရေးသမား တယောက်က ပြောပါတယ် ။
စက်တင်ဘာ ၉ ရက်ကလည်း ရွေးကောက်ပွဲဥပဒေနဲ့ ပထမဆုံး စတင် အရေးယူခံခဲ့ရတဲ့ ရှမ်းပြည်နယ် ၊ တောင်ကြီးမြိုမှ အသက် ၃၆ နှစ်အရွယ် ကိုနေသွေး ဆိုသူကို တောင်ကြီးမြို့နယ် တရားရုံးက အလုပ်နဲ့ ထောင်ဒဏ် ခုနစ်နှစ် အမိန့်ချမှတ်မှု ရှိခဲ့ပါတယ်။
ဒါကြောင့် ခုဆိုရင် ရွေးကောက်ပွဲ ဥပဒေနဲ့ ဖမ်းဆီးအမှုဖွင့်ခံထားရသူတွေထဲက ထောင်ဒဏ်ချမှတ်ခံရသူ ငါးယောက်အထိရှိ နေပြီဖြစ်ပါတယ်။
ရွေးကောက်ပွဲ လုပ်ငန်းစဉ်တွေ ပျက်ပြားအောင် လုပ်ဆောင်မှုကြောင့် ဖမ်းဆီး၊ အရေးယူခံရသူကတော့ အယောက် ၁၀၀ နီးပါးအထိ ရှိလာနေပြီဖြစ်တယ်လို့ ပြန်ကြားရေးဝန်ကြီးဌာနရဲ့ ထုတ်ပြန်ချက်တွေအရ သိရပါတယ်။
ဓာတ်ပုံ – Cj
