ဇူလိုင် ၂၆ – ၂၀၂၃
GG (VOM)
ဂျပန်ရောက် မြန်မာနိုင်ငံသား ပျောက်ဆုံး/ပျက်စီးသွားတဲ့ နိုင်ငံကူးလက်မှတ်အတွက် ဒဏ်ကြေးတွေကို တိုးမြင့်သတ်မှတ် ကောက်ခံမယ်လို့ ဒီနေ့ ဇူလိုင် ၂၆ ရက်နေ့မှာ ဂျပန်နိုင်ငံ၊တိုကျိုမြို့မြန်မာနိုင်ငံသံရုံးက အသိပေးလိုက်ပါတယ်။
ဇူလိုင်၂၄ ရက်နေ့ကလည်း ဆော်ဒီအာရေဗျနိုင်ငံ အပါအဝင် ထိုင်း ၊ မလေးရှား ၊ ကိုရီးယားနိုင်ငံဆိုင်ရာ မြန်မာသံရုံးတွေက ပြည်ပရောက် မြန်မာအလုပ်သမားတွေရဲ့ ပျောက်ဆုံး/ပျက်စီးသွားတဲ့ နိုင်ငံကူးလက်မှတ်အတွက် ဒဏ်ကြေးတွေကို တိုးမြင့်သတ်မှတ် ကောက်ခံမယ်လို့ အသိပေးခဲ့ပါတယ်။
ဒါ့ကြောင့် လက်ရှိမှာဆိုရင် ပြည်ပနိုင်ငံ ၅ ခုလောက်က သံရုံးတွေဟာ ဒဏ်ကြေးငွေတွေကို စတင်တိုးမြင့်ကောက်ခံနေပြီဖြစ်တယ်လို့ သိရပါတယ်။
” ဘာလို့တိုးကောက်တာလဲ မကြေညာဘူး ၊ မေးလို့လည်း မရပါဘူး။ မြန်မာမှာ ၂၀၀၀၀ တန်ထုတ်မယ် ကြေညာအပြီး ငွေစျေးတက်ပြီးနောက် သူတို့သံရုံးတွေက အဲ့ဒီလို တိုးကောက်တာပဲ။ သူတို့ တိုးကောက်တော့လည်း ကျနော်တို့က ဘာလုပ်လို့ရမလဲ ၊ တောင်းသလောက်ပေးနေရတာပဲ။ အကြောင်းပြချက်မရှိဘဲ တိုးကောက်တာပါဗျာ ၊ ဒဏ်ကြေးကို တိုးတာပေါ့၊စာအုပ်အသစ်အတွက်ကတော့ အရင်လို့ ယန်း ၅၀၀၀ ပဲ”လို့ ဂျပန်ရောက် မြန်မာနိုင်ငံသား ကိုစိုင်းကပြောပါတယ်။
ဂျပန်နိုင်ငံက မြန်မာလုပ်သားတွေရဲ့ ပတ်စပို့စ် စာအုပ် ပျက်စီး၊ပျောက်ဆုံးခြင်းအတွက် ဒဏ်ကြေးကို အရင်ကောက်ခံနေတဲ့ ဂျပန်ယန်းငွေ ၁၂၀၀၀ ကနေ ၁၅၀၀၀ အဖြစ် တိုးမြှင့် သတ်မှတ်လိုက်ကာ စာအုပ်တန်ဖိုးကတော့ ပုံမှန်နူန်းအတိုင်း ကောက်ခံမယ်လို့ အသိပေးခဲ့တာဖြစ်ပါတယ်။
အလားတူ မလေးရှားနိုင်ငံသံရုံးကလည်း အရင်ကောက်ခံနေတဲ့ ဒေသသုံးငွေ ရင်းဂစ် ၃၃၀ အစား ရင်းဂစ် ၄၈ဝ ကို ပြောင်းလဲကောက်ခံမယ်လို့ အသိပေးခဲ့တာဖြစ်ပါတယ်။
ကိုရီးယားနိုင်ငံကလည်း စာအုပ် ပျောက်ဆုံး/ပျက်စီးအတွက် ဒဏ်ကြေးငွေကို အရင်ကကောက်ခံနေတဲ့ အမေရိကန် ဒေါ်လာ ၇၅ အစား အမေရိကန်ဒေါ်လာ ၁၀၅ တိုးမြှင့်လိုက်ပြီး စာအုပ်တန်ဖိုးကိုတော့ အရင်နူန်းထား ဝမ် ၄၈၀၀၀ ကောက်ခံနေတယ်လို့ သိရပါတယ်။
” ဟုတ်တယ် ဒဏ်ကြေးကို ပိုတိုးတောင်းတာပါ။ ဒေါ်လာ ၃၀ တက်တာပေါ့။ ဘာလို့တက်လဲတော့မသိဘူးဗျ၊ တက်တော့လည်း တက်ပေးရတာပဲ။ ပွဲစားနဲ့လုပ်ရင် ပိုကုန်ကျတာပေါ့၊အဆင့်ဆင့်ဖြစ်ကုန်တာလေ “လို့ ကိုရီးယားရောက်မြန်မာအလုပ်သမား ကိုမင်းဇေယျာကိုကပြောပါတယ်။
အလားတူ ဆော်ဒီအာရေဗျနိုင်ငံ ၊ ရီရတ်ဒ်မြို့မြန်မာသံရုံးကလည်း နိုင်ငံကူးလက်မှတ်စာအုပ် အသစ်ကြေးကို အရင်အတိုင်း ဆော်ဒီရီရယ် (၁၃၅)ကနေ မပြောင်းလဲဘဲ ဒဏ်ကြေးကိုတော့ ဆော်ဒီရီရယ် ၂၈၅ ကနေ ၄၀၀အထိ တိုးမြင့်ကောက်ခံမယ်လို့ အသိပေးခဲ့ပါတယ်။
ထိုင်းနိုင်ငံကလည်း မြန်မာလုပ်သားတွေရဲ့ စာအုပ် ပျက်စီး၊ပျောက်ဆုံးအတွက် ဒဏ်ကြေးနဲ့ စာအုပ်တန်ဖိုးအပါကို ၄၉၀၀ ဘတ် အဖြစ် သတ်မှတ်ခဲ့တယ်လို့သိရပါတယ်။
လက်ရှိမှာ ထိုင်းနိုင်ငံကို မြန်မာအလုပ်သမားအများဆုံး အလုပ်သွားရောက်လုပ်ကိုင်နေကြသလို မလေးရှား ၊ ဂျပန်နိုင်ငံတွေကိုလည်း အလုပ်သွားရောက်လုပ်ကိုင်နေကြကြောင်း ၊ ကိုရီးယားနိုင်ငံကိုလည်း အစိုးရပြည်ပအလုပ်အကိုင်အေဂျင်စီကနေ တစ်ဆင့် EPS စနစ်နဲ့ မြန်မာအလုပ်သမားတွေ ထောင်နဲ့ချီသွားရောက်လုပ်ကိုင်နေကြပါတယ်။
အဆိုပါ နိုင်ငံတွေထဲက ထိုင်းနဲ့ မလေးရှားကို သွားဖို့အတွက် အစိုးရစာမေးပွဲဖြေဆိုဖို့ မလိုအပ်သလို ပညာအရည်အချင်းလည်း မလိုအပ်ဘဲ လိုင်စင်ရအေဂျင်စီတွေနဲ့ ချိတ်ကာ တရားဝင်သွားတဲ့သူတွေရှိသလို တရားမဝင်နည်းလမ်းနဲ့သွားရောက်နေသူတွေလည်း ရှိနေပြီး ကုန်ကျစရိတ်က သိန်း ၄၀ ကနေ ၈၀ လောက်အထိ ကုန်ကျမှုရှိနေတယ်လို့ သိရပါတယ်။
ကိုရီးယား နဲ့ ဂျပန်ကိုသွားရောက်အလုပ်လုပ်မယ့်သူတွေကတော့ မြန်မာနိုင်ငံအစိုးရရဲ့ စာမေးပွဲတွေကို ဖြေဆိုအောင်မြင်ပြီး ဘာသာစကားကျွမ်းကျင်မှသာ အလုပ်သွားရောက်လုပ်ကိုင်နိုင်မှာဖြစ်ပြီး ဆော်ဒီအာရေဗျနိုင်ငံတွေကိုလည်း ဘာသာစကားကျွမ်းကျင်ပြီး ပညာအရည်အချင်းပြည့်မှီဖို့လိုအပ်တယ်လို့ သိရပါတယ်။
#voiceofmyanmar #VOM #ပြည်ပရောက်မြန်မာ #နိုင်ငံကူးလက်မှတ် #တိုးမြင့်ကောက်ခံမှု
