ဇွန် ၊ ၁၀ ၊ ၂၀၂၄
SP (VOM)
စစ်ကိုင်းတိုင်း ၊ မုံရွာမြို့နယ် ၊ မုံရွာ – အမြင့် ကားလမ်း ၊ ထနောင်းတော ကျေးရွာနားမှာ ဒီကနေ့ မနက်ပိုင်း ၆ နာရီဝန်းကျင်က ဆိုင်ကယ်စီးလာတဲ့ လူငယ်သုံးယောက်ကို နစက လုံခြုံရေးအဖွဲ့တွေက ပစ်ခတ်ဖမ်းဆီးလိုက်တယ်လို့ ဒေသခံတွေဆီက သိရပါတယ်။
” နစက လုံခြုံရေး အဖွဲ့တွေက ထနောင်တော (တောင်) ရွာနဲ့ (မြောက်) ရွာကြား မုံရွာ – အမြင့် တာရိုးလမ်းပေါ်မှာ ဆိုင်ကယ်နှစ်စီး လူသုံးယောက်ကို ပစ်ခတ်ဖမ်းဆီးတယ် ၊ အဲ့ဒါကြောင့် ပစ်ခတ်ခံရတဲ့ လူသုံးယောက် သေဆုံးသွားတယ် ” လို့ ထနောင်းတော (တောင်)ရွာ ဒေသခံတယောက်က ပြောပါတယ်။
အဲ့ဒီ ဖြစ်စဥ်နဲ့ ပတ်သက်ပြီး မုံရွာခရိုင် လုံခြုံရေး အဖွဲ့နဲ့ နီးစပ်သူတယောက်က ” မုံရွာ – အမြင့်လမ်း ထနောင်းတောရွာဘက်မှာ နယ်မြေရှင်းလင်းရေး လုပ်တယ် ၊ မသင်္ကါဖွယ်ရာ ဆိုင်ကယ် နှစ်စီးမောင်းလာတယ် ၊ လုံခြုံရေးအဖွဲ့တွေက ရပ်တန့်ပေးဖို့ ပြောတယ် ၊ သူတို့က ဆိုင်ကယ်ကို မောင်းထွက်ပြေးတာကြောင့် ပစ်ခတ်ဖမ်းဆီးလိုက်တယ် ၊ အမျိုးသား ရုပ်အလောင်း သုံးလောင်းနဲ့ ဆိုင်ကယ်နှစ်စီး ၊ AK သေနတ် တလက် ၊ ကျည်အိမ်တခု ၊ ကျည်ဆံ ၁၅ တောင့် သိမ်းဆည်းရမိတယ် ” လို့ ပြောပါတယ်။
မနေ့ ဇွန် ၉ ရက် ၊ မနက် ၆ နာရီဝန်းကျင်က စစ်ကိုင်းမြို့နယ် ၊ ကျော်ဇေယျကျေးရွာနားမှာ အလားတူ ပစ်ခတ်ဖမ်းဆီးခံရပြီး ဆိုင်ကယ်တစီး လူနှစ်ယောက် သေဆုံးကာ အဲ့ဒီ ဆိုင်ကယ်ပေါ်က မိုင်းဖောက်ခွဲရာမှာ အသုံးပြုတဲ့ ရီမု နှစ်ခု ၊ ဒီတိုနီတာ ငါးချောင်း ၊ ဆားကစ်ပြား တခု ၊ ဘက်ထရီအိုး နှစ်လုံး သိမ်းဆည်းရမိတယ်လို့ သိရပါတယ်။
ပြီးခဲ့တဲ့ မေ ၃၀ ရက်က မုံရွာမြို့ ၊မြို့ရှောင်ကားလမ်း (မြို့ပတ်လမ်း) ကမ္မကျေးရွာနဲ့ ကျောက်စစ်ပုံ သာစည်လမ်း အဝိုင်းပတ်နေရာ နားမှာ မုံရွာနယ်မြေရဲစခန်းက လှည့်ကင်းကားတစီးကို ဒေသတွင်း လက်နက်ကိုင် PDF အဖွဲ့က ပစ်ခတ်ပြီး ရဲအုပ်တယောက်အပါအဝင် ရဲတပ်ဖွဲ့ဝင် လေးယောက်သေဆုံးကာ သေနတ် လေးလက်ပါသွားခဲ့တယ်လို့ သိရပါတယ်။
