အစ္စရေးကို ဟဇ်ဘိုလာအဖွဲ့က ဒုံးကျည် ၁၆၀ ကျော်နဲ့ လက်တုံ့ပြန် တိုက်ခိုက်

တဲလ်အဗစ်၊ နိုဝင်ဘာ-၂၅-၂၀၂၄
မျိုးဆက်(VOM)

လက်ဘနွန်အခြေစိုက် ဟဇ်ဘိုလာအဖွဲ့ဟာ အစ္စရေးဘက်ကို ဒုံးကျည်အစင်း ၁၆၀ ကျော်နဲ့ ပစ်ခတ်တိုက်ခိုက်ခဲ့ကြောင်း အစ္စရေးစစ်တပ်က ပြောပါတယ်။

ဒုံးကျည်တွေနဲ့ ပစ်ခတ်တိုက်ခိုက်မှုကြောင့် နေအိမ်တွေပျက်စီးခဲ့ပြီး လူအများအပြား ထိခိုက်ဒဏ်ရာရခဲ့တယ်လို့ အစ္စရေးအခြေစိုက် သတင်းမီဒီယာတွေကဆိုပါတယ်။ ဒီအတောအတွင်း လက်ဘနွန်နိုင်ငံ မြို့တော်ဘေရွတ်ကို အစ္စရေးက လေကြောင်းကနေ ဆက်လက်တိုက်ခိုက်နေပါတယ်။

ပြီးခဲ့တဲ့နေ့က တိုက်ခိုက်မှုအတွင်း လူ ၂၉ ယောက်သေဆုံးပြီး ၆၇ ယောက်ဒဏ်ရာခဲ့တယ်လို့ လက်ဘနွန်ကျန်းမာရေး အာဏာပိုင်တွေက ပြောပါတယ်။ လက်ရှိမှာတော့ နှစ်ဖက်အပစ်အခတ်ရပ်စဲရေးအတွက် သံတမန်ရေးရာ ကြိုးပမ်းအားထုတ်မှုတွေကို နိုင်ငံတကာက လုပ်ဆောင်နေပါတယ်။

မနေ့ကတော့ အီးယူ နိုင်ငံခြားရေးမူဝါဒအကြီးအကဲ ဂျိုးဇက်ဘော်ရဲလ်ဟာ လက်ဘနွန်ကိုသွားရောက်ခဲ့ပြီး လွှတ်တော်ဥက္ကဌ နာဘင့်ဘာရီနဲ့ တွေ့ဆုံဆွေးနွေးခဲ့ပြီး အမေရိကန်အဆိုပြုထားတဲ့ အပစ်အခတ်ရပ်စဲရေးကို သဘောတူဖို့ အစ္စရေးအစိုးရနဲ့ ဟဇ်ဘိုလာတို့ကို ဆက်လက်ဖိအားပေးရမယ်လို့ အစည်းအဝေးအပြီးမှာ သူက ပြောပါတယ်။

ပြီးခဲ့တဲ့နှစ် အောက်တိုဘာလမှ ဂါဇာစစ်ပွဲစတင်ပြီးနောက် လက်ဘနွန်အခြေစိုက် ဟဇ်ဘိုလာအဖွဲ့ဟာ အစ္စရေးမြောက်ပိုင်းကို ဒုံးကျည်တွေနဲ့ နယ်စပ်ဖြတ်ကျော်တိုက်ခိုက်မှုတွေပြုလုပ်ပြီးနောက် မကြာသေးခင်လများအတွင်း အစ္စရေးစစ်တပ်ကလည်း ဟဇ်ဘိုလာတို့ကို မြေပြင်ထိုးစစ်အပြင် လေကြောင်းတိုက်ခိုက်မှုတွေပါ အကြီးအကျယ် လုပ်ဆောင်ခဲ့ပါတယ်။

Ref:NHK
Photo:NHK