မတ် ၁၂-၂၀၂၁
TG(VOM)
မင်္ဂလာဒုံမြို့နယ်၊ မြသီတာရပ်ကွက်မှာ မနေ့ မတ်လ ၁၁ရက် ည ၁ နာရီကျော်လောက်က စစ်တပ်နဲ့ရဲက ဝင်ရောက်ပစ်ခတ်ခဲ့တာကြောင့် ကင်းစောင့်နေတဲ့ ရပ်ကွက်နေအမျိုးသား ၂ ဦး ကျည်ထိမှန်သေဆုံးခဲ့တယ်လို့ မျက်မြင်တွေ့ရှိသူကနေ သိရပါတယ်။
သေဆုံးသူ ၂ ဦးဟာ မြသီတာရပ်ကွက်နေ ဦးကျော်ဇင်လတ်(ခေါ်) ဦးရှည်ကြီးနဲ့ ဦးဇော်မင်းထွန်းဆိုသူတို့ ဖြစ်ပါတယ်။
ပစ်ခတ်ခံရမှု ဖြစ်စဉ်နဲ့ပတ်သက်ပြီး မျက်မြင်တွေ့ရှိသူက “ညက ၁ နာရီလောက်မှာ သေနတ်သံကြားတော့ ကင်းသမားတွေက ရဲတွေဆိုတာကို ပုန်းပြီးအချက်ပြတယ်။ အဲ့မှာ သူတို့ကတံခါးတွေ အတင်းရိုက်ဖွင့်တယ်၊ လူရိပ်တွေ့တာနဲ့ ပစ်တော့တာပဲ။ တံခါး၂ချပ်နဲ့ ပိတ်ထားတာကို ပထမတံခါးကို သူတို့က ရိုက်ဖွင့်ကြပါတယ်။ အဲ့ဒါခု ရင်ဘတ်ထိတဲ့အကိုက ဒုတိယတံခါးနားကနေ ထိသွားတာပါ။ နောက်တစ်ယောက်က ခြေထောက်ထိလို့ပုန်းတာကို ထပ်ပစ်ပြီးခေါ်သွားတယ်။ အသက်၁၇ကောင်လေးလည်း ခေါင်းနောက်ကို ရော်ဘာကျည်ထိပါသေးတယ်။ ဒါပေမယ့်ခုကတော့ စိုးရိမ်စရာမရှိတော့ပါဘူး။ စစ်ကောင်စီကခန့်တဲ့ ဥက္ကဌအပါ ဒလန်တွေက ခုလှုပ်ရှားသူတွေကို ဖမ်းဖို့သတင်းပေးပြီး ဖမ်းခိုင်းတာလို့ သိရပါတယ်”လို့ ပြောပြပါတယ်။
ဦးဇော်မင်းထွန်းကိုတော့ ညကတည်းက ပစ်ခတ်ပြီး ခေါ်ဆောင်သွားခဲ့ကာ ရုပ်အလောင်းကို ရင်ခွဲရုံမှာ လာရောက်ထုတ်ယူဖို့ ပြောဆိုကြောင်းနဲ့ လက်ရှိနေအိမ်မှာ ကျန်ခဲ့တဲ့ ဦးရှည်ကြီးရဲ့ ရုပ်အလောင်းကိုလည်း စစ်တပ်က လာတောင်းနေတယ်လို့ သိရပါတယ်။
အဲ့ဒီ ပစ်ခတ်မှုကြောင့် လူ ၂ ဦးသေဆုံးခဲ့တဲ့အပြင် ရာဘာကျည်ထိမှန်လို့ ထိခိုက်ဒဏ်ရာရခဲ့သူ ၅ ဦးလည်းရှိခဲ့တယ်လို့ သိရပါတယ်။
သေဆုံးသွားတဲ့ ကိုကျော်ဇင်လတ်(ခေါ်)ကိုရှည်ကြီးမှာ မိန်းမနဲ့သားတယောက်၊ သမီးတယောက်ကျန်ခဲ့ပြီး နောက်ထပ်သေဆုံးသူ ကိုဇော်မင်းထွန်းမှာလည်း မိန်းမနဲ့ လူမမယ်ကလေးတစ်ဦး ကျန်ခဲ့တယ်လို့ သိရပါတယ်။
မနေ့ မတ်လ၁၁ရက်နေ့ တရက်တည်းမှာ စစ်တပ်နဲ့ရဲက ပစ်ခတ်လို့ မြန်မာနိုင်ငံအနှံ့ သေဆုံးသူ ၁၅ဦးနီးပါး ရှိခဲ့ပါတယ်။
#VoiceOfMyanmar #VOM #မင်္ဂလာဒုံမြို့နယ် #ပစ်ခတ် #သေဆုံး #ကင်းစောင့်သူ
