————————————————
ဆူးငှက်
အခုတလော ဘယ်သူ၊ ဘယ်မှာ၊ ဘယ်အချိန်၊ ဘာဖြစ်၊ ဘယ်လိုဖြစ်၊ ဘာကြောင့်ဖြစ်ဆိုတဲ့ ” ခြောက်လုံးနဲ့ပြည့်စုံသော ” သတင်းတွေ ငတ်နေသည်။ အဖွဲ့အနွဲ့တွေ အကွန့်အညွန့်တွေ အပိုအဆာတွေ၊ သို့မဟုတ် မတိမကျ မပြည့်မစုံတွေ ဖတ်ရလျှင် ချက်ချင်း သိချင်စိတ်လောဘကြောင့် အူယားသည်။ နားခံတွင်းပေါက် ဒုတ်ဒုတ်ထိရောက်အောင် ကျစ်လျစ်ခိုင်မာသော သတင်းတွေ ငတ်မွတ်သည်။
တကယ်တော့ ကနဦးမြန်မာသတင်းစာ အရေးအသားဆိုတာကလည်း ရှေးစာဆိုတို့၏ စာဟောင်း စာကောင်းများမှ “သတင်းပေးရေးဖွဲ့မှုပုံစံ” များအပေါ် အတုယူဖြစ်ထွန်းခဲ့သည်မဟုတ်ပါလား ….။
ဦးတိုး၏ ရာမရကန်တွင် မယ်သီတာချောသမျှ လှသမျှ အဆင့်ဆင့်သတင်းလွှင့်တာနှင့်ပတ်သက်၍ ….
” ချောရိုးမှန်လှပေ့ဟု၊ ခရေစေ့တွင်းကျ
ခေါင်းခေါက်လို့ပြသည့်နှယ်၊ မြင်ရသူတွေ့ရသသူ
လူပျိုချင်းဆင့် သတင်းလွှင့်၍လွင်သလို
အိုအိုပျိုပျိုမင်းဆိုသမျှ၊ နားခံတွင်းပေါက်
ချုပ်ခနဲရောက်တဲ့အောင်၊ ပေါက်ခနဲအလိပ်
ဆုပ်၍သိပ်သည့်နှယ်၊ ညိုရိပ်ကယ်သတင်း
သျှိုတစ်ကွင်းကိုသည်နှယ်လှ၊ သည်နှယ်နု
သည်လူစုသာမှု၊ တစ်ခုပြောဆို၏ …..” ဟုရေးသားခဲ့သည်။
ထို့ကြောင့်လည်း ” ငါမကောင်းလျှင် ငါ့ကိုရေး၊ ငါ့မိဖုရားမကောင်းလျှင် ငါ့မိဖုရားကိုရေး၊ ငါ့သားသမီး မကောင်းလျှင် ငါ့သားသမီးတွေကိုရေး၊ မင်းတို့ သတင်းစာတိုက်၌ အပြစ်မရှိစေရ၊ နန်းတော်တွင်းသို့ သတင်းစာတိုက်က မည်သူမဆို အတားအဆီးမရှိဝင်ထွက်စေ ” ဟူသောအမိန့်ဖြင့်ထုတ်ဝေသော “ရတနာပုံနေပြည်တော်” သတင်းစာ၏ သတင်း အရေးအသားများကလည်း
” ဘုန်းတော်အလွန်ကြီးမြတ်တော် မူလှသော၊ သကျာဝတ အဂ္ဂါပဝရမွတ်မြွာနဝကတို့၏ အရှင်၊ မင်းတွင်မင်းခေါင် လင်းပြောင်ချီရှိန် သီရိန္ဒြေဖြိုးဝေမြင့်မား မင်းတရားကြီးဘုရားသည် ဆယ်ပါးရာစုမြတ်ဓမ္မနှင့် သင်္ဂဟလေးနှင့် နှေးမယွင်းဖြည့်တင်းဆောက်ဦ ကျင့်တော်မူသောကြောင့် ရာဇူစက္ကရတ်ဘေးလောင်းမြတ်ဝယ် ဥဂ္ဂဌ်စကြာထူးဆိုက်လာသကဲ့သို့ ထက်ရွာမြို့နယ် မောင်းမယ်အောင်ချက် ဘူမိနက်မှနင်းဆက်ပဏ္ဏာသွင်းပို့လာသော သာခွါငွေကျူ၊ ရည်တူနှိုင်းလျော်ဆင်ဖြူတော်ပေါက်လှကို…..” ဟူသော အရေးအသားများဖြင့် တလျှောက်လုံး ရေးသားခဲ့သည်။
နှောင်းခေတ် ၁၉၅ဝကျာ်ဝန်းကျင် သတင်းစာများ၌ပင် အဓမ္မစော်ကားမှု သတင်းတစ်ပုဒ်ကို
” ပွေရှုတ်လေသဟယ်၊ ရွှေကျုတ်တွင် ဂဏှာမငြိမ်လို့၊ ကာမရှိန်ဇော ….”ဟု ခေါင်းစီးတပ်လေ့ရှိကြသည်။ သတင်းစာဖတ် ပရိသတ်များကလည်း ဤသို့ဤနှယ် ရသပါပါ သတင်းခေါင်းစီးနှင့် သတင်းရေးသားမှုများအပေါ် တစ်လျှောက်လုံး သဘောကျနှစ်ခြိုက်ခဲ့ကြသည်။
မြန်မာသတင်းစာများ သတင်းရေးသားကြလေ့ရှိပုံကို ဝါရင့်သတင်းစာဆရာကြီး တစ်ဦးဖြစ်သူ ကြေးမုံ ဦးသောင်း (အောင်ဗလ) က သုံးသပ်ရာ၌ စာဖတ်သူတို့ စိတ်ဝင်စားစေမည့် ဆွဲဆောင်၍ရေးသားနည်း (၁၆)နည်းရှိကြောင်း တင်ပြခဲ့ဖူးသည်။
၎င်းတို့မှာ
(၁) သတင်းစုရေးနည်း၊ (၂) ဆန့်ကျင်ဘက်ရေးနည်း၊ (၃)မေးခွန်းရေးနည်း၊ (၄)အကြောင်းသရုပ်ဖော်ရေးနည်း၊ (၅) ပန်းချီကားရေးနည်း၊ (၆) အချက်အလက်များရေးနည်း၊ (၇)ဥပမာတင်စားရေးနည်း၊ (၈) စာပေပညာရှိစကားဖြင့်ရေးနည်း၊ (၉) ပုံကြီးချဲ့သရော်စာရေးနည်း၊ (၁၀) မှီငြမ်းပြုအညွှန်းဖြင့်ရေးနည်း၊ (၁၁) အပြန်အလှန်အပြောအဆိုရေးနည်း၊ (၁၂) စုပေါင်း၍စိတ်ဝင်စားအောင်ရေးနည်း၊ (၁၃)ဆတ်တငံ့ငံ့ဖြစ်စေသောရေးနည်း၊ (၁၄) အစီအစဉ်တိုင်းရေးနည်း၊ (၁၅) တိုက်ရိုက်ရေးနည်း၊ (၁၆) ထူးဆန်းစွာရေးနည်းဟူ၍ ဖြစ်သည်။
သို့သော် ယခုအခါ၌ သတင်းကိုဤသို့ရေးသားကြမှု အတော်ရှားပါးသွားပြီဖြစ်သည်။ ပိရမစ်ပုံရေးနည်း၊ ပိရမစ်စောက်ထိုးရေးနည်း ဒီနည်းလမ်းများနှင့်သာ သတင်းတိကျရေရာမှုအပေါ် ဦးစားပေးရေးသားကြ၏။
သည်ပုံစံ၊ သည်ပုံစံအတိုင်းသာ ရေးသားကြပေရော။ လူငယ်လေးများအဖို့တော့ အဆင်ပြေသား။ သည်အတိုင်းဖတ်၊ သည်အတိုင်းမှတ်၊ သည်အတိုင်း ရေးကြရုံပဲပ။ သို့သော် တောင်မရောက်၊ မြောက်မရောက် ဇော်ကန့်လန့်၊ ကျွန်တော့်အဖို့ ရှေးကအရေးအသားတွေလည်း ဖတ်ခဲ့၊ ကြိုက်ခဲ့၊ ရေးခဲ့၊ သားခဲ့။ ရေးဆဲ သားဆဲ။ သူတို့ကဲ့သို့ ပိရမစ်တွေ၊ တြိဂံတွေနှင့်လည်းရေးချင်သားချင်။ သည်တော့ ဘာဖြစ်မလဲ၊ ဘာမှမဖြစ်။ ဟိုမရောက် သည်မရောက်နှင့် ဝါကျကြီးတွေ မလိုအပ်ဘဲ ရှည်လျားထွေပြားနေတာသာ အဖတ်တင်သည်။ ခသေးတရုတ်မ ခပတ်အဝတ်စလို ရှည်လည်းရှည်သေး ….၊ နံလည်းနံသေး ဆိုသလိုမျိုး ….။
ကိုယ်က ဝါကျကို ရှည်သာရှည်ချင်တာ၊ အဆုံးမသတ်တတ်။ ဝိဘတ်ဟုခေါ်သော နောက်ဆက်တွဲ ပစ္စည်းများကိုလည်း မနိုင် နင်း …။ ‘ ကိုသုံးပြီးရင်းသုံးကာ တ.. ပြီး….တည်း ပြီးတာမျိုးကြုံလျှင်ကြုံရသည်။ ထို့အတူ ၍ ၊ ကာ ၊ ရာ ၊ တုန်း ၊ ရင် စသည်တို့လည်း သူ့နေရာနှင့်သူအဆင်မပြေ၊ အပ်ကြောင်း ထပ်ချင်ထပ်နေသည်။
ထို့ထက်ဆိုးတာက ကို…ကိုမသုံးဘဲ အား… တွင်တွင်သုံးဖြစ်နေသည်။ ထို့ပြင် က နေရာကို မှ ဟု အလိုက်မသိ သုံးဖြစ်နေသည်။ ဝိဘတ်မနိုင်သည့်အပြင် ပညာစွမ်းပြရေးရင်း ကတ္တားကပျောက်သွားကာ အဓိပ္ပာယ်မရောက်၊ အဓိပ္ပာယ်မပေါက်လည်း ဖြစ်ရသည်။ ဝါကျရှည်ရှည်ရေးရင်း ကတ္တားနှင့်ကံ ရောထွေးလာပြီး ဝါကျက မရှင်းမလင်းနှင့် ထုံပျင်းပျင်းကြီး ဖြစ်ရသေး၏။
သတင်းဟုဆိုလျှင် “အိုအိုပျိုပျို မင်းဆိုသမျှ၊ နားခံတွင်းပေါက် ချုပ်ခနဲရောက်တဲ့အောင်” လတ်တလော ကျွန်တော်ကိုယ်တိုင်ပြုလုပ်ရမည့် အိမ်စာများတွင် မှန်ကန်သောမြန်မာစာ အရေးအသားကလည်း မဖြစ်မနေပါဝင်ရပေမည်။
#voiceofmyanmar #VOM #ဆူးငှက် #နားခံတွင်းပေါက် #ချုပ်ခနဲရောက်တဲ့အောင်
