တောင်ကိုရီးယားနဲ့ တင်းမာနေချိန် ချက်ချင်းလုပ်ရမယ့် စစ်ရေးအစီအစဉ်တရပ် ကင်ဂျုံအန် ညွှန်ကြား

ပြုံးယမ်း၊ အောက်တိုဘာ-၁၅-၂၀၂၄
မျိုးဆက်(VOM)

တောင်ကိုရီးယားနဲ့ တင်းမာမှုတွေမြင့်တက်နေချိန် မြောက်ကိုရီးယား အမျိုးသားလုံခြုံရေး ထိပ်သီးအစည်းအဝေး ကျင်းပခဲ့ပြီး ချက်ချင်းလုပ်ဆောင်ရမယ့် စစ်ရေးအစီအစဉ်တရပ်ကို ကင်ဂျုံအန်က ညွှန်ကြားခဲ့ပါတယ်။

ပြုံးယမ်းမှာ ပြုလုပ်တဲ့ အဲဒီအစည်းအဝေးကို မြောက်ကိုရီးယားစစ်တပ် အကြီးအကဲ၊ လုံခြုံရေးနဲ့ ကာကွယ်ရေးဝန်ကြီးတွေအပြင် အခြားထိပ်တန်းတာဝန်ရှိသူတွေ တက်ရောက်ခဲ့ကြပါတယ်။

အစည်းအဝေးမှာတော့ ကင်ဂျုံအန်ဟာ နိုင်ငံရေးနဲ့ စစ်ရေးအရ တင်းမာတဲ့ ရပ်တည်ချက်တွေကို ထုတ်ဖော်ပြောဆိုခဲ့တယ်လို့ မြောက်ကိုရီးယားနိုင်ငံပိုင် ကေစီအင်န်အေသတင်းဌာနက ဖော်ပြထားပါတယ်။

စစ်ရေးအဟန့်အတားနဲ့ ကိုယ့်ကိုကိုယ့် ခုခံကာကွယ်ပိုင်ခွင့်တွေမှာ စစ်ရေးအရ ချက်ချင်းတုံ့ပြန်မှုတွေနဲ့ အရေးကြီးတာဝန်တွေကို ပြီးမြောက်စေဖို့ ညွှန်ကြားခဲ့တယ်လို့ အဲဒီ သတင်းဌာနက ဖော်ပြထားပါတယ်။

မကြာသေးမီက မြောက်ကိုရီးယားလေပိုင်နက်ထဲကို တောင်ကိုရီးယားဒရုန်းတွေ ၀င်ရောက်တယ်လို့ စွပ်စွဲထားပြီး နယ်စပ်ကို အင်အားဖြည့်တင်းနေပြီး နောက်ထပ်ဝင်ရောက်လာပါက စစ်ကြေညာခြင်းလို့ သတိပေးထားပါတယ်။ တောင်ကိုရီးယားဘက်ကလည်း မြောက်ကိုရီးယားကို တုံ့ပြန်ဖို့ အသင့်ရှိတယ်လို့ ဆိုပါတယ်။

ဒရုန်းတွေ ဝင်ရောက်မှုမှာ ပါဝင်ပတ်သက်ခြင်းမရှိဘူးလို့ တောင်ကိုရီးယားစစ်တပ်က အစောပိုင်းမှာ ထုတ်ပြန်ထားပါတယ်။ တောင်ကိုရီးယားဘက်က တက်ကြွလှုပ်ရှားသူတွေဟာ မြောက်ကိုရီးယားအစိုးရ ဆန့်ကျင်ရေး ဝါဒဖြန့်စာတွေကို မီးပုံပျံ၊ ဒရုန်းတွေနဲ့ မြောက်ကိုရီးယားဘက်ကို ပေးပို့လေ့ရှိပါတယ်။

Ref:AFP
Photo:AFP