ZY(VOM)
ဒီဇင်ဘာ ၁၊ ၂၀၂၄
ထိုင်း-မြန်မာနယ်စပ်၊ ရှမ်းပြည်နယ်အရှေ့ပိုင်း၊ တာချီလိတ်မြို့ရှိ အမှတ်(၁) မြန်မာ-ထိုင်းချစ်ကြည်ရေးတံတား နယ်စပ်ဂိတ်မှာ PV (Passport Visit) ပတ်စပို့စ်နိုင်ငံကူးလက်မှတ်နဲ့ ထိုင်းနိုင်ငံသွားရောက်မယ့်သူတွေကို နိုဝင်ဘာလ နောက်ဆုံးပါတ်ကစတင်ပြီး ယာယီပိတ်ပင်ထားတယ်လို့ ဒေသတွင်းသတင်းရင်းမြစ်တွေထံကနေ သိရပါတယ်။
တာချီလိတ်မြို့နဲ့ ထိုင်းနိုင်ငံ၊ မယ်ဆိုင်မြို့ကို ဆက်သွယ်ထားတဲ့ ချစ်ကြည်ရေးတံတား (၁) နယ်စပ်ဂိတ်မှာ PV နိုင်ငံကူးလက်မှတ် ကိုင်ဆောင်သူတွေကို စစ်ဆေးမှုတွေတင်းကြပ်ပြီး အထက်လူကြီး အမိန့်ကြောင့်ဟုဆိုကာ ယာယီပိတ်ပင်လိုက်တာဖြစ်တယ်လို့ ဆိုပါတယ်။
“အရင်တုန်းကတော့ ဂိတ်မှာ ကြားလူကတဆင့် ပိုက်ဆံပေးပြီး ညှိနှိုင်းသွားလို့ရတယ်။ အခုက မရတော့ဘူး။ အကြောင်းအရင်းသေသေချာချာလည်း မသိရပဲ အထက်လူကြီးအမိန့်ကြောင့် သွားလို့မရသေးဘူးဆိုပြီး လှည့်ပြန်ခိုင်းတယ်။ ဘယ်တော့သွားလို့ရမလဲမေးတော့ သူတို့လည်း သေချာမသိသေးဘူးလို့ ပြောတယ်။ ဆေးသွားကုမယ့်သူတွေကိုလည်း ဆေးရုံနဲ့ အုပ်ချုပ်ရေးပိုင်းက ထောက်ခံစာ အပြည့်အစုံပါမှ သွားခွင့်ပေးတာ။ သူတို့နဲ့ နီးစပ်တဲ့ ပိုက်ဆံရှိတဲ့လူတွေ၊ လူကြီးသားသမီးတွေတော့ သွားလို့ ရနေတာပဲ”လို့ သတင်းရင်းမြစ်တယောက်က VOMကို ပြောပါတယ်။
အဲဒီချစ်ကြည်ရေးတံတားကနေ PV နိုင်ငံကူးလက်မှတ်နဲ့ ထိုင်းနိုင်ငံသွားရောက်ကာ အလည်အပတ် ဗီဇာသက်တမ်းကုန်ဆုံးပါက မြန်မာနိုင်ငံဖက်ကို ပြန်မလာတော့ဘဲ ထိုင်းနိုင်ငံမှာ တရားမဝင်နေထိုင်ပြီး အလုပ်လုပ်ကိုင်သူများပြားလာတာကြောင့် အခုလိုပိတ်ပင်တာဖြစ်နိုင်တယ်လို့ ဒေသခံတွေက ယူဆနေကြပါတယ်။
ပြီးခဲ့တဲ့ဩဂုတ်လမှ စတင်ပြီး ရန်ကုန် အပြည်ပြည်ဆိုင်ရာ လေဆိပ်မှာ PV နိုင်ငံကူးလက်မှတ်နဲ့ ပြည်ပထွက်ခွာသူတွေကို တင်းကြပ်စစ်ဆေးခဲ့ပြီး ပြည်ပထွက်ခွင့်မပြုမှု များပြားလာတာကြောင့် ထိုင်း-မြန်မာနယ်စပ် တာချီလိတ်မြို့ နယ်စပ်ဂိတ်မှတဆင့် ထိုင်းဘက်ကို ဝင်ရောက်မှု ပိုမိုများပြားလာနေတာဖြစ်တယ်လို့လည်း သိရပါတယ်။
ဓာတ်ပုံ-Local
တာချီလိတ်ကနေ PV ပတ်စပို့စ်နဲ့ ထိုင်းနိုင်ငံသွားမယ့်သူတွေကို ယာယီပိတ်ပင်
