ဇန်နဝါရီ ၂၈ – ၂ဝ၂၅
KKO(VOM)
မြန်မာစာပေပညာရှိအဖြစ် ထင်ရှားကျော် ကြားတဲ့ မြန်မာစာပေ လောကမှာ ထင်ရှားတဲ့ ပညာရှင်စာရေးဆရာကြီး မောင်ခင်မင်(ဓနုဖြူ)ဟာ ဇန်နဝါရီ ၂၇ ရက်၊ ညသန်းခေါင်ယံကျော် ၁၂ နာရီခွဲအချိန်မှာ ကွယ်လွန်သွားခဲ့ပြီဖြစ်တယ်လို့ ဆရာကြီးရဲ့ကျန်ရစ်သူ မိသားစုဝင်တွေက အသိပေးပြောကြားထားပါတယ်။
မြန်မာစာပေပညာရှင် ဆရာကြီးမောင်ခင်မင်(ဓနုဖြူ)ရုတ်တရက်ကွယ်လွန်သွားခဲ့ပြီဖြစ်ကြောင်းကို သမီးဖြစ်သူ မသူသူနွယ်အေးက ပြောပါတယ်။ ဆရာကြီးမောင်ခင်မင်(ဓနုဖြူ)ဟာ ရန်ကုန်တက္ကသိုလ် မြန်မာစာဌာနရဲ့ အငြိမ်းစား မြန်မာစာပါမောက္ခ တယောက်ဖြစ်သလို မြန်မာစာပေ လောကရဲ့ထင်ရှားတဲ့ စာရေး ဆရာကြီး တယောက်ဖြစ်ပါတယ်။
ဆရာကြီးရဲ့အမည်အရင်းမှာ ဒေါက်တာခင်အေးဖြစ်ပြီး ဆရာကြီးမောင်ခင်မင် (ဓနုဖြူ)က်ို ၂.၁.၁၉၄၂ ခုနှစ်မှာ ဧရာဝတီတိုင်း ဒေသကြီး၊ဓနုဖြူမြို့နယ်အတွင်းမှာ မွေးဖွားခဲ့တာဖြစ်ပါတယ်။ယနေ့ကွယ်လွန်ချိန်မှာတော့ ဆရာကြီးမောင်ခင်မင် (ဓနုဖြူ)ဟာ အသက် (၈၃)နှစ်ရှိပြီ ဖြစ်တယ်လို့ သိရပါတယ်။
မြန်မာစာပေပညာရှင် ဆရာကြီး မောင်ခင်မင် (ဓနုဖြူ)ကွယ်လွန်သွားခဲ့ခြင်းနဲ့ ပတ်သက်လို့အမျိုးသားစာပေ တသက်တာဆုရ စာရေး ဆရာကြီး ကိုလေး(အင်းဝဂုဏ်ရည်)ကလည်း VOM သတင်းဌာနကို အခုလိုဝမ်းနည်းစကား ပြောကြားခဲ့ပါတယ်။
“ဆုံးတာက ဆုံးတာပေါ့လေ၊ကွယ်လွန်တာက ကွယ်လွန်တာပေါ့၊သို့သော် ဆရာဇော်ဂျီလောက် အသက်ရှည်စေချင်တာ ကျွန်တော်တို့ မြန်မာစာပေလောကအတွက်တော့ အကြီးအကျယ်ဆုံးရှုံးတာပါပဲဗျာ၊ကျွန်တော်လည်း ဘယ်လိုမှကို ယူကျုံးမရ ဝမ်းနည်းရပါတယ်လို့ ဒါပဲပြောချင်ပါတယ်” လို့ ဆရာကြီး ကိုလေး(အင်းဝဂုဏ်ရည်)က ပြောပါတယ်။
ဒါအပြင် ယနေ့ခေတ်ကာလမှာ မြန်မာစာပေကျရှုံးနေရပြီး ကြာရင်မြန်မာစာ ပျောက်မှာကိုတောင်ကြောက်နေရတယ်လို့ ဆရာကြီး ကိုလေး(အင်းဝဂုဏ်ရည်)က အခုလို ဆက်ပြီး မှတ်ချက်ပြု ပြောကြားခဲ့ပါတယ်။
“အခုကျွန်တော်တို့ဖြစ်နေတာက မြန်မာစာပေက အောက်တန်းကျသွားပြီဗျာ့၊အခုပိုက်ဆံ ယူပြီး ဖွင့်တဲ့ကျောင်းတွေက အင်္ဂလိပ်စာတို့ နိုင်ငံခြားဘာသာစာတွေပေါ့လေ၊အဲဒါကိုပဲ အလေးပြုသင်ကြားနေကြတယ်။မြန်မာစာကိုသေအောင် သတ်ပုံမမှန်အောင်ဖျက်နေကြတယ်။ ဘာဖြစ်လို့တုန်းဆိုတော့ မြန်မာစာက လူတောထဲမတိုးဘူးဆိုပြီးတော့ ကျွန်တော်တို့ အနှိမ်ခံရတာပေါ့ဗျာ။လူတောမတိုးဘူး၊နိုင်ငံ ခြားသွားရင် မြန်မာစာနဲ့စကားပြောလို့မရဘူး၊ ဆက်သွယ်လို့မရဘူး။ဘာဘူး၊ညာဘူးပေါ့ဗျာ၊အခုက နိုင်ငံခြားသွားချင်တဲ့သူကများတာကိုး။ကြာရင်မြန်မာစာပျောက်မှာတောင် ကြောက်ရတယ်။ဆရာကြီး မောင်ခင်မင်တို့ ဦးဆောင်ပြီးတော့ မြန်မာစာကို ထွေးထွေးပိုက်ပိုက် ယုယုယယ နဲ့လုပ်ကြတယ်။အခုလို ဆရာကြီးမရှိတဲ့အခါကျ ဝမ်းနည်းတာပေါ့။ကျွန်တော်တို့ မြန်မာစာက တိုင်းငယ်၊ပြည်ငယ်လေးမို့ ကမ္ဘာအနှံ့ဝင်မဆံ့လို့ အောက်တန်းကျရတာပါ၊တကယ်ကျတော့ ကျွန်တော်တို့ မြန်မာစာကတကယ်ကောင်းတာပဲ၊သူ့စနစ်နဲ့သူ ရှိပါတယ်။ဒီလိုမြန်မာစာပေအနှိမ်ခံရတဲ့ဘဝကြီးမှာ ဆရာဆုံးသွားတာ အင်မတန်ဝမ်းနည်းစရာကောင်းပါတယ်”လို့ ဆရာကြီး ကိုလေး(အင်းဝဂုဏ်ရည်)က ဆက်လက်မှတ်ချက်ပြု ပြောပါတယ်။
ကွယ်လွန်သူ ဆရာကြီးမောင်ခင်မင်(ဓနုဖြူ) ဟာ မြန်မာစာပေလောကကိုအကျိုးပြုတဲ့ မြန်မာစာပေနဲ့ ပတ်သက်တဲ့ ထင်ရှားတဲ့ စာအုပ်ပေါင်းများစွာကို ရေးသားပြုစု ထုတ်ဝေခဲ့သူလည်းဖြစ်ပါတယ်။
ဆရာကြီး မောင်ခင်မင်(ဓနုဖြူ)ဟာ ၂ဝ၁၃ ခုနှစ်မှာ တသက်တာအမျိုးသားစာပေဆု၊ စာပေဗိမာန်စာပေဆုတွေ အပါအဝင် ရန်ကုန်တက္ကသိုလ်ကနေ ပေးအပ်ချီးမြှင့်တဲ့ဂုဏ်ထူး ဆောင် စာပေပါရဂူဘွဲ့ တွေကို ရရှိထားတဲ့ မြန်မာစာပေ ပညာရှင်တယောက်ဖြစ်ပါတယ်။
မြန်မာစာပေပညာရှင် ဆရာကြီး မောင်ခင်မင်(ဓနုဖြူ)ကွယ်လွန်သွားခဲ့ခြင်းနဲ့ ပတ်သက်လို့ လူငယ်စာရေးဆရာ၊ ကဗျာ ဆရာ မြင့်မြတ်အောင်မြင်ကလည်း အခုလို ဝမ်းနည်းစကားပြောကြားခဲ့ပါတယ်။
“ဆရာကြီးကွယ်လွန်သွားတာဟာ မြန်မာစာပေလောကနဲ့ ပတ်သက်ရင် တကယ်ကိုတန်ဖိုးရှိတဲ့ ဆရာကြီးတယောက်ဆုံးရှုံးသွားရတဲ့ အတွက် အလွန်ကိုစိတ်မကောင်းဖြစ်မိပါတယ်။ဆရာကြီးက မြန်မာစာပေကို တစိုက်မတ်မတ်ရေးသားခဲ့သူလည်းဖြစ်ပါတယ်။သတ်ပုံဝေါဟာရတွေကအစ မြန်မာစာပေနဲ့ ပတ်သက်ပြီး သူဆောင်ရွက်ခဲ့တာတွေ တော်တော်များပါတယ်။မြန်မာစာပေလောကအတွက် တကယ်ကိုအရေးကြီးတဲ့ တန်ဖိုးရှိတဲ့ စာရေးဆရာကြီးပါ။ဆရာကြီးရေးသား ပြုစုခဲ့တဲ့ သတ်ပုံကျမ်းနဲ့ပဲ စာပေတိုက်အများစုက စာပေသမိုင်းနဲ့ ပတ်သက်လို့ ဆောင်ရွက်နေကြသူတွေကများပါတယ်။ဆရာကြီးရဲ့သတ်ပုံဝေါဟာတွေကို ပြန်လေ့လာပြီးတော့မှ ကျွန်တော်တို့တွေလည်းရေးသားနေရတာဖြစ်ပါတယ်။ဆရာကြီး ဆုံးပါးသွားတာဟာ မြန်မာစာပေအတွက် အလွန်ဝမ်းနည်းစရာပါ”လို့ သူ က ပြောပါတယ်။
Photo – CJ
ပုံစာ – သက်ကြီးပူဇော်ပွဲ အခမ်းအနားတခုမှာ တွေ့မြင်ရတဲ့ ကွယ်လွန်သူ မြန်မာစာပေပညာရှင် ဆရာကြီးမောင်ခင်မင်(ဓနုဖြူ)။
