မတ် ၁၈-၂၀၂၆
MT(VOM)
ဒန်နီရယ် ဘုရှ် -ဝါရှင်တန်ပို့စ်
ပြီးခဲ့တဲ့ရက်ပိုင်းက သမ္မတ ဒေါ်နယ်ထရမ့်ဟာ ဟော်မုဇ် ရေလက်ကြား ပြန်ဖွင့်နိုင်ဖို့အတွက် အကူအညီတောင်းရာမှာ နေတိုးမဟာမိတ်တွေကို ခြိမ်းခြောက်ပြောဆိုခဲ့ပါတယ်။
သူ့ရဲ့ ကြိုးပမ်းမှုက မအောင်မြင်ခဲ့ပေမဲ့ ထရမ့်ကတော့ လေသံကို လျှော့မသွားဘဲ အီရန်စစ်ပွဲကြောင့် မတည်မငြိမ်ဖြစ်နေတဲ့ ရေနံနဲ့ သဘာဝဓာတ်ငွေ့ဈေးကွက်ကို ထိန်းချုပ်နိုင်ဖို့ နည်းလမ်းရှာရင်း လေသံကို ပိုပြီး တင်းမာအောင် လုပ်လာခဲ့တာပါ။
အိမ်ဖြူတော်က အOval Office မှာ ပြောကြားခဲ့တဲ့ မိန့်ခွန်းမှာတော့ ထရမ့်က နေတိုးအဖွဲ့အပေါ် သူ့ရဲ့ စိတ်ပျက်မှုကို ထပ်ပြောခဲ့ပါတယ်။ ဟော်မုဇ် ရေလက်ကြားကို လုံခြုံအောင် ကူညီဖို့ ငြင်းဆန်နေတဲ့ အဖွဲ့ဝင်နိုင်ငံတွေဟာ “မိုက်မဲတဲ့ အမှားမျိုး လုပ်နေကြတာ” လို့ သူက ဆိုပါတယ်။
ပြီးခဲ့တဲ့လက အမေရိကန်-အစ္စရေးနဲ့ အီရန်တို့ စစ်ပွဲစတင်ကတည်းက အီရန်ဟာ အဲ့ဒီရေလမ်းကြောင်းမှာရှိတဲ့ ကုန်သွယ်ရေးသင်္ဘောတွေကို ပစ်မှတ်ထား တိုက်ခိုက်ခဲ့တာကြောင့် ရေနံတင်ပို့မှုတွေဟာ ရပ်တန့်လုနီးပါး ဖြစ်နေတာပါ။
ထရမ့်ဟာ ပြင်သစ်သမ္မတ အီမန်နျူရယ် မက်ခရွန်နဲ့ ဗြိတိန်ဝန်ကြီးချုပ် ကီယာ စတာမာ တို့ကို အထူးတလည် နာမည်တပ် ဝေဖန်ခဲ့ပါတယ်။ ဗြိတိန်ခေါင်းဆောင်ဟာ “ဝင်စတန် ချာချီလို လူမျိုးမဟုတ်ဘူး” လို့ သူက ပြောခဲ့ပြီး ဒါဟာ ပြီးခဲ့တဲ့ အပတ်တွေအတွင်း သူ အကြိမ်ကြိမ် သုံးနှုန်းခဲ့တဲ့ စကားလည်း ဖြစ်ပါတယ်။
အခုလို တိုက်ခိုက်ပြောဆိုတာတွေက အီရန်ကိစ္စမှာ ထရမ့်လိုအပ်နေတဲ့ အကူအညီတွေရဖို့ တကယ်ပဲ အထောက်အကူ ဖြစ်ပါ့မလားဆိုတာကတော့ မေးခွန်းထုတ်စရာပါ။ ဒီဗျူဟာက ရလဒ်ကောင်းမထွက်ဘဲ မဟာမိတ်တွေကို ပိုဝေးသွားစေနိုင်သလို၊ အီရန်နဲ့စစ်ပွဲမှာ အမေရိကန်နဲ့ အစ္စရေးတို့ နှစ်နိုင်ငံတည်း သီးခြားဖြစ်သွားအောင် တွန်းပို့သလို ဖြစ်နေပါတယ်။
အခုထိတော့ ထရမ့်ဟာ ဒီစစ်ပွဲအတွက် နိုင်ငံတကာရဲ့ ထောက်ခံမှုရအောင် သိပ်ပြီး ကြိုးစားတာမျိုး မရှိသေးသလို၊ မဟာမိတ်တွေဘက်ကလည်း ဒီစစ်ပွဲထဲမှာ မပါဝင်ချင်ဘူးဆိုတာကို ရှင်းရှင်းလင်းလင်း ပြသထားပါတယ်။
ဒါပေမဲ့ ထရမ့်ကတော့ သူတို့အနေနဲ့ နေတိုးရဲ့ အကူအညီ မလိုဘူးလို့ အင်္ဂါနေ့မှာ အခိုင်အမာ ပြောခဲ့ပါတယ်။ “ကျွန်တော်တို့ ဘယ်သူ့အကူအညီမှ မလိုဘူး” လို့ သူက ဆိုပါတယ်။ တကယ်လို့ သူက နေတိုးမဟာမိတ်တွေကို အခုလိုပဲ ဆက်ပြီး ဝေဖန်နေမယ်ဆိုရင်တော့ တကယ်လည်း အကူအညီ ရနိုင်မှာ မဟုတ်ပါဘူး။
BBC World Service
