ဩဂုတ် ၂၉ ၊ ၂၀၂၆
GG (VOM)
မော်လမြိုင်မြို့ ၊ မရမ်းကုန်းရပ်ကွက် ၊ ကမ်းနားလမ်းက ကိုကို နှင့် ညီညီလျှပ်စစ်ပစ္စည်းဆိုင်ကို ဓားပြတိုက်မှုနဲ့ပတ်သက်ပြီး ကျူးလွန်သူတယောက်ကို ဖမ်းဆီးရမိထားတယ်လို့ ရဲတပ်ဖွဲ့နဲ့နီးစပ်သူဆီက သိရပါတယ်။
ကျူးလွန်သူအမျိုးသားကို ဓားပြတိုက်စဥ်က အသုံးပြုခဲ့တဲ့ကားတစီးနဲ့အတူ ပေါင်မြို့နယ်ထဲက တနေရာမှာ ရဲတပ်ဖွဲ့က ဖမ်းဆီးရမိခဲ့တာ ဖြစ်ပါတယ်။
” ဖမ်းမိပါပြီ ။ ကား တစီး နဲ့ နောက်တစီး နဲ့ ကျန်တဲ့သူတွေ လိုက်နေတုန်း။ စစ်ဆေးရေး လုပ်နေတုန်းပါ။ ရဲတွေ စစ်ဆေးပြီး ကွင်းဆက်တရားခံတွေ ဆက်လိုက်နေတုန်းမို့ ဘာမှမသိရသေးဘူး။ ” လို့ ရဲတပ်ဖွဲ့နဲ့ နီးစပ်သူက ပြောပါတယ်။
ဓားပြတိုက်မှုက မနေ့က ဩဂုတ် ၂၈ ရက်နေ့မနက် ၄ နာရီလောက်မှာ မျက်နှာဖုံးအုပ်ထားတဲ့ အမျိုးသားသုံးယောက်က ကားနှစ်စီးနဲ့ရောက်လာပြီး သေနတ်ပြခြိမ်းခြောက် ဓားပြတိုက်ခဲ့တာ ဖြစ်ပါတယ်။
ဓားပြတိုက်မှုမှာ သိန်းပေါင်း ငါးသောင်းကျော်တန်ဖိုးရှိတဲ့ ရွှေထည်ပစ္စည်း ၊စိန်ထည်ပစ္စည်း ၊ ပလက်တီနမ် ပစ္စည်း တွေထည့်ထားတဲ့မီးခံသေတ္တာကိုယူဆောင်သွားတာ ဖြစ် ပါတယ်။
အဲဒီ ဓားပြတိုက်သူတွေဟာ ကိုကိုညီညီလျှပ်စစ်ပစ္စည်းဆိုင်ဘေးကပ်ရက်ရှိ ဆောက်လက်စ အဆောက်အဦကနေတဆင့် ဝင်ရောက်ကာ အိမ်အတွင်းရှိ အမျိုးသမီးသုံးယောက်ကို ကြိုးတုပ်ပြီး မီးခံသေတ္တာနဲ့ စာရွက်စာတမ်း ၊ငွေသားတချို့ကိုပါ ယူသွားတာ ဖြစ်ပါတယ်။
ဓါးပြတိုက်သွားတဲ့ပစ္စည်းတွေ ပြန်ရမရတော့ အသေးစိပ်မသိရသေးပါဘူး။
လက်ရှိမှာ ဓားပြတိုက်မှုကျူးလွန်သူတွေကို သက်ဆိုင်ရာမြို့နယ် ရဲစခန်းက ရာဇသတ်ကြီး ဥပဒေ ပုဒ်မ ၃၉၂ နဲ့ အမှုဖွင့်ပြီး တရားခံအားလုံးကို ဖမ်းဆီးရမိရေး လုပ်နေပါတယ် ။
ဓာတ်ပုံ – CJ
