သုံးဆယ်၊ ဇွန် ၉ -၂၀၁၉
မိုးယံ(VOM)
ပဲခူးတိုင်း သာယာဝတီခရိုင် သုံးဆယ်မြို့နယ်မှာ ယောက်ျားဖြစ်သူက မိန်းမကို လူမှုရေးဖောက်ပြန်တယ် စွပ်စွဲပြီး ဝါးတုတ်နဲ့ အချက်ပေါင်းများစွာ ရိုက်ခဲ့တဲ့အတွက် အဲဒီအမျိုးသမီး ဒီနေ့မှာ သေဆုံးသွားတယ်လို့ သာယာဝတီ မြို့မရဲစခန်း ကသိရပါတယ်။
တံငါလုပ်ငန်းလုပ်ကိုင်သူ ဦးဇော်မင်းထက်ဟာ ဇနီးဖြစ်သူကို သုံးဆယ်မြို့နယ် ကျောက်အိုင်ကျေးရွာအုပ်စု၊ သုံးဆယ်ဆည်၊ ငါးရွေးချောင်းနားမှာ မနေ့က ရိုက်သတ်ခဲ့တာဖြစ်ပြီး ဒီနေ့ နေ့လည် ၂ နာရီ လောက်မှာတော့ သေဆုံးသွားခဲ့တာပါ။
“လင်မယားနှစ်ယောက်ရန်ဖြစ်ကြတာပဲ၊ မိန်းမက လင်ငယ်နေတယ်ဆိုပြီး ဝါးတုတ်နဲ့ မနေ့က တစ်နေ့လုံးရိုက်တာ။ တစ်ကိုယ်လုံး ဒဏ်ရာတွေချည်းပဲတဲ့။” လို့ မျက်မြင်တွေပြောပြချက်ကို လှည်းလမ်းကူးကျေးရွာအုပ်စု အုပ်ချုပ်ရေးမှူး ဦးမျိုးမြင့်ကျော်က ပြောပါတယ်။
သုံးဆယ်ဆည်ဘောင်မှာ ငါးရှာ၊ ဖားရှာ စီးပွားရှာစားကြတဲ့ အိမ်တွေဟာ တစ်အိမ်နှစ်အိမ် ပျံကျနေထိုင်ကြပြီး မိုးရေကြီးရင် ရွှေ့ပြောင်းနေထိုင်ကြပါတယ်။ သေဆုံးသူမှာ ၆ နှစ်၊ ၇ နှစ်အရွယ် ကလေးနှစ်ယောက်ကျန်ခဲ့တယ်လို့ သိရပါတယ်။
သေဆုံးသူကို ဆေးရုံသို့ ပို့ဆောင်ခဲ့ပြီး ရဲလုပ်ငန်းများ ဆက်လက် လုပ်ဆောင်နေတယ်လို့ သာယာဝတီ မြို့မရဲစခန်း တာဝန်ရှိသူက ပြောပါတယ်။
#voiceofmyanmar # လူမှုရေး ဖောက်ပြန်တယ်စွပ်စွဲပြီးယောက်ျားဖြစ်သူကမိန်းမကို ရိုက်သတ် #ပဲခူး #သာယာဝတီ # သုံးဆယ်
