ဥက္ကံ၊ ဇွန် ၆ – ၂၀၁၉
မိုးယံ (VOM)
ရန်ကုန်တိုင်း တိုက်ကြီးမြို့နယ် ကျွဲဘုတ်ကျေးရွာအုပ်စု မာဂရီ သစ်တောကြိုးဝိုင်း ညောင်ခြေကွင်းမှာ ဇွန် ၆ ရက်က တောဆင်ရိုင်း နင်းသတ်လို့ သားအမိနှစ်ယောက် သေဆုံးခဲ့ပါတယ်။
“သေဆုံးသွားတဲ့ မကြင်လှ ယောက်ျား ကိုဇော်ဝင်းက တောထဲကို ဝါးခုတ်သွားနေတယ်။ မနက်စောစော တောဆင်ရိုင်းက ဝင်ပြီးတဲကို တရှိန်ထိုးဖျက်ဆီးပြီး သားအမိနှစ်ယောက်စလုံး နင်းပစ်တာ။ တောဆင်က အမြင့် ရှစ်ပေ၊ အလျား ခုနှစ်ပေလောက်ရှိတယ်လို့ မျက်မြင်ရွာသားတွေက ပြောတယ်။” လို့ ကျွဲဘုတ်ကျေးရွာ အုပ်စုအုပ်ချပ်ရေးမှူး ဦးအောင်တင်ထွေးက ပြောပါတယ်။
တောဆင်ရိုင်းနင်းလို့ မနော်ကြင်လှ( ၂၆ နှစ်) မှာ ညာဖက်ဒူးခေါင်းကျိုးကြေ၊ ဝမ်းဗိုက်ညိုမဲဒဏ်ရာများနဲ့ နေရာတင်သေဆုံးခဲ့ပြီး သားဖြစ်သူ ထွန်းလင်းဇော် (၂ နှစ် )မှာ ဗိုက်ပွင့်ထွက်၊ လည်ချောင်းပွန်းပဲ့ ဒဏ်ရာတွေနဲ့ သေဆုံးခဲ့တယ်လို့ ဥက္ကံ နယ်မြေရဲစခန်းက သိရပါတယ်။
ဒီကိစ္စနဲ့ပတ်သက်ပြီး သေမှုသေခင်းပုဒ်မနဲ့ အမှုဖွင့်ထားပြီး ဥက္ကံတိုက်နယ်ဆေးရုံမှာ စစ်ဆေးနေတယ်လို့ ဥက္ကံမြို့ နယ်မြေရဲစခန်းက အမှုစစ် ဒုရဲအုပ်မင်းမင်းလတ်က ပြောပါတယ်။
အဲဒီနယ်ပတ်ဝန်းကျင်မှာ တောဆင်ရိုင်းတွေ အုပ်စုလိုက် အစာရှာထွက်လေ့ရှိပြီး မြိုင်ဟေဝန် ဆင်စခန်းက ဆင်တွေနဲ့ ခြောက်လှန့် မောင်းထုတ်ရလေ့ရှိပြီး တခါတလေမှာ ရွာထဲအထိဝင်ရောက် အစာရှာလေ့ရှိကြောင်း ဒေသခံတွေက ပြောဆိုပါတယ်။
#voiceofmyanmar #တောဆင်ရိုင်းနင်းသတ်လို့ သားအမိနှစ်ယောက်သေ # ဥက္ကံမြို့ # ကျွဲဘုတ်ကျေးရွာ