မြတ်လေးစစ်ဘေးရှောင်စခန်းမှာ ရိက္ခာပြတ်၊ မိသားစု၂၀လောက်ထမင်းငတ်နေ

ပုဏ္ဏားကျွန်း၊စက်တင်ဘာ၁၇-၂၀၁၉

ခိုင်လင်းစံ(VOM)

 

 

ရခိုင်ပြည်နယ်အတွင်းကစစ်ဘေးရှောင်စခန်းတစ်ခုဖြစ်တဲ့ပုဏ္ဏားကျွန်းမြို့နယ်အတွင်းကအထက်မြတ်လေးစစ်ဘေးဒုက္ခသည်စခန်းမှာရိက္ခာပြတ်တောက်နေပြီးမိသားစု၂၀လောက်ထမင်းငတ်နေတယ်လို့သတင်းရရှိပါတယ်။

 

 

အဲ့ဒီစခန်းဟာအရပ်ဖက်လူမှုအဖွဲ့အစည်းအတွေရဲ့ထောက်ပံ့ကူညီပေးမှုတွေနဲ့အဓိကရပ်တည်နေတာဖြစ်ပြီးအကူအညီပေးမယ့်အဖွဲ့အစည်းတွေမလာရောက်တော့တဲ့အတွက်အခုလဒုတိယအပတ်ကနေရိက္ခာပြတ်တောက်သွားခဲ့တာဖြစ်တယ်လို့စခန်းကော်မတီကပြောပါတယ်။

 

 

“ကျွန်တော်တို့စခန်းမှာရိက္ခာပြတ်နေပါပြီ။ပြီးခဲ့တဲ့ရက်ပိုင်းတွေကဆိုရင်ဂိုဒေါင်ထဲမှာဆန်လက်ကျန်လုံးဝမရှိလောက်အောင်ဖြစ်သွားပါတယ်။စခန်းမှာရိက္ခာဖြန့်ဝေပေးဖို့ရက်တွေကျော်နေပြီ။မပေးနိုင်သေးဘူး။မိသားစု၂၀လောက်ထမင်းချက်ဖို့ဆန်မရှိဘူး။သူများဆီကနေချေးငှားပြီးတော့စားနေရတယ်။ဖြစ်သလိုနေကြရတာပေါ့။”လို့စခန်းကော်မတီခေါင်းဆောင်တစ်ဦးဖြစ်တဲ့ဦးအောင်လှရွှေကပြောပါတယ်။

 

အထက်မြတ်လေးဒုက္ခသည်စခန်းမှာအိမ်ထောင်စုပေါင်း၁၅၇စု၊လူဦးရေ၇၃၀ကျော်နေထိုင်နေကြတာဖြစ်ပြီးအဲ့ဒီလူတွေအတွက်အစိုးရကထောက်ပံ့ပေးထားတယ်လို့ရခိုင်ပြည်နယ်အစိုးရအဖွဲ့ပြောခွင့်ရသူစည်ပင်သာယာရေးဝန်ကြီးဦးဝင်းမြင့်ကပြောပါတယ်။

 

ဒါ့အပြင်ရခိုင်ပြည်နယ်အတွင်းမှာစစ်ဘေးရှောင်ဒုက္ခသည်စခန်းပေါင်း၁၀၀ကျော်ရှိနေပြီးအဲ့ဒီစခန်းတွေကိုနိုင်ငံတကာအဖွဲ့အစည်းတွေဖြစ်တဲ့WFP နဲ့ICRC တို့ကိုရိက္ခာထောက်ပံ့ကူညီခွင့်ပေးထားရာကနေအခုလကစတင်ပြီးဆန်ထောက်ပံ့ပေးမှုတွေကိုအစိုးရရဲ့ညွှန်ကြားချက်အရရပ်တန့်တော့မှာဖြစ်တယ်လို့ဆိုပါတယ်။

 

“ဒုက္ခသည်စခန်းတွေကိုကျွန်တော်တို့အစိုးရလည်းထောက်ပံ့ပေးနေတယ်။သူတို့နိုင်ငံတကာအဖွဲ့အစည်းတွေကလည်းထောက်ပံ့ပေးတယ်ဆိုတော့နှစ်ခါပေးမဖြစ်ရအောင်အတွက်ဖြတ်ခိုင်းတာဖြစ်နိုင်ပါတယ်။”လို့ဦးဝင်းမြင့်ကပြောပါတယ်။

 

ဒုက္ခသည်းစခန်းတွေကိုအစိုးရ၊နိုင်ငံတကာအဖွဲ့အစည်းတွေအပြင်အရပ်ဖက်လူမှုအဖွဲ့အစည်းတွေနဲ့အလှူရှင်တွေကထောက်ပံ့ကူညီပေးနေတဲ့အတွက်ရိက္ခာဖုံလုံနေတာဖြစ်ပြီးအခုနောက်ပိုင်းမှာတော့အရပ်ဖက်အဖွဲ့အစည်းတွေရဲ့ထောက်ပံ့ကူညီမှုတွေကိုတားဆီးထားတာကြောင့်ဒုက္ခသည်စခန်းတွေမှာအခုလိုရိက္ခာပြတ်လပ်မှုတွေနဲ့ရင်ဆိုင်နေကြရတာဖြစ်ပါတယ်။

အထက်မြတ်လေးဒုက္ခသည်စခန်းမှာရှိတဲ့ဒုက္ခသည်တွေဟာကျောက်တော်မြို့နယ်ယိုးချောင်းအထက်ပိုင်းကျေးရွာတွေကထွက်ပြေးလာခဲ့ကြတဲ့မြိုနဲ့ဒိုင်းနက်လူမျိုးတွေဖြစ်ကြပြီးအဲ့ဒီစခန်းကိုအစိုးရဲ့ထောက်ပံ့ကူညီပေးမှုနှစ်ခါသာရှိခဲ့တယ်လို့စခန်းတာဝန်ရှိသူတွေရဲ့ပြောဆိုချက်အရသိရပါတယ်။

 

#vocieofmyanamar #ရခိုင်ပြည်နယ် #ဒုက္ခသည်စခန်း #ရိက္ခာပြတ် #မြတ်လေး

 

 

 

Related posts

Leave a Comment

VOM News

FREE
VIEW