Month: April 2023

ဘန်ကောက်၊ ဧပြီ-၁-၂၀၂၃ မျိုးဆက်(VOM) ထိုင်းနိုင်ငံ မြို့တော်ဘန်ကောက်အနီးလောင်ကျွမ်းနေတဲ့တောမီးကို ငြှိမ်းသတ်နိုင်ရေးအတွက် ထိုင်းအာဏာပိုင်တွေက အရှိန်မြှင့်လုပ်ဆောင်နေပြီး စစ်တပ်နဲ့မီးသတ် ရာပေါင်းများစွာ ငြှိမ်းသတ်နေရပါတယ်။ တောမီးဟာလက်ရှိမှာ တစတုရန်းကီလိုမီတာထိ လောင်ကျွမ်းခဲ့ပြီဖြစ်ပါတယ်။ ထိုင်းနိုင်ငံအလယ်ပိုင်းနဲ့အရှေ့ပိုင်းတွေမှာ ယခုနှစ်အတွင်းတောမီးလောင်ကျွမ်းမှုဟာ ပြီးခဲ့တဲ့နှစ်ကထက် နှစ်ဆတိုးလာနေတယ်လို့ သဘာ၀ပတ်၀န်းကျင်ဆိုင်ရာ တာ၀န်ရှိသူတွေက ပြောပါတယ်။ ဘန်ကောက်ကနေ နှစ်ကီလိုမီတာအကွာမှာရှိတဲ့ နာမည်ကြီးခရီးသွားနေရာဖြစ်တဲ့ ခိုရိုင်အမျိုးသားဥယျာဉ်ကို တောမီးကူးစက်လောင်ကျွမ်းနိုင်ခြေကို တာ၀န်ရှိသူတွေက သတိပေးထားပါတယ်။ အခြေအနေကို ထိန်းချုပ်နိုင်ဖို့ စစ်တပ်အနေနဲ့ ဒေသဆိုင်ရာအေဂျင်စီတွေနဲ့ ပူးပေါင်းလုပ်ဆောင်ဖို့ ၀န်ကြီးချုပ် ပရာယွတ်ချန်အိုချာက အမိန့်ပေးထားပါတယ်။ ထိုင်းနိုင်ငံ နေရာအနှံ့အပြားမှာ ဖြစ်ပွားနေတဲ့တောမီးလောင်ကျွမ်းမှုသည် သစ်ခုတ်ခြင်းနဲ့ မီးရှို့မှုတွေကြောင့်ဖြစ်တယ်လို့ ယူဆရပြီး လေထုအရည်အသွေးညံ့ဖျင်းမှု ပြသနာတွေရှိနေပါတယ်။ နိုင်ငံမြောက်ပိုင်းနဲ့ အရှေ့မြောက်ပိုင်းတို့မှာ လွန်ခဲ့တဲ့လအတွင်း မီးခိုးမြူတွေဖုံးလွှမ်းခဲ့ပြီး လူအများအပြားဟာ အသက်ရှူလမ်းကြောင်းနဲ့ပတ်သက်တဲ့ ကျန်းမာရေးပြသနာတွေ ဖြစ်ပွားခဲ့ပါတယ်။ Ref:NHK Photo:AP/ AFP #voiceofmyanmar #VOM #ဘန်ကောက်

ဝါရှင်တန်၊ ဧပြီ-၁-၂၀၂၁ မျိုးဆက်(VOM) ရိုဟင်ဂျာဒုက္ခသည်တွေကို မြန်မာနိုင်ငံပြန်ပို့မယ့်အစီအစဉ်ကို ဆိုင်းငံ့ထားဖို့ လူ့အခွင့်အရေးစောင့်ကြည့်အဖွဲ့က ဘင်္ဂလားဒေ့ရ်ှကို တိုက်တွန်းလိုက်ပါတယ်။ အခုလို ပြန်ပို့မယ့်အစီအစဉ်ဟာ ဒုက္ခသည်တွေရဲ့အသက်နဲ့ သူတို့ရဲ့လွတ်လပ်မှုကို ဆိုးရွားစွာအန္တရာယ်ဖြစ်စေတယ်လို့ လူ့အခွင့်အရေးစောင့်ကြည့်အဖွဲ့ကပြောပါတယ်။ ဒုက္ခသည်တွေနေရပ်ပြန်ရေးနဲ့ပတ်သက်ပြီး မြန်မာကိုယ်စားလှယ်အဖွဲ့ဟာ ဘင်္ဂလားဒေ့ရ်ှရှိ ဒုက္ခသည်စခန်းကို များကြာခင်က သွားရောက်ခဲ့ပြီးနောက် လူ့အခွင့်အရေးစောင့်ကြည့်အဖွဲ့က အခုလိုတိုက်တွန်းလိုက်တာဖြစ်ပါတယ်။ ရိုဟင်ဂျာဒုက္ခသည်တွေဟာ သူတို့နေရပ်ပြန်ရေး ရှေ့ပြေးအစီအစဉ်ရဲ့တစိတ်တပိုင်းအဖြစ် ပြန်ပို့မယ့်အစီအစဉ်တွေမှာ ဘင်္ဂလားဒေ့ရ်ှအာဏာပိုင်တွေရဲ့ လိမ်လည် လှည့်စားမှု ဒါမှမဟုတ် အခြားနည်းနဲ့ အတင်းအကြပ်ဖိအားပေးတာမျိုးတွေရှိတယ်လို့ လူ့အခွင့်အရေးစောင့်ကြည့်အဖွဲ့ကပြောပါတယ်။ ရခိုင်ပြည်နယ်မှာလက်ရှိဖြစ်နေတဲ့ အခြေအနေတွေအရ ရိုဟင်ဂျာဒုက္ခသည်တွေ မြန်မာနိုင်ငံကို သူတို့သဘောဆန္ဒအလျောက် ဘေးကင်းလုံခြုံပြီး ဂုဏ်သိက္ခာရှိစွာပြန်ဖို့ဆိုတာ မဖြစ်နိုင်ကြောင်း လူ့အခွင့်အရေးစောင့်ကြည့်အဖွဲ့ တောင်အာရှဆိုင်ရာ ညွှန်ကြားရေးမှူး Meenakshi Ganguly ကပြောပါတယ်။ Ref: La Prensa Photo:AFP #voiceofmyanmar #VOM #ဝါရှင်တန်