မေ ၂၁ ၊ ၂၀၂၃
SP (VOM)
စစ်ကိုင်းတိုင်း ၊ ရွှေဘိုခရိုင် ၊ ခင်ဦးမြို့နယ် ၊ ကံသစ်ကျေးရွာမှာ မနေ့ မေ ၂၀ ရက်က လူနေအိမ် တစ်ရာကျော် မီးရှို့ဖျက်ဆီးခံရတယ်လို့ ဒေသခံတွေဆီက သိရပါတယ်။
” ရွာမှာက ၁၉ ရက်ကတည်းက လူမရှိတော့ဘူး ၊ စစ်ကြောင်းလာမယ်ကြားရလို့ ဘေးလွတ်ရာကို တိမ်းရှောင်နေရတာ ၊ ရွာမှာ လူမရှိတဲ့အချိန် မီးရှို့ခံရတာဖြစ်တယ် ၊ ၁၉ ရက်နဲ့ မနေ့ မေ ၂၀ ရက်တွေက ၂ ရက်ဆက်တိုက် ရှို့ခံ လိုက်ရတာဖြစ်တယ် ၊ အိမ်ခြေ ၁၇၀ ကျော် လောင်သွားတယ်လို့ သိရတယ် ၊ ရွာပြန်ရောက်မှ အခြေအနေ အသေးစိပ် သိရမှာ “လို့ ကံသစ်ရွာခံတစ်ယောက်က ပြောပါတယ်။
အဲ့ဒီ ကံသစ်ကျေးရွာက လူနေအိမ်တွေကို ဘယ်အဖွဲ့စည်းက မီးဝင်ရှို့တယ်ဆိုတာ VOM အနေနဲ့ သီးခြားအတည်ပြုနိုင်တာ မရှိသေးပါဘူး။
ဒါ့အပြင် ခင်ဦးမြို့နယ် ၊ ကံသစ်ကျေးရွာမှာ လူနေအိမ်ခြေ ၅၀၀ ခန့်ရှိပြီး ရွာနားဝန်းကျင်မှာ ပစ်ခတ်တိုက်ခိုက်တာတွေ မကြာခဏဖြစ်ပွားတတ်တဲ့အတွက် ရွာမှာရှိတဲ့ အိမ်ထောင်စု မိသားစု ထက်ဝက်ကျော်ဟာ ရွာမှာ နေထိုင်ခြင်း မရှိတော့ဘဲ ဘေးလွတ်ရာကို ပြီးခဲ့တဲ့ နှစ်ကစလို့ ရှောင်တိမ်းနေကြတယ်လို့ ဒေသခံတွေဆီက သိရပါတယ်။
ပြီးခဲ့တဲ့ ၂၀၂၂ နှစ်ကုန်ပိုင်းကလည်း စစ်ကိုင်းတိုင်းထဲက မီးလောင်မှုဖြစ်စဥ်တွေနဲ့ ပတ်သက်လို့ ဒေသခံ ပရဟိတသမားတွေက မှတ်တမ်းပြုစုထားတာနဲ့ ပတ်သက်လို့
“ရေဦးမြို့နယ်မှာ ၊ တင်းတိန်ရံ စျေးကြီး အပါအဝင် အဆောက်အဦပေါင်း ၁၃၄၆ လုံး ၊ ဒီပဲယင်းမြို့နယ်မှာ လူနေအိမ် ၂၈၆၂ လုံး ၊ ဝက်လက်မြို့နယ်မှာ ၁၂၅၅ လုံး ၊ ရွှေဘိုမြို့နယ်မှာ ၃၅၂ လုံး ၊ ကန့်ဘလူမြို့နယ်မှာ ၁၂၆၀ လုံး ၊ ခင်ဦးမြို့နယ်မှာ ၂၁၄၁ လုံး ၊ မြင်းမူမြို့နယ်မှာ ၈၁၇ လုံး ၊ အရာတော်မြို့နယ်မှာ ၉၁၈ လုံး ၊ ပုလဲမြို့နယ်မှာ ၄၆၂ လုံး ၊ မြောင်မြို့နယ်မှာ ၅၁၄ လုံး ၊ ချောင်းဦးမြို့နယ်မှာ ၆၁၈ လုံး ၊ ထီးချိုင့်မြို့နယ်မှာ ၇၁၃ လုံး ၊ အင်းတော်မြို့နယ်မှာ ၂၁၉ လုံး ၊ ကသာမြို့နယ်မှာ ၁၄၄ လုံး ၊ ကလေးမြို့နယ်မှာ ၇၆၂ လုံး ၊ မော်လိုက်မြို့နယ်မှာ ၅၂ လုံး ၊ မုံရွာမြို့နယ်မှာ ၈၉ လုံး ၊ ကနီမြို့နယ်မှာ ၂၁၆ လုံး ၊ မင်းကင်းမြို့နယ်မှာ ၄၁၉ လုံး ၊ ပင်လည်ဘူးမြို့နယ်မှာ ၁၅၂ လုံး ၊ ဗန်းမောက်မြို့နယ်မှာ ၁၆၆ လုံး ၊ ဆားလင်းကြီးမြို့နယ်မှာက ၄၉၆ လုံး ၊ မြို့နယ် ၂၂ မြို့နယ်မှာ ၊ လူနေအိမ် ၂၂၆၂၀ လုံး မီးလောင်ပျက်စီးခဲ့တယ် ၊ အဲ့ဒါ လက်လှမ်းမီသလောက် ကောက်ယူရရှိထားတဲ့ စာရင်းဖြစ်တယ် ၊ မြေပြင်အခြေအနေနဲ့ဆို အနည်းငယ် ကွာဟမှုရှိနိုင်ပြီး ၊ မြေပြင်မှာက ဒီဖြစ်စဥ်တွေထက် ပိုနိုင်တယ် “လို့ ပြောပါတယ်။
အဲ့ဒီ မီးလောင်မှုဖြစ်စဥ်တွေကြောင့် မီးဘေးသင့်ခဲ့ရတဲ့ အိမ်ထောင်စု ၂၅၀၀၀ အထက်မှာ ရှိပြီး မီးဘေးသင့် လူဦရေ အရေအတွက်ဟာ တစ်သိန်းနီးပါးရှိနိုင်တယ်လို့ ဒေသခံတွေဆီက သိရပါတယ်။
#VOM #voiceofmyanmar #ခင်ဦး #ရွာမီးရှို့ခံရမှု
