ZY(V0M)
ဇန်နဝါရီ ၁၈၊ ၂၀၂၅
ရှမ်းပြည်နယ်တောင်ပိုင်း၊ တောင်ကြီးမြို့နယ်ကို လာရောက်တိမ်းရှောင်နေကြတဲ့ ကယားပြည်နယ်က စစ်ဘေးရှောင်တွေဟာ လက်ရှိအချိန်မှာ ဆောင်းရာသီ အအေးဒဏ်တွေကြောင့် အသက်အရွယ်မရွေး ဝမ်းပျက်ဝမ်းလျှောနဲ့ အော့အန်တာတွေ ဖြစ်ပွားနေကြတယ်လို့ စစ်ဘေးရှောင်အရေး ကူညီနေသူတွေ ထံကနေ သိရပါတယ်။
ကယားပြည်နယ်၊ လွိုင်ကော်နဲ့ ဒီးမော့ဆိုမြို့နယ်တွေကနေ တောင်ကြီးမြို့နယ်ကို လာရောက်ခိုလှုံနေတဲ့ စစ်ဘေးရှောင်လူဦးရေ ၄၀၀ ကျော် ကျန်ရှိနေသေးပြီး စစ်ဘေးရှောင်ဦးရေ ၅၀ကျော်ဟာ အခု ဇန်နဝါရီလ၊ ပထမပါတ်ကစတင်ပြီး အအေးဒဏ်တွေကြောင့် အသက်အရွယ်မရွေး ဝမ်းပျက်ဝမ်းလျှောနဲ့ အော့အန်တာတွေ ဖြစ်ပွားနေတယ်လို့ သိရပါတယ်။
“တော်တော်များများကတော့ ပြန်ကုန်ကြပြီ။ အရင်ကဆို လူဦးရေ ၃၀၀၀ကျော်ရှိတာ၊ အခုက ၄၀၀ကျော်ပဲ ကျန်တော့တယ်။ လေက အရမ်းတိုက်ပြီး နှင်းတွေလည်းကျ၊ အရမ်းအေးတဲ့အခါကြတော့ အခုလိုတွေ ဖြစ်နေကြတာ။ စောင်၊ အနွေးထည်တွေမရှိတဲ့အပြင် အမိုးအကာ မလုံခြုံတဲ့နေရာမှာ နေထိုင်ကြရတာလည်း ပါတာပေါ့”လို့ စစ်ဘေးရှောင်အရေး ကူညီနေသူတယောက်က VOMကို ပြောပါတယ်။
ကလေး၊ လူငယ်၊ လူကြီး အသက်အရွယ်မရွေး ဖြစ်ပွားနေပြီး စုစုပေါင်း လူဦးရေ ၅၀ ဝန်းကျင် ဖြစ်ပွားနေသလို ဆေးဝါးနဲ့ ရိက္ခာ မလုံလောက်တဲ့ အခြေအနေနဲ့ ရင်ဆိုင်နေရကာ အဲဒီစစ်ရှောင်တွေ နေထိုင်တဲ့နေရာမှာ ရေရှားပါးမှုနဲ့ ကြုံတွေ့နေတာကြောင့် တကိုယ်သန့်ရှင်းမှု အားနည်းနေကြတယ်လို့လည်း သူက ဆက်ပြောပါတယ်။
ငွေကြေးတတ်နိုင်တဲ့အချို့က ဆေးရုံ ၊ ဆေးခန်းမှာ ဆေးကုသမှုခံယူနိုင်ပေမယ့် ငွေကြေးမရှိလို့ ဆေးခန်းမသွားနိုင်တဲ့ သူတွေကတော့ သဘာဝနည်းဖြစ်တဲ့ နနွင်းမှုန့် နဲ့ ရေနွေး ဖျော်စပ်ပြီး သောက်တာ၊ မြန်မာဆေး (မဟာဖြေဆေး) သောက်တာတွေ ပြုလုပ်ကြပေမယ့် အလုံးစုံပျောက်ကင်းသူ မရှိသေးသလို အကူအညီတွေ လိုအပ်နေဆဲဖြစ်တယ်လို့လည်း သိရပါတယ်။
