ဇန်နဝါရီ ၂၁ – ၂၀၂၅
SN (VOM)
မွန်ပြည်နယ်၊ ရေးမြို့နယ်၊ ကျုံလောင်းရွာဟောင်းအနီး တိုက်ပွဲကြောင့် ကျေးရွာပေါင်း ငါးရွာထက်မနည်း ရွာလုံးကျွတ်နီးပါး စစ်ဘေး တိမ်းရှောင်နေရတယ်လို့ ဒေသခံတွေဆီက သိရပါတယ်။
ကျုံလောင်းရွာဟောင်းအနီးမှာ ပြီးခဲ့တဲ့ ဇန်နဝါရီ ၈ ရက်နေ့ကစပြီး နစကတပ်က နယ်မြေရှင်းလင်းရေး လုပ်လာတဲ့အတွက် ဒေသတွင်း လက်နက်ကိုင်တပ်တွေနဲ့ နှစ်ဖက် ထိတွေ့တိုက်ပွဲတွေ ဖြစ်ပွားခဲ့တာလို့ သိရပါတယ်။
တိုက်ပွဲအတွင်း လေကြောင်းနဲ့ လက်နက်ကြီးပစ်ကူတို့ကြောင့် ကျုံလောင်း၊ ကျောက်မိကျောင်း၊ ဝယ်ပေါင်၊ ဝယ်ဇင်၊ ကျောင်းရွာ စတဲ့ ကျေးရွာတွေက ဒေသခံတွေ ရွာလုံးကျွတ်နီးပါး ဘေးလွတ်ရာကို တိမ်းရှောင်နေရတယ်လို့ ဒေသခံတယောက်က ပြောပါတယ်။
“စစ်ရှောင်အရေအတွက်က ခန့်မှန်းခြေ ထောင်ကျော်လောက်တော့ ရှိမယ်။ အတိအကျတော့ မသိရဘူး။ ရှောင်တာကတော့ ရေးမြို့ပေါ်နဲ့ ဓမ္မပါလကျေးရွာဘက်ကို ရှောင်ကြတာ။ ကျန်ခဲ့တဲ့ ရွာခံတွေကလည်း အပြင်မထွက်ရဲကြဘူး။ ကတုတ်ကျင်းထဲ ပုန်းနေကြရတယ်။ တိုက်ပွဲအတွင်းမှာ လူသေဆုံး၊ ဒဏ်ရာရတာတွေလည်း ရှိတယ်” လို့ သူက ပြောပါတယ်။
လက်ရှိမှာ ရေးမြို့နဲ့ ကုန်သွယ်ရေးလမ်းကြောင်းကို နစကဘက်က ဖြတ်တောက်ထားတာကြောင့် စစ်ဘေးရှောင်နဲ့ ဒေသခံတွေအတွက် စားနပ်ရိက္ခာနဲ့ ဆေးဝါး အကူအညီတွေ လိုအပ်နေတယ်လို့ သိရပါတယ်။
ဒါအပြင် လက်ရှိမှာ တိုက်ပွဲကြောင့် ကျုံလောင်း၊ ကျောက်မိကျောင်း ကျေးရွာတွေရှိ အခြေခံပညာ မူလတန်းကျောင်း နှစ်ကျောင်းနဲ့ ဝယ်ဇင်း၊ ဓမ္မပါလ၊ ဝယ်ပေါင်ကျေးရွာတွေရှိ မွန်အမျိုးသား မူလတန်းကျောင်း သုံးကျောင်းတို့ကို ဇန်နဝါရီ ၁၀ ရက်နေ့ကစပြီး ပိတ်ထားရတယ်လို့ သိရပါတယ်။
“တိုက်ပွဲက ဇန်နဝါရီ ၈ ရက်နေ့ကနေ ၁၉ ရက်နေ့အထိ ၁၀ ရက်ကျော်လောက် ဖြစ်ခဲ့တာ။ အခုကတော့ တိုက်ပွဲငြိမ်နေတယ်လို့ ပြောလို့ရပေမယ့် လက်နက်ကြီးနဲ့ ပစ်ခတ်တာတွေ ရှိနေတော့ ဘယ်သူမှ အပြင်ကို သွားသွားလာလာ မလုပ်ရဲကြဘူး။ ဘာအလုပ်မှလည်း မလုပ်နိုင်ကြတော့ဘူး။ ကလေးတွေလည်း ကျောင်းမတက်ရဲကြတော့ဘူး။ ဆရာ၊ ဆရာမတွေလည်း ကျောင်းမလာရဲကြတော့ဘူးလေ။ အဲဒါကြောင့် ကျောင်းတွေလည်း ပိတ်ထားရတယ်။ နောက်ပိုင်း တိုက်ပွဲပိုပြီး ပြင်းထန်လာမှာကိုလည်း အားလုံးက စိုးရိမ်နေကြတယ်” လို့ သူက ပြောပါတယ်။
လက်ရှိမှာ ဒေသတွင်း လက်နက်ကိုင်တပ်တွေက ဝယ်ပေါင် – ကျုံလောင်းလမ်းပိုင်းကို ပိတ်ဆို့ကာ ထိန်းချုပ်ထားသလို နစကဘက်ကလည်း စစ်အင်အား ဖြည့်တင်းခြင်းတွေ လုပ်ဆောင်နေတာကြောင့် စစ်ရေးအခြေအနေ တင်းမာနေဆဲဖြစ်တယ်လို့ သိရပါတယ်။
Photo:CJ
