ဇန်နဝါရီလ ၂၃ – ၂၀၂၅
GG (VOM)
ထိုင်း – မြန်မာနယ်စပ် ၊ကရင်ပြည်နယ်၊မြဝတီခရိုင်အတွင်းရှိ အွန်လိုင်းကနေ ငွေလိမ်မှုလုပ်နေတဲ့ကျားဖြန့်လုပ်ငန်း၊ လူကုန်ကူး၊မသမာမူ၊ ဒုစရိုက်မှုတွေ ကို လက်မခံကြောင်းနဲ့ ကျူးလွန်သူတွေကို တားဆီးနှမ်နင်းသွားမယ်လို့ ကရင်ပြည်နယ် ၊နယ်ခြားစောင့်တပ်BGF ကဇန်နဝါရီ၂၂ရက်မှာအသိပေးလာပါတယ်။
ကျားဖြန့်ဂိုဏ်းတွေကို နှိမ်နင်းရာမှာ နစက အပြင် ဒေသတွင်းမိတ်ဖက် အဖွဲ့အစည်း၊ ဒေသအာဏာပိုင်အဖွဲ့အစည်း၊ နိုင်ငံတကာအဖွဲ့အစည်း၊ နိုင်ငံတကာကိုယ်စားလှယ်တွေနဲ့ အတူ ပူးပေါင်းပြီး ဆောင်ရွက်သွားမယ်လို့ BGF ကဆိုထားပါတယ်။
BGF ကတော့ သူတို့အနေနဲ့ ဒေသအတွင်းလာရောက်ပြီး ဖွံ့ဖြိုးရေး လုပ်ကိုင်မယ့် လုပ်ငန်းရှင်ကိုသာ ဖိတ်ခေါ်လက်တွဲခြင်းဖြစ်ပြီး ဒုစရိုက်မှု၊ မသမာမှု၊ လူကုန်ကူးမှု ကို လုံးဝ( လုံးဝ) လက်မခံဘဲ အတိအလင်းတားမြစ်ထားတယ်လို့ ထုတ်ပြန်စာမှာရေးသားထားပါတယ်။
ဒါပေမယ့်လည်းကျားဖြန့်ဂိုဏ်းတွေ ကတော့ BGF ဒေသဖြစ်တဲ့ ကရင်ပြည်နယ်၊မြဝတီခရိုင်ထဲက KKpark နဲ့ရွှေကုက္ကိုလ်မြို့တွေမှာ အဓိကလုပ်ငန်းဆောင်ရွက်နေကြတာဖြစ်ပြီး အဆိုပါ လုပ်ငန်းတွေမှာ တရုတ်အပါပြည်ပနိုင်ငံသားတွေနဲ့မြန်မာနိုင်ငံသားတွေ တရားမဝင်လူကုန်ကူးခံရပြီး ခိုင်းစေခံနေရတယ်လို့သိရပါတယ်။
” သူတို့ကခုလို နိုင်ငံတကာကပါ ပြောလာရင် ခုလိုပဲစာထုတ်ပြောနေတာပဲ။အရင်လည်း မြဝတီမြို့ထဲက ကာစီနိုရုံတွေဂိမ်းဆိုင်တွေပိတ်ဖို့ပြောတာပဲ။ဘာမှမထူးဘူး။အခုက ရွှေကုက္ကိုလ်ဆိုတော့ပိုဆိုးသေး။ဒီလုပ်ငန်းကရတာတွေနဲ့သူတို့ရပ်တည်နေရတာဆိုတော့ ဘယ်အရပ်ခံမလဲ။ဒီကရတဲ့အခွန်တွေငွေတွေနဲ့ သူတို့တပ်ဖွဲ့လစာတွေဘာညာလုပ်ကြတာလေ။” လို့ ဒေသခံက ပြောပါ တယ်။
BGF ကတော့ ဒေသဖွံ့ဖြိုးရေးအတွက် နိုင်ငံတကာရင်းနှီးမြှုပ်နှံမှု ကို ဖိတ်ခေါ်ကာ တရားဝင်စီမံကိန်းတွေ ကို အကောင်အထည်ဖော်ဆောင်ခဲ့တာသာဖြစ်ကြောင်း၊ ဖော် ဆောင်ရာမှာအကျိုးတူဆောင်ရွက်တဲ့စနစ် မဟုတ်ဘဲ နှစ်ရှည်မြေယာငှါးရမ်းစနစ်သုံးပြီး ဝင်ငွေနည်းတဲ့မိသားစုလယ်ယာစိုက်ပျိုးရေးစနစ်အစား မိသားစုဝင်ငွေတိုးစေတဲ့ စက်ရုံ၊ အလုပ်ရုံ၊ အိမ်ရာစီမံကိန်းနဲ့ အပန်းဖြေဧည့်ရိပ်သာစတဲ့ အလုပ်အကိုင် အခွင့်အရေးရရှိတဲ့ လုပ်ငန်းကို ဦးစားပေးဖိတ်ခေါ်ခဲ့တာဖြစ်တယ်လို့ဆိုပါတယ်။
ဒါပေမယ့် ရင်းနှီးမြှုပ်နှံသူတချို့က ဒုစရိုက်မှုကိုပါ ဆောင်ရွက်လာကြကြောင်း စိစစ်တွေ့ရှိလာရတဲ့အတွက် အဆိုပါ ဒုစရိုက်မှုကို အများပြည်သူသိရှိရှောင်ရှားနိုင်ရန် အသိပညာပေးခြင်း၊ လုပ်ငန်းရှင်တွေကို သတိပေး တားမြစ်ခြင်းနဲ့ကျူးလွန်သူကိုဖော်ထုတ်အရေးယူခြင်းတို့ကို ဆောင်ရွက်နေတယ်လို့ထုတ်ပြန်ချက်မှာ ဆိုထားပါတယ်။
အလားတူ တရုတ်သံရုံးကလည်း ဇန်နဝါရီ ၂၂ ရက်မှာပဲ ဆက်သွယ်ရေးလိမ်လည်မှုနဲ့ ကွင်းဆက်ရာဇ၀တ်မှုတွေကျူးလွန်သူတွေကို ဖမ်းဆီးအရေးယူမယ့် မြန်မာအပါအဝင် ကမ္ဘောဒီးယား၊ တရုတ်၊ လာအို၊ ထိုင်း၊ ဗီယက်နမ် နိုင်ငံ ခြောက်နိုင်ငံ ပူးပေါင်းဆောင်ရွက်နေတဲ့ “ဇင်ယော်” ပူးပေါင်းလှုပ်ရှားမှု ဒုတိယအပိုင်းကိုမကြာခင် စတင်သွားမယ်လို့ ကြေငြာထားပါတယ်။
အွန်လိုင်းငွေလိမ်ဂိုဏ်း (ကျားဖြန့်) နဲ့ တရားမဝင် အွန်လိုင်းလောင်းကစားမှုတွေ အခြေစိုက်ရာ ရွှေကုက္ကိုလ်နဲ့ KK Park နယ်မြေမှာတွေမှာရှိတဲ့ အဆောက်အဦးတွေနဲ့ ရင်းနှီးမြှုပ်နှံမှုအများစုက ပြည်ပအဖွဲ့အစည်းတွေ လာရောက်ရင်းနှီးမြှုပ်နှံထားကြတာဖြစ်တယ်လို့ နစကမှလည်း ထုတ်ပြန်ထားပါတယ်။
နယ်စပ်ဒေသတွေရဲ့ လက်ရှိဖြစ်ပေါ်နေတဲ့ အခြေအနေတွေအပေါ် အခွင့်ကောင်းယူပြီး ပြည်ပနိုင်ငံသားအချို့အနေနဲ့ EAO လက်နက်ကိုင်အဖွဲ့တွေအပါအဝင် ဆက်စပ်နေရာက ကိုယ်ကျိုးစီးပွားရှာသူတွေရဲ့ ပါဝင်ပတ်သက်မှုတွေနဲ့ အွန်လိုင်းလိမ်လည်မှုတွေ၊ လောင်းကစားမှုတွေကို ကျယ်ပြန့်စွာ ဆောင်ရွက်နေကြတာဖြစ် တယ်လို့လည်း နစကထုတ်ပြန်ချက်မှာ ဖော်ပြထားပါတယ်။
အွန်လိုင်းလိမ်လည်မှုတွေ၊ လောင်းကစားမှုတွေနဲ့ ပတ်သက်ပြီး လုပ်ဆောင်နေသူတွေဟာ သာမန်လူတွေမဟုတ်ကြဘဲ သက်ဆိုင်ရာနိုင်ငံတွေမှာ ရာဇဝတ်မှုတွေဖြစ်ပြီး တိမ်းရှောင်ထွက်ပြေးနေရတဲ့ လောင်းကစားလုပ်နေကြသူတွေက ဦးဆောင်ကြတာလို့လည်း သိရပါတယ်။
လက်ရှိမှာ ကျားဖြန့်လုပ်ငန်းနဲ့ပတ်သက်ပြီးမြန်မာနိုင်ငံထဲမှာ တရားမဝင်နေထိုင်ကာ အွန်လိုင်းလိမ်လည်မှုနဲ့ အွန်လိုင်းလောင်းကစားလုပ်ငန်း လုပ်ကိုင်နေကြသူတွေထဲကနေ တရုတ်နိုင်ငံသား ၅၃၃၈၈ ယောက်၊ ထိုင်းနိုင်ငံသား ၆၄၈ ယောက် အပါအဝင် နိုင်ငံခြားသား ၅၅၇၁၁ ယောက်ကို သက်ဆိုင်ရာနိုင်ငံအလိုက် ပြန်လည်လွှဲပြောင်းပေးခဲ့တယ်လို့ နစက ထုတ်ပြန်မှုအရသိရပါတယ်။
Photo – CJ
