ကချင်ပြည်နယ်အစိုးရအဖွဲ့ဝင်ဝန်ကြီး လျာထားတဲ့ထဲက ၂ယောက်ကို လွှတ်တော်ကိုယ်စားလှယ်တွေ သဘောမကျ

ဧပြီ ၈- ၂၀၂၆

VOM

ကချင်ပြည်နယ်လွှတ်တော်မှာ ကချင်ပြည်နယ်ဝန်ကြီးချုပ်အဖြစ်လျာထားခံရသူ အဆိုတင်ထားတဲ့ ဝန်ကြီးထဲမှာ စီမံကိန်း၊စီးပွားရေးနဲ့ ဘဏ္ဍာရေးဝန်ကြီးနဲ့ သယံဇာနှင့် သဘာဝပတ်ဝန်းကျင်ထိမ်းသိမ်းရေးဝန်ကြီး လျာထားသူ ၂ယောက်ကို ကချင်ပြည်နယ်လွှတ်တော်ကိုစားလှယ်တချို့က မနှစ်သက် သဘောမတူကြဘူးလို့ ကိုယ်စားလှယ်တချို့ဆီက သိရပါတယ်။

ပြီးခဲ့တဲ့ ရွေးကောက်ပွဲမှာ ပြည်ခိုင်ဖြိုးပါတီက ကိုယ်စားလှယ်ကို ရှုံးနိမ့်ခဲ့တဲ့ NDPK ပါတီက လက်ရှိကချင်ပြည်နယ် သယံဇာတဝန်ကြီးကို စီမံကိန်းစီးပွားရေးနဲ့ ဘဏ္ဍာရေးဝန်ကြီးလျာထားတာရယ် သယံဇာနှင့် သဘာဝပတ်ဝန်းကျင်ထိမ်းသိမ်းရေးဝန်ကြီးအသစ် ခန့်အပ်မယ့်အပေါ် ဝေဖန်မှုတွေ ထွက်ပေါ်နေပါတယ်။

ကချင်ပြည်နယ်က လွှတ်တော်ကိုယ်စားလှယ်တယောက်ပြောပြတာက

” ရွေးကောက်ပွဲမှာ ပြည်သူက ဆန္ဒမဲနဲ့ ပယ်ချထားလို့ ရှုံးနိမ့်ခဲ့သူကို ခုလို အရေးပါတဲ့ ဝန်ကြီးရာထူး ပြောင်းလဲပေးအပ်တာဟာ မဲပေးခဲ့တဲ့ ပြည်သူတွေရဲ့ ဆန္ဒကို လျစ်လျူရှုရာ ရောက်တယ်လို့ ” ရှုမြင်ကြောင်းပြောပါတယ်။

ဝန်ကြီးချုပ်အဖြစ် ဦးခက်ထိန်နန်ကို နိုင်ငံတော်သမ္မတဖြစ်လျာထားခံရသူက အဆိုတင်ထားသလို ဝန်ကြီးချုပ်လျာထားခံရသူကလည်း လုံခြုံရေးနဲ့နယ်စပ်ရေးရာအတွက် ဗိုလ်မှူးကြီးကျော်သူရ၊စီမံကိန်းစီးပွားရေးနဲ့ ဘဏ္ဍာရေးဝန်ကြီးအဖြစ် ဦးတိန့်ဆောင်၊ လူမှုရေးဝန်ကြီးအဖြစ် ဦးကျော်မင်းခိုင်၊ လျှပ်စစ်၊စက်မှုနဲ့ လမ်းပမ်းဝန်ကြီးအဖြစ် ဦးအောင်နိုင်၊ စိုက်ပျိုးရေး မွေးမြူရေးနဲ့ ဆည်မြောင်းဝန်ကြီးနေရာအတွက် ဦးချန်တန်ခင်၊ သယံဇာနှင့် သဘာဝပတ်ဝန်းကျင်ထိမ်းသိမ်းရေးဝန်ကြီးအဖြစ် ဒေါက်တာအောင်ဝင်း၊ စည်ပင်သာယာရေးဝန်ကြီးအဖြစ် ဦးရဲရင့်ဆွေတို့ကို လျာထားကြောင်း ကချင်ပြည်နယ်လွှတ်တော်ကို တင်ပြထားပါတယ်။

ခုလိုလျာထားထားတဲ့ ဝန်ကြီးတွေကို သဘောမတူရင် မနက်ဖြန်ကျင်းပမယ့် ကချင်ပြည်နယ်လွှတ်တော်မှာ ကန့်ကွက်ရမှာမို့ ဝန်ကြီးချုပ်ရဲ့ အဆိုက အတည်ပြုမလား လွှတ်တော်ကိုယ်စားလှယ်တွေက ကန့်ကွက်ကြမှာလားဆိုတာ မနက်ဖြန်မှာ အဖြေပေါ်မှာ ဖြစ်ပါတယ်။