အမေရိကန်ရောက် အထောက်အထားမဲ့တွေကို နှင်ထုတ်ဖို့ ထရန့်သမ္မတဖြစ်တဲ့နေ့မှာ အမိန့်ထုတ်ပြန်ဖို့ရှိ

ဝါရှင်တန်၊ ဇန်နဝါရီ-၂၀-၂၀၂၅
ရတီ(VOM)

အမေရိကန်ရွေးကောက်ခံသမ္မတ ဒေါ်နယ်ထရန့်ဟာ သူသမ္မတအဖြစ် ကျမ်းသစ္စာကျိန်ဆိုတဲ့နေ့မှာ အထောက်အထားမဲ့ ရွှေ့ပြောင်းနေထိုင်သူတွေနဲ့ ပတ်သက်ပြီး ကြီးမားတဲ့ အစီအမံချမှတ်ဖို့ အမိန့်ထုတ်ပြန်မယ်လို့ ပြောပါတယ်။

သမ္မတအဖြစ် ကျမ်းသစ္စာကျိန်ဆိုပွဲမတိုင်မီ တရက်အလို ဝါရှင်တန်မှာ ပြုလုပ်တဲ့ စုဝေးပွဲမှာ ထောက်ခံသူတွေကို ထရန့်က ကတိပြုပြောဆိုခဲ့တာဖြစ်ပြီး ကောင်းမွန်တဲ့ အုပ်ချုပ်ရေးအမိန့်တွေကို မြင်တွေ့ရမှာဖြစ်ကာ နို်ငငံနယ်နိမိတ်တွေကို ကျူးကျော်နေမှု ရပ်တန့်သွားလိမ့်မယ်လို့ ထရန့်က ဆိုပါတယ်။

မနက်ဖြန် သမ္မတအဖြစ် ပထမဆုံးမိန့်ခွန်းမှာ ကြေညာမယ့် နယ်စပ်လုံခြုံရေးအစီအမံတွေဟာ ကမ္ဘာပေါ်မှာ နယ်နိမိတ် ကာကွယ်ရေးအစီအမံတွေထဲမှာ ပြင်းထန်ပြီး အရှိန်အဟုန်နဲ့ လုပ်ဆောင်သွားမယ်လို့ ဆိုပါတယ်။ ဘယ်မြို့ကနေစမယ်ဆိုတာ မပြောပေမယ့် မြန်မြန်ဆန်ဆန် စတင်ပြီး လူတွေ မျက်မြင်တွေ့ရလိမ့်မယ်လို့ ဒေါ်နယ်ထရန့်က ပြောပါတယ်။

ဒေါ်နယ်ထရန့်ဟာ အမေရိကန်ရဲ့ ၄၇ ယောက်မြောက် သမ္မတအဖြစ် ဇန်နဝါရီ ၂၀ ရက်မှုာ ကျမ်းသစ္စာကျိန်ဆိုမှာဖြစ်ပြီး ကျမ်းသစ္စာကျိန်ဆိုပြီးနောက် များကြာခင်မှာ အုပ်ချုပ်ရေး အမိန့်အရေအတွက် ၂၀၀ ထိစံချိန်တင်လက်မှတ်ရေးထိုး ထုတ်ပြန်ဖွယ်ရှိနေပါတယ်။

သမ္မတရဲ့ အမိန့်ဟာ ကွန်ဂရက်လွှတ်တော်ရဲ့ အတည်ပြုချက်မလိုဘဲ ပြည်ထောင်စုအစိုးရက ထုတ်ပြန်သော အမိန့်စာဖြစ်ပြီး တနည်းအားဖြင့် လွှတ်တော်ကိုယ်စားလှယ်တွေရဲ့ ထောက်ခံမှုမလိုဘဲ မူဝါဒအပြောင်းအလဲကို အကောင်အထည်ဖော်နိုင်တဲ့ နည်းလမ်းတွေထဲက တခုဖြစ်ပါတယ်။

Ref:NHK
Photo:Independent