ဇီးကုန်း မေ ၂၄ – ၂၀၁၉
မိုးယံ (VOM)
ဆန်ကုန်သည်များအနေနဲ့ မြန်မာနိုင်ငံ ဆန်စပါးအသင်းချုပ်က သတ်မှတ်ထားတဲ့ စပါးဈေး ငါးသိန်း ဈေးအောက် နှိမ်ချဝယ်ယူနေတာကြောင့် ကျေနပ်မှုမရှိလို့ဆိုပြီး တောင်သူငါးရာလောက်ဟာ ဒီနေ့ မနက်က ဇီးကုန်းမြို့မှာ ဆန္ဒထုတ်ဖော်ခဲ့ပါတယ်။
“ကျမတို့လယ်သမားတွေမှာ စပါး ၅၀/၅၁ ပေါင် ကို ၄၂၀၀၀၀ ကျပ်နဲ့ ရောင်းချနေရတယ်။ အဲဒီအတွက် လူမှုရေး၊ ပညာရေး၊ စီးပွားရေးတွေနိမ့်ကျခဲ့တယ်။ ကလေးတွေ ပညာရေးမှာလည်း အခက်တွေ့နေရပါတယ်။ လယ်တစ်ဧကကုန်ကျငွေက ၃၂၀၀၀၀ ကျပ် ဆိုတော့ အရှုံးပေါ်နေပါတယ်။ ဒါကြောင့် အခုလိုဆန္ဒပြရခြင်း ဖြစ်ပါတယ်။” လို့ ဇီးကုန်းမြို့နယ် မြောက်လွှတ်ကုန်းရွာ တောင်သူ မမာလာအောင်က ပြောပါတယ်။
တောင်သူလယ်သမားများအား ဂုတ်သွေးစုပ် အမြတ်ထုတ်နေသော ကုန်သည်ကြီးများရဲ့လုပ်ရပ်များ အလိုမရှိ၊ နိုင်ငံတော်မှ သတ်မှတ်ထားသော ကြမ်းခင်းဈေး ငါးသိန်းအောက် လျော့ဝယ်နေသော ကုန်သည်ကြီးများ အလိုမရှိ၊ နိုင်ငံတော်အစိုးရမှ သတ်မှတ်ထားသော စပါးဈေးနှုန်း ရရှိရေး၊ တောင်သူများဘဝ ဖွံ့ဖြိုးတိုးတက်ရေး စတာတွေကို ဒို့အရေး ကြွေးကြော်ပြီး ဆန္ဒထုတ်ဖော်ခဲ့ကြတာပါ။
မနက် ၉နာရီကနေ နေ့လည်၂ နာရီအထိ ဇီးကုန်းမြို့ ဗိုလ်ချုပ်ကြေးရုပ်ပန်းခြံရှေ့ကနေ ရန်ကုန်-ပြည် ကားလမ်းတစ်လျှောက် လမ်းလျှောက်ချီတက်ခဲ့ကြတာ ဖြစ်ပါတယ်။
“တော်တော်အရှုံးပေါ်နေပါတယ်။ တောင်သူတွေမှာ ဘဏ်ဆပ်ဖို့ ခက်ခဲနေပါတယ်။ လူမှုရေး၊ စီးပွားရေး အခက်အခဲနဲ့ ကြုံတွေ့နေရလို့ ကျနော်တို့တောင်သူတွေဘက်က ရပ်တည်ဖြေရှင်းပေးစေချင်ပါတယ်။” လို့ နတ္တလင်းမြို့နယ် ဓမ္မကျအုပ်စု သဲဖြူရွာကတောင်သူ ဦးမင်းနောင်က ပြောပါတယ်။
ပြီးခဲ့တဲ့ မေလ ၁၇ ရက်က ဒေသခံတောင်သူတွေဟာ ပဲခူးတိုင်းအစိုးရနဲ့ မြန်မာနိုင်ငံ ဆန်စပါးအသင်းချုပ်ကို စာတင်တောင်းဆိုထားပြီး တစ်ပတ်အကြာမှာ အခုလို ဆန္ဒထုတ်ဖော်ခဲ့ကြတာပါ ။
မေလ ၁၈ ရက်ကလည်း ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီမှ စာအမှတ်(၂/၂၀၁၉)နဲ့ လက်ရှိဖြစ်ပေါ်နေတဲ့ တောင်သူအခက်အခဲများကို အစိုးရ (သက်ဆိုင်ရာ ဝန်ကြီးဌာနများ)အနေနဲ့ အသင်းအဖွဲ့၊ ကုန်သည်၊ လုပ်ငန်းရှင်၊ ပညာရှင်များရဲ့ဝိုင်းဝန်းကူညီမှုနဲ့ အမြန်ဆုံး တာဝန်ယူဖြေရှင်းဆောင်ရွက်ပေးဖို့ တိုက်တွန်းပါတယ်ဆိုတဲ့ သဘောထားကြေငြာချက်တစ်စောင် ထုတ်ပြန်ခဲ့ပါတယ်။
#voiceofmyanmar #သတ်မှတ်ဈေးအောက်နှိမ်ဝယ်လို့တောင်သူများဆန္ဒထုတ်ဖော် #ဆန်စပါး #ပဲခူး #ဇီးကုန်း
