စက်တင်ဘာ ၁၉ ၊၂၀၂၅
GG (VOM)
ကချင်ပြည်နယ်၊ ပူတာအိုမြို့နယ်မှာ ပြီးခဲ့တဲ့ ရက်က ဖြစ်ပွားခဲ့တဲ့ တောင်ပြို၊မြေပြို ၊ရေကြီးမှုကြောင့် မန်စေခွန်ရွာအပါအဝင် ရွာခြောက်ရွာလောက်မှာရှိတဲ့ လယ်ဧကရာနဲ့ချီပြီး သဲမြေဖုံးလွှမ်းကာ စိုက်ခင်းတွေပျက်စီးသလို သဲသောင်ပြင်ကြီးဖြစ် သွားတယ်လို့ ဒေသခံတွေဆီကသိရပါတယ်။
စပါးစိုက်ခင်းတွေကို သဲတွေဖုံးလွှမ်းသွားတာကြောင့် မကြာမီရိတ်သိမ်းရတော့မယ့် စပါးခင်းတွေပျက်စီးသွားသလို လယ်တွေလည်းသဲတွေဖုံးသွားတဲ့အတွက် သဲသောင်ပြင်ကြီးဖြစ်သွားတာကြောင့် လာမယ့်မိုးရာသီမှာပင် စပါးစိုက်ပျိုးနိုင်လို့မရတဲ့အခြေအနေထိဖြစ်သွားတယ်လို့သိရပါတယ်။
ဒါကြောင့် ဒေသခံပြည်သူတွေက သူတို့ကို အကူအညီနဲ့အကြံညဏ်တွေပေးကြဖို့ ပြောဆိုမှုတွေရှိနေပါတယ်။
“ကျွန်မတို့ မန်စေခွန်ရွာ တရွာလုံးမှာရှိတဲ့ လယ်တွေအကုန်မြုပ် ပျက်စီး သွားပါတယ်။အကုန်ဆုံးရှုံးနစ်နာသွားပါတယ်။ ကျွန်မတို့ကိုကူညီနိုင်တဲ့သူတွေက ကူညီပေးပါ။အကြံညဏ်ပေးနိုင်သူကပေးပါရှင်။ဒီမိုးတွင်းကြီးမှာချက်ချင်းကြီူပိုက်ဆံရှာပြီး ရုန်းကန်ကြဖို့မဖြစ်နိုင်လို့ပါ။ကူညီပေးကြပါ။ လာမယ့်နှစ်မှာလယ်ကိုပြန်ဖော်ပြီးစိုက်ဖို့လည်း ကျွန်မတို့ မနိုင်လို့ပါ။ရွာတွေကလယ်တွေအကုန်ပျက်စီးသွားပါတယ်။လယ်ကနေသဲသောင်ပြင်ဖြစ်သွားပါတယ်။”လို့ မန်စေခွန်ရွာ ဒေသခံကပြောပါတယ်။
အဆိုပါ ကျေးရွာတွေက စပါးကို ဒေသတွင်းရောင်းချဖို့နဲ့ ကိုယ်တိုင် သိုလှောင်ထားပြီး ကြိတ်ခွဲစားသောက်ဖို့ စိုက်ပျိုးကြတာဖြစ်လို့ ယခုမိုးစပါးစိုက်ဧကတွေ ပျက်စီးဆုံးရှုံးသွားတဲ့အတွက် အကူအညီတွေလိုအပ်နေတာဖြစ်တယ်လို့သိရပါတယ်။
ခုလိုရေကြီးမှုဖြစ်တာဟာ ပူဆာအိုမြို့တယ်အတွင်းလုပ်ကိုင်နေတဲ့ ရွှေတူးဖော်ရေးလုပ်ကိုင်မှုတွေ အထိန်းအကွပ်မဲလုပ်ဆောင်လာတဲ့အခြေအနေတွေကြောင့် နောက်ဆက်တွဲဆိုးကျိုးကို ဒေသခံပြည်သူတွေခံစားရတာဖြစ်တယ်လို ပူတာအိုမြို့ခံကပြောပါတယ်။
” မန်စေခွန်ရွာအပါ ရှမ်းရွာတွေက လယ်တွေအကုန်ပျက်စီးတာပါ။လယ်တွေရာနဲ့ချီရှိတယ်။ လယ်တွေက ဒီနှစ်ကမထင်မှတ်ဘဲရုတ်တရက်ရေကြီးတာ။ရွှေမှော်တွေကြောင့်၊ ရွှေမှော်တွေမဆင်မခြင်လုပ်တာကြောင့် လို့ကျွန်တော်ထင်တယ်။ အရင်ရေကြီးတာကဒီလောက်မဆိုးဘူး။အခုရေကြီးတော့ စပါးစိုက်ခင်းတွေ ဆုံးရှုံးသလို နောက်နှစ်မိုးစပါးအတွက်ပါမျိုးစပါးဆုံးရှုံးတဲ့သဘောဖြစ်သွားတယ် ။နောက်နှစ်ပြန်စိုက်ဖို့ကလည်းမလွယ်တဲ့သဘောဖြစ်သွားတယ်။အဲဒီလယ်တွေဖုံးသွားတဲ့သဲနူန်းတွေက ခုနပြောတဲ့ရွှေလုပ်ငန်းတွေကထွက်တာတွေပေါ့။”လို့ ပြောပါတယ်။
လက်ရှိအချိန်အထိတော့ လယ်မြေတွေပျက်စီးဆုံးရှုံးသွားတဲ့အပေါ် သက်ဆိုင်ရာမြို့နယ်တာဝန်ရှိသူတွေဘက်မှ အကူအညီတစုံတရာ လုပ်ဆောင်ပေးခြင်းမရှိသေးဘူးလို့သိရပါတယ်။
ပူတာအိုမြို့နယ်ထဲက မန်စေခွန်ရွာအပါအဝင် ကျေးရွာအချို့မှာ စက်တင်ဘာ ၁၆ ရက်နေ့ကဖြစ်ပွားခဲ့တဲ့ တောင်ပြို၊မြေပြို၊ရေကြီးမှုကြောင့် စပါးစိုက်ဧက ရာနဲ့ချီပြီး ပျက်စီးဆုံးရှုံးခဲ့ရသလို တံတားတွေလည်းပျက်စီးခဲ့ရ တာဖြစ်ပါတယ်။
Photo: CJ
