မေ ၈ – ၂၀၂၆
SN (VOM)
ဒီဇယ်ဆီ HSD (500 ppm) နဲ့ ဓာတ်မြေဩဇာတွေ တင်သွင်းမှုအပေါ် ကောက်ခံတဲ့ ဝင်ငွေခွန် ၂ ရာခိုင်နှုန်း ကင်းလွတ်ခွင့်ကို ဘဏ္ဍာရေးနှင့်အခွန် ဝန်ကြီးဌာနက တလထပ်မံ တိုးမြှင့်ထားပေမယ့် ဈေးကွက်အတွင်း ဈေးကြီးပေးပြီး ဝယ်ယူရမှုတွေ ရှိနေဆဲဖြစ်တယ်လို့ လုပ်ငန်းရှင်တွေနဲ့ တောင်သူတွေက ပြောပါတယ်။
ဓာတ်မြေဩဇာတွေ တင်သွင်းမှုအပေါ် ကောက်ခံတဲ့ ကြိုတင်ဝင်ငွေခွန် ၂ ရာခိုင်နှုန်းကို ဘဏ္ဍာ/အခွန် ဝန်ကြီးဌာနက ဧပြီ ၁ ရက်မှ ၃၀ ရက်အထိ ကင်းလွတ်ခွင့် ပြုခဲ့ပြီးဖြစ်သလို လက်ရှိမှာလည်း မေ ၁ ရက်မှ ၃၁ ရက်အထိ ထပ်မံ ရက်တိုးမြှင့်ပေးထားတယ်လို့ သိရပါတယ်။
အဲဒီ အခွန်ကင်းလွတ်ခွင့်ဟာ အကောက်ခွန်ဦးစီးဌာနမှာ မေ ၃၁ ရက်အထိ Import Declaration (ID) ဖွင့်လှစ်ပြီး တင်သွင်းတဲ့ ဓာတ်မြေဩဇာတွေအတွက်သာ အကျုံးဝင်စေမှာ ဖြစ်တယ်လို့ သိရပါတယ်။
ဒါအပြင် ဒီဇယ်ဆီ HSD (500 ppm) တင်သွင်းမှုအပေါ် ကောက်ခံတဲ့ အကောက်ခွန်၊ အထူးကုန်စည်ခွန်၊ ကုန်သွယ်လုပ်ငန်းခွန်နဲ့ ကြိုတင်ကောက်ခံတဲ့ ဝင်ငွေခွန် ၂ ရာခိုင်နှုန်းတို့ကိုလည်း မေ ၁ ရက်ကနေ ၃၁ ရက်အထိ ရက်တိုးမြှင့် ပေးထားကာ အကောက်ခွန်ဌာနမှာ မေ ၃၁ ရက်အထိ ID ဖွင့်လှစ်ပြီး တင်သွင်းတဲ့ ဒီဇယ်ဆီ HSD (500 ppm) အပေါ် အကျုံးဝင်စေမှာ ဖြစ်တယ်လို့ သိရပါတယ်။
ဒါနဲ့ပတ်သက်လို့ တောင်သူတယောက်က “အခွန်တွေသာ လျှော့ထားပေမယ့် ဓာတ်မြေဩဇာက ပုလဲ တအိတ် ကျပ် တသိန်းရှစ်သောင်း ဈေးပေါက်နေတယ်။ အစိုးရဆီနဲ့ စက်မောင်းရင် တသိန်းနှစ်သောင်း၊ အပြင်က ဆီဝယ်ရင် တသိန်းခြောက်သောင်း ကုန်ကျစရိတ် ရှိနေတယ်။ စပါးစိုက်ဖို့ ဘယ်လိုမှ အဆင်မပြေဘူး ဖြစ်နေတယ်။ ဈေးထပ်တက်ဦးမယ်လို့တောင် ဆိုင်တွေက ပြောလိုက်သေးတာ။ အခုဆို တောင်သူတွေက လယ်ကို စိုက်ရမှာလား၊ မစိုက်ရဘူးလား ဖြစ်နေကြတယ်” လို့ ပြောပါတယ်။
ဒါအပြင် စီးပွားရေးလုပ်ငန်းရှင် တယောက်ကလည်း ဝန်ကြီးဌာနအနေနဲ့ အခွန်ကင်းလွတ်ခွင့်တွေ ရက်ထပ်မံ တိုးမြှင့်ပေးထားပေမယ့် အကောက်ခွန် လုပ်ငန်းစဉ်တွေနဲ့ ပတ်သက်ပြီး အခက်အခဲတွေ ရှိနေတယ်လို့ ပြောပါတယ်။
“အခွန်ကင်းလွတ်ခွင့် ကာလက တလချင်းစီ၊ ကာလတိုဖြစ်နေတဲ့အတွက် ရေရှည်မှာ စိတ်မချရဘူး။ ဓာတ်မြေဩဇာပဲဖြစ်ဖြစ်၊ စက်သုံးဆီပဲဖြစ်ဖြစ်ပေါ့။ ကျွန်တော်တို့ တင်သွင်းသူတွေအတွက်က ကြိုတင်စီမံနိုင်ဖို့ ခက်ခဲနေတဲ့အပိုင်းတွေ ရှိတယ်။ ဈေးနှုန်းတွက်ချက်ရတဲ့ နေရာမှာ အခက်အခဲတွေ ရှိနေတယ်။ ID ဖွင့်တာ၊ အခွန်ကင်းလွတ်ခွင့် အတည်ပြုချက် ရယူရတဲ့ လုပ်ငန်းစဉ်တွေမှာ အချိန်ကြန့်ကြာမှုတွေ ရှိနေတယ်” လို့ ပြောပါတယ်။
ဒါအပြင် အခွန်ကင်းလွတ်ခွင့် ရရှိဖို့ကလည်း အကောက်ခွန်မှာ ID ဖွင့်တဲ့ တင်သွင်းမှုတွေ အတွက်သာ အကျုံးဝင်တာကြောင့် အချိန်နဲ့ တပြေးညီ ကုန်စည် စီးဆင်းနိုင်ဖို့အတွက်က ကြန့်ကြာမှုတွေ ရှိနေသေးတယ်လို့ သူက ပြောပါတယ်။
အစိုးရသတ်မှတ်ထားတဲ့ ဒီဇယ်ဆီ HSD (500 ppm) ဈေးက လက်ရှိမှာ တလီတာ ၆၀၇၀ ကျပ်ဖြစ်ပြီး စက်သုံးဆီ အမျိုးအစားတွေထဲမှာ ဈေးအမြင့်ဆုံးဖြစ်ကာ မှောင်ခိုဈေးကွက်မှာတော့ တလီတာကို ကျပ် ၇၀၀၀ ဝန်းကျင် ပေါက်ဈေးရှိနေတယ်လို့ သိရပါတယ်။
Photo – CJ
