စက်တင်ဘာ ၃၀ – ၂၀၂၆
SN (VOM)
မြန်မာဘီယာနဲ့ ဒဂုံဘီယာတို့ ရရှိထားတဲ့ အရည်အသွေးဆုတွေကို ဘယ်လ်ဂျီယံကုမ္ပဏီ Monde Selection က ပြန်လည် ရုပ်သိမ်းလိုက်ပြီး အဲဒီ အမှတ်တံဆိပ်တွေကိုပါ သူတို့ရဲ့ ဝက်ဘ်ဆိုက်ကနေ ဖယ်ရှားလိုက်ပြီလို့ Justice For Myanmar (JFM) က အသိပေး ထုတ်ပြန်ထားပါတယ်။
ဘယ်လ်ဂျီယံကုမ္ပဏီ Monde Selection ဟာ လူသုံးကုန်ပစ္စည်းတွေရဲ့ အရည်အသွေးကို ဆန်းစစ် အကဲဖြတ်တဲ့အဖွဲ့ဖြစ်ပြီး ပြင်သစ်နိုင်ငံ၊ ပါရီမြို့ရှိ ဥရောပနဲ့ နိုင်ငံခြားရေးဝန်ကြီးဌာန ရုံးချုပ် Quai d’Orsay မှာ ကျင်းပပြုလုပ်ခဲ့တဲ့ ၂၀၂၆ ခုနှစ် Monde Selection ဆုပေးပွဲအခမ်းအနားမှာ ဒဂုံအဖျော်ယမကာ ကုမ္ပဏီလီမိတက် (Dagon Beverages Company Limited) ကို ဆုအများအပြား ပေးအပ် ချီးမြှင့်ခဲ့တာပါ။
အဲဒီလို ချီးမြှင့်အပြီးမှာပဲ Justice For Myanmar နဲ့ Info Birmanie တို့က အဲဒီ ကုမ္ပဏီအပေါ် ဒဏ်ခတ်ပိတ်ဆို့မှုနဲ့ လူ့အခွင့်အရေးဆိုင်ရာ အကြောင်းပြချက်တွေ ဖော်ပြပြီး ဆုတွေ ပြန်လည်ရုပ်သိမ်းဖို့နဲ့ Monde Selection Quality Award လိုဂိုကို ဆက်လက် အသုံးပြုခွင့်မပေးဖို့ ပြီးခဲ့တဲ့ သြဂုတ်လအတွင်းမှာ Monde Selection ဆီ လိပ်မူကာ စာရေးသားပေးပို့ တောင်းဆိုခဲ့တယ်လို့ သိရပါတယ်။
အဲဒီ တောင်းဆိုမှုအပြီးမှာပဲ Monde Selection ဘက်က ဒီကုမ္ပဏီတွေဟာ အစိုးရတပ်နဲ့ ဆက်နွယ်နေတယ် ဆိုတာကို ၎င်းတို့အနေနဲ့ ကြိုတင် သိရှိထားခြင်းမရှိခဲ့ဘူးလို့ အသိပေးပြီး ဆုတွေကို ပြန်လည် ရုပ်သိမ်းခဲ့တာဖြစ်ပါတယ်။
ဒီအကြောင်းအရာနဲ့ ပတ်သက်လို့ Info Birmanie ရဲ့ ညှိနှိုင်းရေးမှူးဖြစ်သူ Johanna Chardonnieras က “ဒီဖြစ်ရပ်က ငြိမ်းချမ်းရေးနဲ့ စစ်ဖြစ်နေတဲ့အချိန်တွေမှာ တကယ့်စီးပွားရေးလောကနဲ့ ဘယ်လောက်ထိ ဆက်စပ်နေလဲဆိုတာကို ကုမ္ပဏီတိုင်းအတွက် သတိပေးစရာတခု ဖြစ်သင့်တယ်” လို့ ပြောပါတယ်။
Dagon Lager Beer, Dagon Extra Strong, Dagon Royal Rum, Dagon Malta Fresh နဲ့ Dagon Fresh Lemon Sparkling အစရှိတဲ့ အမှတ်တံဆိပ်တွေကို ထုတ်လုပ်တဲ့ Dagon Beverages ဟာ မြန်မာ့စီးပွားရေးကော်ပိုရေးရှင်း (MEC) ရဲ့ ရာနှုန်းပြည့်ပိုင် လက်အောက်ခံကုမ္ပဏီလို့ သိရပါတယ်။
ဒါအပြင် မြန်မာ့စီးပွားရေးဦးပိုင်လီမိတက် (MEHL) ရဲ့ လက်အောက်ခံ Myanmar Brewery ကုမ္ပဏီထုတ် Myanmar Beer, Black Shield နဲ့ Andaman Gold အစရှိတဲ့ ဘီယာတွေဟာလည်း Monde Selection က ပေးအပ်တဲ့ဆုတွေကို ပြီးခဲ့တဲ့ ၂၀၂၃ ခုနှစ်အတွင်းမှာ နောက်ဆုံးအကြိမ် ရရှိထားခဲ့တယ်လို့ JFM က ထုတ်ပြန်ထားပြီး MEC နဲ့ MEHL တို့ကို အီးယူ၊ ယူကေ၊ အမေရိကန်ပြည်ထောင်စု၊ ကနေဒါနဲ့ ဩစတြေးလျနိုင်ငံတို့က ဒဏ်ခတ်ပိတ်ဆို့ အရေးယူထားတယ်လို့ သိရပါတယ်။
လက်ရှိမှာ မြန်မာဘီယာနဲ့ ဒဂုံဘီယာတို့ရဲ့ အရည်အသွေးဆုတွေ ရုပ်သိမ်းခံထားရပေမယ့် ပြည်တွင်းဈေးကွက်အတွင်းမှာတော့ အဲဒီဘီယာတွေရဲ့ ရောင်းအားပမာဏ သိသာစွာ ကျဆင်းသွားခြင်း မရှိသေးဘဲ ပုံမှန်အတိုင်း ဆက်လက်ဖြန့်ချိ ရောင်းချနေရဆဲ ဖြစ်တယ်လို့ သိရပါတယ်။
Photo – CJ
