သြဂုတ် ၂-၂၀၂၂
VOM (GG)
ရန်ကုန်မြို့ ၊လမ်းမတော်မြို့နယ် ၊ ဆန်စပါးကုန်စည်ဒိုင် (ဝါးတန်း)တည်ရှိရာ ၊ ဝါးတန်းဆိပ်ကမ်းနယ်မြေမှာ ဆန် အမျိုးအစား ၄ မျိုးကို တစ်အိတ် အနည်းဆုံး ၃၅၀၀၀ ကနေ အမြင့်ဆုံး ပေါ်ဆန်းမွှေးကို ၇၇၀၀၀ ကျပ် နဲ့ သြဂုတ် ၃ ရက်နေ့ကစပြီး ရောင်းချပေးသွားမယ်လို့ မြန်မာနိုင်ငံ ဆန်စပါးအသင်းချုပ်ကနေ သိရပါတယ်။
ရောင်းချပေးမယ့် ဆန်တွေကတော့ ရွှေဘိုပေါ်ဆန်း ၇၅၀၀၀ ကနေ ၇၇၀၀၀ ၊ ကျားပျံက ၅၅၀၀၀ ကနေ ၆၀၀၀၀ ၊ဧရာဝတီပေါ်ဆန်းက ၅၂၀၀၀ ကနေ ၅၅၀၀၀ ၊ ရက် ၉၀ ဆန်က ၃၅၀၀၀ ကနေ ၃၇၀၀၀ ကျပ်နဲ့ရောင်းချပေးမှာဖြစ်တယ်လို့ သိရပါတယ်။
” ဆန်စျေးတွေတက်နေတော့ အဆင်ပြေအောင် ရောင်းပေးတဲ့သဘောပါ။ ၃ ရက်နေ့ကစပြီး မနက် ၉ နာရီကနေ ၃ နာရီအတွင်းရောင်းပေးမှာပါ။ ရန်ကုန်မှာ ရောင်းပေးမှာပါ “လို့ မြန်မာနိုင်ငံ ဆန်စပါးအသင်းချုပ် အသင်းဝင် ဆန်လုပ်ငန်းရှင်တဦးကပြောပါတယ်။
အခုလို ဆန်ရောင်းချမယ့်အစီအစဥ်မှာ ပြန်ရောင်းမယ့် ကုန်သည်တွေနဲ့ လက်လီသမားတွေကို ရောင်းချပေးမှာမဟုတ်ဘဲ အမှန်တကယ် လိုအပ်တဲ့ စားသုံးသူပြည်သူတွေကိုသာ အိမ်ထောင်စုတစု ဆန်တအိတ်နူန်းရောင်းပေးမှာဖြစ်ကြောင်း ၊ ရောင်းချပေးမယ့် ဆန်တွေကလည်း အရည်အသွေးကောင်းပြီး ပစ္စည်းမှန်၊စျေးမှန်၊ အလေးချိန်မှန်နဲ့ ရောင်းချပေးမှာဖြစ်တယ်လို့ သိရပါတယ်။
အခုလို ဆန်ရောင်းချတဲ့ အစီအစဉ်ကို မြန်မာနိုင်ငံ ဆန်စပါးအသင်းချုပ်၊ မြန်မာနိုင်ငံ ဆန်စပါးကုန်သည်များအသင်း၊ မြန်မာနိုင်ငံ ဆန်စက်လုပ်ငန်းရှင်များအသင်း၊ ဆန်စပါး ကုန်စည်ဒိုင်(ဝါးတန်း) နဲ့ ဆန်စပါးကုန်စည်ဒိုင်(ဘုရင့်နောင်)တို့က ပူးပေါင်းကာ ဆောင်ရွက်ခြင်းဖြစ်တယ်လို့ သိရပါတယ်။
လက်ရှိမှာ ပြင်ပပေါက်စျေးကတော့ ရွေဘိုပေါ်ဆန်း ထူးရှယ် ၂၄ ပြည် ၁အိတ်ကို အမြင့်ဆုံး ၉၀၀၀၀ ကျပ်အထိ ရှိနေပြီး ကျားပျံက ၆၂၅၀၀ ၊ ရက် ၉၀ ဆန်က ၃၈၀၀၀ ကနေ ၃၉၅၀၀ ကျပ် ၊ဧရာဝတီပေါ်ဆန်းက ၆၂၀၀၀ ကျပ်ရှိတယ်လို့ ဆန်ရောင်းဝယ်ရေးလုပ်ငန်းတွေဆီကသိရပါတယ်။
#voiceofmyanmar #VOM #ဆန်၄မျိုး #ပြင်ပပေါက်စျေးထက်လျှော့ချပြီး #ရောင်းပေးမယ်
