မတ် ၄- ၂၀၂၂
SW(VOM)
ရခိုင်ပြည်နယ်၊ စစ်တွေမြို့၊ စက်ရုံစုရပ်ကွက်ရှိ ဆီဆိုင်တန်းမှာ ဒီကနေ့ မနက် ၁၁ နာရီ မိနစ် ၄ဝ ကျော်လောက်က မီးလောင်မှုဖြစ်ပြီး မီးဝိုင်းဝန်းငြိမ်းတဲ့ ပြည်သူတဦး ဒဏ်ရာရရှိကာ စက်သုံးဆီသိုလှောင်ရုံတခု ဆုံးရှုံးသွားတယ်လို့ သိရပါတယ်။
မီးလောင်မှုဖြစ်ပွားရတဲ့အကြောင်းအရင်းကို စုံစမ်းနေဆဲဖြစ်ကြောင်း စစ်တွေမြို့နယ် မီးသတ်ဌာနက ပြောပါတယ်။
” မီးလောင်မှုဖြစ်စဥ်နဲ့ ပတ်သက်ပြီး စစ်ဆေးနေတုန်းပဲရှိပါသေးတယ်။ ကျနော်တို့ နောက်ပိုင်းမှာ ထုတ်ပြန်ပေးသွားဖို့ရှိပါတယ်။” လို့ မီးသတ်ဌာနတာဝန်ရှိသူတဦးက ပြောပါတယ်။
မီးလောင်မှုဖြစ်စဥ်မှာ ဦးအေးကျော် စက်သုံးဆီအရောင်းဆိုင်က ဆီသိုလှောင်ရုံပါသွားတာလို့ မျက်မြင်မြို့ခံတွေနဲ့ လူမှုကူညီရေးအသင်းတို့က ပြောပါတယ်။
” မီးလောင်တာဟုတ်ပါတယ်။ ပထမဆုံး မီးခိုးလိတ်တွေ တက်လာတာမြင်ရပြီး ပေါက်ကွဲသံတချို့လည်းကြားရပါတယ်။ ကျမတို့ အဲဒီကိုသွားကြည့်တော့ ဆီတန်းမှာ မီးလောင်တာလို့သိလိုက်ရပါတယ်။ လူတွေကအတော်ထိတ်လန့်သွားကြတယ်။” လို့ စစ်တွေမြို့ခံ အမျိုးသမီး တဦးက ပြောပါတယ်။
လက်ရှိမှာတော့ မြန်မာနိုင်ငံမီးသတ်တပ်ဖွဲ့၊ ရွှေရောင်မေတ္တာဖောင်ဒေးရှင်း၊ မေတ္တာရောင်ခြည်ဖောင်ဒေးရှင်း၊ သွေးအလှူရှင်အသင်းနဲ့ ပြည်သူတို့ ပူပေါင်းငြိမ်းသတ်မှုကြောင့် မီးငြိမ်းသတ်နိုင်ခဲ့ပြီး မီးသတ်ကား ၃ စီးနဲ့ ၁ နာရီခန့်ကြာငြိမ်းသတ်ခဲ့ရတယ်လို့ သိရပါတယ်။
ဆောင်းရာသီကနေ နွေရာသီကို ကူးပြောင်းချိန်မှာ ရခိုင်ပြည်နယ်အတွင်း ဖေဖော်ဝါရီနဲ့ လက်ရှိမတ်လ ပထမပတ် မကုန်သေးခင်မှာ မီးလောင်မှုတွေ မကြာခဏဖြစ်လာတဲ့အတွက် မီးသတိထားကြဖို် မီးသတ်ဦးစီးဌာနက တိုက်တွန်းထားပါတယ်။
ပြီးခဲ့တဲ့ ဖေဖော်ဝါရီလက မီးလောင်မှုတွေကြောင့် လူ (၃) ဦးသေဆုံးတဲ့အထိဖြစ်ခဲ့ပြီး လက်ရှိ မတ်လအတွင်း မီးလောင်မှု(၂)ကြိမ်မှာတော့ နေအိမ်တွေနဲ့ စက်သုံးဆီသိုလှောင်ရုံတခု ဆုံးရှုံးထားတာဖြစ်တယ်လို့ သိရပါတယ်။
ရသေ့တောင်မြို့မှာ မနေ့ မတ်လ ၃ ရက်နေ့က မီးလောင်မှုဖြစ်ပြီး လူနေအိမ် ၄ လုံး မီးထဲပါသွားတာလည်း ရှိခဲ့တယ်လို့ သိရပါတယ်။
#voiceofmyanmar #VOM #ရခိုင် #မီးလောင်မှု
