မန္တလေး၊ ဧပြီ ၁၀- ၂၀၂၁
ရှိုင်းအောင်(VOM)
မန္တလေးမြို့မှာ မနက်ခင်း အစောပိုင်းအချိန် ဆန္ဒပြထွက်တဲ့ မြတောင်သပိတ်စစ်ကြောင်းကို အရပ်ဝတ်တွေနဲ့ လာရောက်ဖြိုခွဲခဲ့တာကြောင့် ဆန္ဒပြအဖွဲ့ကို လုံခြုံရေးပေးတဲ့ လူငယ် ၈ ဦးထက် မနည်း ဖမ်းဆီးခံခဲ့ရတယ်လို့ သိရပါတယ်။
“သပိတ်စစ်ကြောင်းက စထွက်တုန်းပဲရှိသေးတယ် တာဘောင်ရိုးပေါ်တက်ခါနီး မီးခြစ်စက်ရုံလမ်းထဲမှာ အိမ်စီးကားတွေမောင်းလာပြီး အရပ်ဝတ်တွေနဲ့ လာပြီးတော့ အသံဗုံးတွေဖောက်သွားတာ လုံခြုံရေးပေးတဲ့သူ ၈ ဦးထက်မနည်း ဖမ်းခံရတယ်” လို့ မျက်မြင်တစ်ဦးက ပြောပါတယ်။
သပိတ်စစ်ကြောင်း စ အထွက်မှာပဲ ကိုတေဇာဆန်းက ဦးဆောင်ခဲ့ပြီးတော့ ခဏအကြာမှာပြန်သွားတာကြောင့် ကိုတေဇာဆန်းကတော့ လွတ်မြောက်သွားတယ်လို့လည်း ပြောပါတယ်။
မန္တလေးမြို့မှာ ဆန္ဒပြတဲ့ သပိတ်စစ်ကြောင်းတွေ အများကြီးရှိတဲ့အထဲက မြတောင်သပိတ်စစ်ကြောင်းဟာ ဖြိုခွင်းခံရမှု အကြိမ်ရေအများဆုံး သပိတ်စစ်ကြောင်းတစ်ခုဖြစ်ပါတယ်။
မနက်ခင်းပိုင်းမှာ မြို့ခံလူငယ်တွေ ဖွဲ့စည်းထားတဲ့ မြတောင်သပိတ်စစ်ကြောင်းအဖွဲ့အပြင် နေ့လည်ပိုင်းမှာတော့ သံဃသမဂ္ဂအဖွဲ့ တစ်ကြိမ် တစ်ရက်ကို နှစ်ကြိမ်နေ့စဥ်ပုံမှန် ဆန္ဒပြ ချီတက်နေကြတာ ဖြစ်ပါတယ်။
Photo-CJ
#VOM #voiceofmyanmar #Mandalay #ဆန္ဒပြ #မြတောင် #သပိတ်စစ်ကြောင်း
