Month: July 2022

ဘဂ္ဂဒက်၊ ဇူလိုင်-၂၈-၂၀၂၂ မျိုးဆက်(VOM) အီရတ်နိုင်ငံမှာ ထောင်ပေါင်းပေါင်းများစွာသော ဆန္ဒပြသူတွေဟာ ဘဂ္ဂဒက်မြို့ရှိ လုံခြုံရေး တင်းကြပ်တဲ့ နေရာကို ချိုးဖောက်၀င်ရောက်ပြီး ပါလီမန်အဆောက်အအုံကို ဇူလိုင် ၂၇ ရက်မှာ ၀င်ရောက်စီးနှင်းခဲ့ကြပါတယ်။ ဘာသာရေးခေါင်းဆောင် မက်တာဒါအယ်လ်ဆာဒါကို ထောက်ခံသူတွေဟာ ၀န်ကြီးချုပ်အဖြစ် ပြိုင်ဘက်ကိုယ်စားလှယ်လောင်းတဦးကို အမည်စာရင်းတင်သွင်းခြင်းအပေါ် ကန့်ကွက်ဆန္ဒပြနေကြတာဖြစ်ပါတယ်။ မစ္စတာဆာဒါရဲ့ နိုင်ငံရေးမဟာမိတ်အဖွဲ့ဟာ အောက်တိုဘာလမှာ ကျင်းပတဲ့ အထွေထွေ ရွေးကောက်ပွဲမှာ အမတ်နေရာအများဆုံးအနိုင်ရရှိခဲ့ပေမယ့်လည်း နိုင်ငံရေးအကျပ်အတည်းကြောင့် အာဏာရယူနိုင်ခြင်းမရှိခဲ့ပါဘူး။ နိုင်ငံရဲ့ ပြိုင်ဘက်နိုင်ငံရေးအုပ်စုများအကြား အငြင်းပွားမှုတွေကြောင့် အစိုးရသစ်ဖွဲ့စည်းရေး အတားအဆီးတွေဖြစ်ပေါ်နေပြီးနောက် ကိုးလအကြာမှာယခုကဲ့သို့ မငြိမ်မသက်ဆန္ဒပြမှုတွေ ဖြစ်ပေါ်နေတာဖြစ်ပါတယ်။ ဆန္ဒပြသူတွေကို ရဲတပ်ဖွဲ့က မျက်ရည်ယိုဗုံးတွေ၊ မီးသတ်ပိုက်တွေနဲ့ ဖြိုခွင်းခဲ့ပြီး အခင်းဖြစ်ပွားချိန်မှာ ပါလီမန်အတွင်း၌ လွှတ်တော်အမတ်တွေရှိမနေခဲ့ပါဘူး။ ပါလီမန်ကို၀င်စီးပြီး ခုံတွေပေါ်မှာ သီချင်းဆို ကခုန်နေကြတဲ့ ဆန္ဒပြသူတွေကို အဆောက်အအုံအတွင်းကနေ ထွက်ခွာကြဖို့ လက်ရှိ၀န်ကြီးချုပ် မူစတာဖာအယ်လ်ကာဒီမီက တိုက်တွန်းပြောဆိုထားပါတယ်။ Ref: BBC…

ပေကျင်း၊ ဇူလိုင်-၂၈-၂၀၂၂ မျိုးဆက်(VOM) ကိုရိုနာဗိုင်းရပ်စ်ကို စတင်တွေ့ရှိခဲ့တဲ့ တရုတ်နိုင်ငံအလယ်ပိုင်း ဝူဟန်မြို့ ဆင်ခြေဖုံးရှိ လူတသန်းနီးပါးကို ဇူလိုင် ၂၇ ရက်မှာ သွားလာမှုကန့်သတ်ပြီး အာဏာပိုင်တွေက လော့ခ်ဒေါင်းချလိုက်ပါတယ်။ အဲဒီဒေသမှာ ရောဂါလက္ခဏာပြသခြင်းမရှိဘဲ ကိုဗစ်-၁၉ ရောဂါကူးစက်ခံရသူ လေးဦးတွေ့ရှိပြီးနောက် ဒေသခံတွေကို နေအိမ်တွေမှာဘဲ သုံးရက်ကြာနေထိုင်ကြဖို့ အမိန့်ထုတ်လိုက်တာဖြစ်ပါတယ်။ လူ ၁၂ သန်းနေထိုင်တဲ့ ဝူဟန်မြို့မှာ ပုံမှန်စစ်ဆေးမှုတွေပြုလုပ်စဉ်အတွင်း ရောဂါလက္ခဏာမပြဘဲ ကူးစက်ခံရသူ နှစ်ဦးကို တွေ့ရှိခဲ့ပြီး သူတို့နဲ့အနီးကပ်ထိတွေ့ခဲ့သူနှစ်ဦးမှာလည်း ကူးစက်မှုတွေ တွေ့ရှိခဲ့ပါတယ်။ တရုတ်နိုင်ငံဟာ အစုလိုက်အပြုံလိုက်စမ်းသပ်မှုတွေ၊ တင်းကြပ်တဲ့ကွာရန်တင်းအစီအမံတွေနဲ့ ဒေသအလိုက် ပိတ်ဆို့ကန့်သတ်ခြင်းအပါအ၀င် ကိုဗစ်-၁၉ ရောဂါလုံး၀ကူးစက်မှုမရှိရေး မူဝါဒကို ကျင့်သုံးနေပြီး ဒီမူဝါဒကြောင့် အခြားနိုင်ငံများထက် သေဆုံးမှုနှုန်း နည်းပါးနေပါတယ်။ ဒါပေမယ့် လူတွေနဲ့ စီးပွားရေးလုပ်ငန်းတွေအပေါ် တင်းကြပ်တဲ့ ကန့်သတ်မှုတွေဆက်လက် ချမှတ်နေတဲ့ အပေါ် ကန့်ကွက်မှုတွေလည်း ကြီးထွားလာနေပါတယ်။ Ref: BBC…

မော်စကို ၊ ဇူလိုင်-၂၇-၂၀၂၂ မျိုးဆက်(VOM) ၂၀၂၄ ခုနှစ်နှောင်းပိုင်းမှာ ရုရှားဟာ နိုင်ငံတကာအာကာသစခန်း(အိုင်အက်စ်အက်စ်) မှာ ပူးပေါင်းဆောင်ရွက်မှုတွေကနေ နှုတ်ထွက်ပြီး ကိုယ်ပိုင်အာကာသစခန်းကို တည်ဆောက်တော့မယ်လို့ ရုရှားနိုင်ငံက ဇူလိုင် ၂၆ ရက်မှာ ထုတ်ဖော်ပြောဆိုလိုက်ပါတယ်။ အမေရိကန်နဲ့ ရုရှားတို့ဟာ အခြားသော မဟာမိတ်တွေနဲ့အတူ နိုင်ငံတကာအာကာသစခန်းမှာ ၁၉၉၈ ခုနှစ်ကတည်းက ပူးပေါင်းဆောင်ရွက်မှုတွေကို အောင်မြင်စွာလုပ်ဆောင်ခဲ့ကြပါတယ်။ ဒါပေမယ့် ရုရှားကယူကရိန်းကို ကျူးကျော်တိုက်ခိုက်ပြီးနောက် ဆက်ဆံရေးယိုယွင်းလာခဲ့ပြီး အနောက်နိုင်ငံတွေရဲ့ အရေးယူပိတ်ဆို့မှုတွေကြောင့် နိုင်ငံတကာအာကာစခန်းမှာ ပူးပေါင်းဆောင်ရွက်မှုတွေကနေ နှုတ်ထွက်မယ်လို့ ရုရှားက ယခင်ကတည်းက ခြိမ်းခြောက်ပြောဆိုခဲ့ပါတယ်။ ဒါပေမယ့် နိုင်ငံတကာအာကာသစခန်းမှာ လုပ်ဆောင်နေတဲ့ ပူးပေါင်းဆောင်ရွက်မှုအစီအစဉ်တွေကနေ နှုတ်ထွက်မယ့် ရုရှားရဲ့ ရည်ရွယ်ချက်နဲ့ပတ်သက်ပြီး တရား၀င်အသိပေးချက် တစုံတရာမရရှိသေးကြောင်း နာဆာက ပြောဆိုထားပါတယ်။ အာကာသအေဂျင်စီငါးခုပါ၀င်တဲ့ ပူးပေါင်းစီမံကိန်းဖြစ်တဲ့ နိုင်ငံတကာအာကာသစခန်းဟာ ၁၉၉၈ ခုနှစ်ကတည်းက ကမ္ဘာပတ်လမ်းကြောင်းမှာ လည်ပတ်နေခဲ့ပြီး ထောင်နဲ့ ချီတဲ့ သိပ္ပံစမ်းသပ်မှုတွေပြုလုပ်ဖို့…

ဒေလီ၊ ဇူလိုင်-၂၇-၂၀၂၂ မျိုးဆက်(VOM) အိန္ဒိယနိုင်ငံအရှေ့ပိုင်း ဘီဟာပြည်နယ်ရှိ ခရိုင်ရှစ်ခုမှာ မိုးကြိုးပစ်မှုတွေကြောင့် တရက်ထဲ လူ ၂၀ သေဆုံးခဲ့ပါတယ်။ ဇူလိုင် ၂၇ ရက်နဲ့ ၂၈ ရက်တို့မှာ အဲဒီပြည်နယ်မြောက်ပိုင်းဒေသတွေမှာ မိုးကြိုးမုန်တိုင်းတွေ ပိုမိုဖြစ်ပွားနိုင်ကြောင်း မိုးလေ၀သတာ၀န်ရှိသူတွေက ခန့်မှန်းထားပါတယ်။ ဒေသခံတွေအနေနဲ့ ပြည်နယ်သဘာဝဘေးအန္တရာယ်ဆိုင်ရာ စီမံခန့်ခွဲမှုအာဏာပိုင်တွေရဲ့လမ်းညွှန်ချက်တွေကို လိုက်နာကြဖို့ ပြည်နယ်၀န်ကြီးချုပ် နစ်ရ်ှကူးမားက တိုက်တွန်းထားပါတယ်။ သေဆုံးသူတွေရဲ့ မိသားစုတွေအတွက် ဂရုဏာကြေး ရူပီးလေးသောင်းစီ ပေးအပ်ထားကြောင်း ပြည်နယ်၀န်ကြီးချုပ်က ဇူလိုင် ၂၆ ရက်မှာပြောပါတယ်။ အိန္ဒိယနိုင်ငံမှာ မုတ်သုန်မိုးရွာသွန်းတဲ့ ကာလတွေမှာ မိုးကြိုးပစ်တာတွေကြောင့် နှစ်စဉ်နှစ်တိုင်း လူရာနဲ့ချီပြီး သေဆုံးမှုတွေ ဖြစ်ပွားခဲ့ပါတယ်။ မိုးကြိုးပစ်မှုကြောင့် သေဆုံးမှုမြင့်မားရတဲ့ အကြောင်းရင်းတွေထဲကတခုကတော့ အိန္ဒိယနိုင်ငံမှာ အဆောက်အအုံတွေပြင်ပမှာ အလုပ်လုပ်ကိုင်သူတွေဟာ အခြားသောနိုင်ငံတွေထက် ပိုမိုများပြားတာကြောင့်ဖြစ်တယ်လို့ ကျွမ်းကျင်သူတွေက ပြောပါတယ်။ Ref: BBC Photo:Getty Images #voiceofmyanmar…