Day: September 3, 2022

ကိုလံဘို၊ စက်တင်ဘာ-၃-၂၀၂၂ မျိုးဆက်(VOM) ဇူလိုင်လအတွင်းကဖြစ်ပွားခဲ့တဲ့ လူထုဆန္ဒပြပွဲတွေကြောင့် ပြည်ပကို တိမ်းရှောင်သွားခဲ့တဲ့ သီရိလင်္ကာသမ္မတဟောင်း ဂိုတာဘာယာ ရာဇပက်ဆာဟာ စက်တင်ဘာ ၂ ရက်မှာ သီရိလင်္ကာနိုင်ငံကို ပြန်လည်ရောက်ရှိနေပြီဖြစ်ပါတယ်။ မစ္စတာရာဇပက်ဆာဟာ ထိုင်းနိုင်ငံမှာ ယာယီဗီဇာနဲ့ နေထိုင်ခဲ့ပြီးနောက် စင်ကာပူမှတဆင့် သီရိလင်္ကာကို ပြန်လာခဲ့ခြင်းဖြစ်ပြီး ၀န်ကြီးအချို့က လေဆိပ်မှာသွားရောက်ကြိုဆိုခဲ့ကြပါတယ်။ သီရိလင်္ကာနိုင်ငံသမိုင်းမှာ အဆိုးရွားဆုံးစီးပွားရေးအကျပ်အတည်းနဲ့ ရင်ဆိုင်ခဲ့ရပြီး နိုင်ငံခြားငွေပြတ်လပ်မှုကြောင့် စားနပ်ရိက္ခာနဲ့ လောင်စာဆီ ရှားပါးမှုနဲ့ပတ်သက်ပြီး ရာဇပက်ဆာရဲ့အစိုးရအပေါ် အပြစ်တင်ခဲ့ကြပါတယ်။ သမ္မတဟောင်း ရာဇပက်ဆာ နိုင်ငံကို ပြန်လာတာဟာ နောက်ထပ်ဆန္ဒပြမှုတွေဖြစ်ပွားမှာကို မလိုလားတဲ့ သီရိလင်္ကာအစိုးရသစ်အတွက် အကဲဆတ်တဲ့ကိစ္စရပ်တခုဖြစ်ပြီး သူ့ရဲ့လုံခြုံရေးအတွက် အာမခံဖို့ လိုအပ်လာမှာဖြစ်ပါတယ်။ သမ္မတဟောင်းအနေနဲ့ နိုင်ငံရေးနဲ့ အစိုးရအဖွဲ့ထဲကို ပြန်လည်၀င်ရောက်ဖို့ ကြိုးပမ်းမှုမှန်သမျှကို ဆန့်ကျင်သွားမှာဖြစ်ကြောင်း သီရိလင်္ကာဆန္ဒပြသူအချို့က ထုတ်ဖော်ပြောဆိုထားပါတယ်။ Ref: BBC Photo:PTI #voiceofmyanmar #VOM #ကိုလံဘို

ဝါရှင်တန်၊ စက်တင်ဘာ-၃-၂၀၂၂ မျိုးဆက်(VOM) အမေရိကန်ဟာ ဒေါ်လာ ၁ ဒသမ ၁ ဘီလီယံတန်ဖိုးရှိ လက်နက်တွေ ထိုင်၀မ်ကိုရောင်းချဖို့ စက်တင်ဘာ ၂ ရက်မှာ သဘောတူလိုက်ပါတယ်။ အဲဒီရောင်းချမှုမှာ ကျူးကျော်တိုက်ခိုက်မှုတွေကို ခြေရာခံဖို့ရေဒါစနစ်နဲ့ သင်္ဘောဖျက်ဒုံးကျည်၊ ဝေဟင်ပစ်ဒုံးကျည်တွေပါ၀င်ပြီး ကွန်ဂရက်မှာ မဲခွဲဆုံးဖြတ်ဖို့ လိုအပ်နေပါသေးတယ်။ ၂၅ နှစ်တာကာလအတွင်း အမေရိကန်ရဲ့အဆင့်မြင့်ထိပ်တန်းတာ၀န်ရှိသူတစ်ဦးဖြစ်သူ အမေရိကန် အောက်လွှတ်တော် ဥက္ကဌ နန်စီပလိုစီ ထိုင်၀မ်သို့ သွားရောက်ပြီးနောက်မှာ လက်နက်ရောင်းချမှုကို အမေရိကန်က သဘောတူလိုက်တာဖြစ်ပါတယ်။ ဒီကိစ္စအပေါ် တရုတ်နိုင်ငံက ကန့်ကွက်ထားပြီး လက်နက်ရောင်းချဖို့သဘောတူညီချက်ကို ရုပ်သိမ်းဖို့နဲ့ ဒီလိုမှမဟုတ်ရင် နောက်ဆက်တွဲအကျိုးဆက်တွေ ရင်ဆိုင်ရမယ်လို့ သတိပေးထားပါတယ်။ အဲဒီသဘောတူညီချက်ဟာ အမေရိကန်နဲ့ တရုတ်နိုင်ငံတို့အကြား ဆက်ဆံရေးကို ဆိုးရွားစွာထိခိုက်စေလိမ့်မယ်လို့ တရုတ်နိုင်ငံဘက်က ထုတ်ဖော်ပြောဆိုထားပါတယ်။ Ref: BBC Photo:Getty Images #voiceofmyanmar #VOM #ဝါရှင်တန်