ဇန်နဝါရီ ၂၆ – ၂၀၂၃
GG(VOM)
ပြည်ပကနေ တင်သွင်းလာတဲ့ တရုတ်မော်တော်ယာဉ်ကုမ္ပဏီ BYD Auto က ထုတ်လုပ်တဲ့ E2 အမျိုးအစား လျှပ်စစ်ကားအစီး ၄၀ ကို ရန်ကုန်နဲ့နေပြည်တော်မှာ Taxiအဖြစ် အစမ်းပြေးဆွဲသွားမယ်လို့ ပြီးခဲ့တဲ့ ရက်ပိုင်းက ထုတ်ပြန်ထားတာကို တွေ့ရပါတယ်။
“အစီး ၄၀ လောက်နဲ့ဘာမှမဖြစ်သေးဘူး ၊ နောက်ပြီးစျေးက ၇၀၀ ဆိုတော့ ဝယ်ဖို့မလွယ်ဘူး ဒီမှာက သိန်း ၆၀၀ ကျော် ၇၀၀ နီးပါး ကားဝယ်စီးနိုင်တဲ့သူက အတော်အသင့် ချမ်းသာတဲ့ သူဌေးစာရင်းဝင်နေပြီ ။အဲ့ဒီတော့ သိန်း ၆၀၀ ကျော်နဲ့ ကားဝယ်နိုင်တဲ့လူက Taxi မောင်းမှာမဟုတ်သလို သိန်း ၆၀၀ ကျော်တန်ကားကို အုံနာကြေး ယူပြီး Taxi အဖြစ်ပေးထားမှာလည်း မဟုတ်ဘူး”လို့ အငှားယာဥ်မောင်းတဦးကပြောပါတယ်။
နောက်ထပ် အငှားယာဥ်မောင်တဦးကလည်း “အငှား ကားမောင်းမယ့်သူတွေက ဝယ်တာထက် အုံနာကြေးပေးပြီးမောင်းရမယ့်သူက များတယ်။ဒီတော့ ကားတင်သွင်းတဲ့ကုမ္ပဏီအနေနဲ့ ပြန်ငှားမှ ဒီလျှပ်စစ်ကားတွေက တွင်ကျယ်လာမယ်၊ငှားတဲ့နေရာမှာလည်း စျေးနူန်းကရှိသေးတယ်၊ ဂက်စ်နဲ့ ဆီကားထက် အုံနာကြေး အများကြီးပိုနေရင်လည်း အလုပ်မဖြစ်ဘူး၊ မရှိလို့ အငှားကားမောင်းကြတာပါ ” လို့ ပြောပါတယ်။
ဒါကြောင့် လက်ရှိပြေးဆွဲနေတဲ့ ဂက်စ်၊ ဆီကား Taxi အရေအတွက်နဲ့အညီ လျှပ်စစ်ကားတေကို အငှားစနစ်နဲ့ ချပေးပြီး ပြေးဆွဲပေးနိုင်မှသာ အတိုင်းအတာ တခုအထိ ပြောင်းလဲမှုရှိနိုင်မှာဖြစ်တယ်လို့ Taxi သမားအချို့ရဲ့ ပြောပြချက်အရ သိရပါတယ်။
လျှပ်စစ်ကားတွေကို လက်ရှိ ဆီကားတွေ အငှားစျေးနူန်းအတိုင်းသာ ငှားရမ်းမောင်းနှင်ခွင့်ရမယ်ဆိုရင် အငှားယာဥ်မောင်းတွေအတွက် အဆင်ပြေသလို စီးနင်းမယ့်ခရီးသည်တွေအတွက်လည်း သင့်တင့်တဲ့စျေးနူန်း နဲ့ သက်တောင့်သက်သာ စီးနင်းနိုင်မှာဖြစ်တယ်လို့ ပြောပါတယ်။
“လျှပ်စစ်ကားကို ဇိမ်နဲ့စီးရလို့ဆိုပြီး ၃၀၀၀ တန် ခရီးကို ၅၀၀၀ ဘယ်သူမှမပေးပါဘူး၊ကားက အရင်းအနှီးကြီးတာဆိုတော့ အသင်းအဖွဲ့တွေ စုပေါင်းဖွဲ့စည်းလုပ်ရင်တော့ တမျိုးပေါ့။မဟုတ်ရင်တော့ အဆင်မပြေပါဘူး ၊ လျှပ်စစ်မီးကလည်း မမှန်ဘူး”လို့ နောက်ထပ် Taxi အငှားယာဥ်မောင်းသူတဦးက သုံးသပ်ပါတယ်။
လျှပ်စစ်ကားတွေအတွက် အားသွင်းစခန်း(Charging station)တွေ အများကြီးလိုအပ်သလို ၊ အဖွဲ့အစည်းတွေနဲ့ အစိုးရဌာနတွေ ပူးပေါင်းဆောင်ရွက်ဖို့လည်း လိုအပ်တယ်လို့ သုံးသပ်ကြပါတယ်။
” အုံနာကလည်း သိန်း ၇၀၀နီးနီး ရင်းရမယ်ဆိုတော့ နေ့တွက်ကြေး ဘယ်လောက်လောက်ဖြစ်မလဲ ၊ ဘဏ်တိုး ထားရင်တောင် တလ ၄ သိန်းလောက်ရနေမယ်၊အဲ့ဒီလိုမဟုတ်ဘဲ တစ်ကျပ်တိုးနဲ့ အပြင်ကိုပေးထားရင်တောင် တစ်လ ၇သိန်းရမယ်၊ အုံနာအနေနဲ့ သိန်း ၇၀၀ရင်းပြီး ကားဆွဲ၊ ပြန်ရောင်းတဲ့အခါကျရင်ရော အရင်းပြန်ရနိုင်ပါ့မလား၊ ဘယ်သူက ပြန်ဝယ်ပေးမှာလဲ”လို့ နောက်ထပ် အငှားယာဥ်မောင်းကပြောပါတယ်။
အမျိုးသားအဆင့် ဦးဆောင်ကော်မတီကတော့ လျှပ်စစ်ကားတွေကို ရန်ကုန်လေဆိပ်အခြေပြုနဲ့ NPK Motors တင်သွင်းတဲ့ (၁၀)စီးကို သပြေကုန်ဈေး(နေပြည်တော်)အခြေပြု တက္ကစီယာဉ်တွေအဖြစ် ပြေးဆွဲမှာဖြစ်ပြီး ကနဦးရှေ့ပြေးစီမံကိန်းကာလကို ၂၀၂၃ ခုနှစ် ဒီဇင်ဘာလ ၃၁ ရက်အထိ သတ်မှတ်ထားတယ်လို့သိရပါတယ်။
လက်ရှိမှာတော့ ကုမ္ပဏီတွေအနေနဲ့ လျှပ်စစ်ကားတွေ တင်သွင်းထုတ်လုပ်နိုင်ရေး၊ Charging Station တွေ တည်ဆောက်နိုင်ရေးနဲ့ After Sale Services လုပ်ငန်းတွေ ဆောင်ရွက်နိုင်ရေးတို့ကို ညှိနှိုင်းဆွေးနွေးပြီး ခွင့်ပြုပေးနေတယ်လို့ သိရပါတယ်။
#voiceofmyanmar #VOM #လျှပ်စစ်ကား #Taxi #အငှားယာဥ်မောင်းသမားတွေသုံးသပ်ချက်
