မတ် ၂၂ – ၂၀၂၃
GG(VOM)
တောင်ငူခရိုင်ထဲမှာ ရန်ကုန် – မန္တလေး ရထား ၂စင်း လမ်းချော်ပြီးတိမ်းမှောက်မှုဖြစ်ပွားခဲ့သလို ရထားလမ်းပေါက်ကွဲမှုကြောင့် ထိခိုက်ဒဏ်ရာရသူတွေလည်းရှိခဲ့တယ်လို့သိရပါတယ်။
ဖြစ်စဥ်က ဒီနေ့ မတ်လ ၂၂ ရက်နေ့ မနက်အစောပိုင်း အုတ်တွင်းမြို့နယ်၊ဇေယျဝတီဘူတာနဲ့ ညောင်ခြေထောက် ဘူတာကြားမှာ ရထားလမ်းပေါက်ကွဲမှုဖြစ်ကာ ရထားပျက်စီးမှုရှိခဲ့သလို ရိုးရိုးတန်းတွဲ-၁ ခုံအမှတ် (၃၃/၃၄) မှာ လိုက်ပါလာတဲ့ ခရီးသည် ၂ယောက်လည်း ထိခိုက်ဒဏ်ရာရရှိခဲ့တာဖြစ်ပါတယ်။
” အခုမနက်ပြောရမှာပေါ့ ၁ နာရီထိုးဖို့ ၁၀ မိနစ်အလိုလောက်မှာ ရထားပေါက်ကွဲမှုဖြစ်တာ။ ရန်ကုန်ဘူတာကြီးကနေ ထွက်လာတဲ့ ရထားပေါ့။ရထားပေါ်မှာ ဒုရဲအုပ် အဖွဲ့လုံခြုံရေးပါတယ်၊ခရီးသည်တွေ ၇၀၀ လောက်ပါတယ်လို့သိရတယ်၊မိုင်းကွဲတော့ ဒဏ်ရာကသူတွေကို ဆေးရုံကိုပို့လိုက်ပြီးရထားက ဆက်သွားတယ် “လို့အုတ်တွင်း ဒေသခံတဦးကပြောပါတယ်။
ဒဏ်ရာရသူတွေကတော့ ဦးလေးလွင် အသက် ၄၅ နှစ် နဲ့ ဦးဟီရာကျန် အသက်၄၀နှစ်တို့ ဖြစ်ပြီး ဒဏ်ရာကမစိုးရိမ်ရဘူးလို့ သိရပါတယ်။
ရထားလမ်းမိုင်းကွဲမှုမှာ ရထားစက်ခေါင်းမှန်ကွဲပြီး၊ ရထား ပထမတွဲက မှန်ပြူတင်း ၄ ချပ်၊ ဝင်ပေါက်တံခါးမကြီးနဲ့ တံခါးအလူမီနီယံဘောင်တွေ ပျက်စီးခဲ့တယ်လို့သိရပါတယ်။
ရထားတိမ်းမှောက်မှုကတော့ မနေ မတ်လ ၂၁ ရက် မနက်အစော ၃ နာရီကျော်လောက်မှာ တောင်ငူဘူတာအထွက်မှာ ရထားလမ်းချော်ခဲ့တာဖြစ်ကြောင်း ရထားတိမ်းမှောက်ခဲ့ပေမယ့် ကြီးကြီးမားမားထိခိုက်ဒဏ်ရာရတာမရှိခဲ့ဘူးလို့ သိရပါတယ်။
တိမ်းမှောက်ခဲ့တဲ့ ရထားကတော့ ရန်ကုန် – မန္တလေး အမှတ် ၅ အဆန် လေအိတ် အမြန်ရထားဖြစ်တယ်လို့သိရပါတယ်။
ပေါက်ကွဲမှုဖြစ်ခဲ့တဲ့ရထားကတော့ ရန်ကုန်-မန္တလေး အမှတ်(၃)အဆန် ရထားဖြစ်တယ်လို့သိရပါတယ်။
ပြီးခဲ့တဲ့ နှစ်တုန်းကလည်း မော်လမြိုင်ရထားလမ်းမှာ ရထားလမ်းမိုင်းပေါက်ကွဲမှုတွေဖြစ်ခဲ့တာတွေရှိခဲ့ပါတယ်။
#voiceofmyanmar #VOM #အမြန်ရထား #မိုင်းကွဲ၊လမ်းချော်မှု
