ဖေဖော်ဝါရီ ၊ ၂၇ ၊ ၂၀၂၄
SP ( VOM)
စစ်ကိုင်းတိုင်း ၊ ရွှေဘိုခရိုင် ၊ ရွှေဘိုမြို့နယ်မှာ ဒီရက်ပိုင်းအတွင်း လူသတ်မှုတွေ ဆက်တိုက်ဖြစ်နေတယ်လို့ ဒေသခံတွေဆီက သိရပါတယ်။
ဒီရက်ပိုင်းအတွင်း ရွှေဘိုနယ်မှာ သတ်ဖြတ်ခံရတာတွေနဲ့ ပတ်သက်ပြီး ဒေသခံ ပရဟိတသမားတယောက်က ” ဒီရက်ပိုင်းအတွင်း ရွှေဘိုနယ်မှာ သတ်ဖြတ်ခံရတာတွေ အရင်ကထက်စာရင် ပိုပြီးတော့ အဖြစ်များလာတယ် ၊ ဖေဖော်ဝါရီ ၁၈ ရက်က ရွှေဘိုမြို့ ၊ အမှတ် ၇ ရပ်ကွက် ၊ မစိုးရိမ် ( အနောက်)ကျောင်းတိုက်မှာ သီတင်းသုံး နေထိုင်တဲ့ ဆရာတော် ဥူးဝိလာသ သက်တော် ၅၅ နှစ် ၊ ဝါတော် ၃၁ ဝါ ဆိုတဲ့ ဘုန်းကြီးတပါးနဲ့ အသတ်ခံရတယ်။ ဘုန်းကြီးရဲ့ မိဘနှစ်ယောက်ကို ဒေသတွင်း လက်နက်ကိုင် PDF အဖွဲ့တွေက တဂဏန်ရွာဘက်ကို ဖမ်းဆီးခေါ်ဆောင်သွားတယ် ၊ ဘုန်းကြီးရဲ့ မိဘ နှစ်ယောက်ကတော့ အခုထိ အဆက်သွယ် မရသေးဘူး ၊ ပြီးခဲ့တဲ့ ဖေဖော်ဝါရီ ၁၅ ရက်က ရွှေဘိုမြို့နယ် ၊ မြင်းစီးကျေးရွာနားက ဆင်နှံမောင်ကွင်းတောမှာ မိသားစု ခြောက်ယောက် အသတ်ခံရတယ် ၊ အသတ်ခံရတဲ့ မိသားစုက မြင်းစီးကျေးရွာ ရွေးကောက်ပွဲ ကော်မရှင် ဥက္ကဌဟောင်း ဦးလင်း ၅၅ နှစ် ၊ သူ့မိန်းမ ဒေါ်မြသန်း ၅၅ နှစ် ၊ ယောက္ခမဖြစ်သူ ဒေါ်ဆင်နံ ၇၀ နှစ် ၊ ဒေါ်ဆန်းမင်း ၄၂ နှစ် ၊ မချစ်စုအောင် ၂၄ နှစ် (ကိုယ်ဝန်ဆောင်မိခင်) ၊ သူ့သား မောင်ဇေထူးအောင် ၃ နှစ်ဖြစ်တယ် ” လို့ ပြောပါတယ်။
အဲ့ဒီ လူသတ်မှုတွေနဲ့ ပတ်သက်ပြီး ရွှေဘိုမြို့နယ်ရဲတပ်ဖွဲ့မှူးရုံးက အမှုဖွင့်အရေးယူထားတယ်လို့ သိရပါတယ်။
သီးလုံကျေးရွာမှာ မနေ့ ဖေဖော်ဝါရီ ၂၆ ရက် ညနေပိုင်းက ပြည်သူ့စစ်တပ်ဖွဲ့ဝင် သုံးယောက်ဖမ်းဆီးခံ ရပြီးနောက် နှစ်ယောက်ကို ပစ်သတ်သွားပြီး ကျန်တယောက်က ပျောက်ဆုံးနေတယ်လို့ ဒေသခံတွေဆီက ပြောပါတယ်။
ဒီ အကြောင်းနဲ့ ပတ်သက်ပြီး ဒေသခံတယောက်က ” မနေ့က ညနေပိုင်း ၅ နာရီအချိန်မှာ ကင်းချိန်းတယ် ၊ အဲ့ဒီအချိန် ဒေသတွင်း လက်နက်ကိုင် PDF တွေက ကင်းသမား သုံးယောက်ကို ဝင်ရောက်ဖမ်းဆီးသွားတယ် ၊ အဲ့ဒီနောက် ကင်းသမား သုံးယောက်ထဲက နှစ်ယောက်ကိုတော့ သတ်သွားတယ် ၊ ကျန်တယောက်က အခုထိ ဆက်သွယ်မရသေးဘူး” လို့ ပြောပါတယ်။
မနေ့က ညနေပိုင်းကလည်း စစ်ကိုင်းတိုင်း ကလေးမြို့ ၊ ခိုင်ကမ်းကျေးရွာနားမှာ တိုက်ပွဲတွေဖြစ်ပွားပြီး ထိခိုက်သေဆုံးမှုတွေရှိတယ်လို့ သိရပါတယ်။
ကလေးခရိုင် လုံခြုံရေးအဖွဲ့နဲ့ နီးစပ်သူတယောက်က ” ခိုင်ကမ်းရွာနားမှာ ထိတွေ့မှုဖြစ်တယ် ၊ မနေ့က ညနေ ၄ နာရီလောက်ကဖြစ်တယ် ၊ အဲ့ဒီတိုက်ပွဲမှာ ပြောက်ကျားယူနီဖောင်းဝတ် အမျိုးသား လေးလောင်း ၊ AK-47 သေနတ် ၁ လက် ၊ လက်လုပ်သေနတ် ၁ လက် ၊ AK ကျည်အိမ် ၃ ခု ၊ ကျည်ကာဦးထုပ် ၁ လုံး သိမ်းဆည်းရမိတယ်” လို့ ပြောပါတယ်။
Photo Crd: Original Uploader
