ဖေဖော်ဝါရီ ၁၈ – ၂၀၂၅
SS (VOM)
ပြည်ပနိုင်ငံတွေကနေ ခွင့်နဲ့ မြန်မာနိုင်ငံကို ပြန်လာမယ့် အလုပ်သမားတွေကို နစက က ပြည်ပပြန်လည် ထွက်ခွာခွင့် ကန့်သတ်ထားတယ်လို့ အေဂျင်စီလုပ်ငန်းရှင်တွေဆီက သိရပါတယ်။
အသက် ၁၈ နှစ်ကနေ ၃၅ အတွင်း အမျိုးသားတွေကို ကန့်သတ်လိုက်တာဖြစ်ပြီး ဒီကန့်သတ်မှုမှာ အလုပ်အကိုင်ပတ်စ်ပို့ (PJ) နဲ့ အလည်အပတ် နိုင်ငံကူးလက်မှတ် (PV) အမျိုးအစားနှစ်ခုလုံး အကျုံးဝင်တယ်လို့ သိရပါတယ်။
“အခုလို ကန့်သတ်ဖို့ အလုပ်သမားဝန်ကြီးဌာနက ညွှန်ကြားထားတာပါ။ တရားဝင် စာထုတ်ပြီး ညွှန်ကြားတာတော့ မဟုတ်ဘူး။ ပြီးခဲ့တဲ့ သုံးရက်လောက်က နှုတ်မိန့်နဲ့ ညွှန်ကြားလာတာ။ ဒါက ညွှန်ကြား ချက်အသစ်လို့ သိရတယ်။ နောက်ပိုင်းလည်း ဒီထက် ပိုကြပ်လာဖို့ရှိနေတယ်” လို့ ပြည်ပအလုပ်အကိုင် အေဂျင်စီ အကျိုးဆောင်တယောက်က ပြောပါတယ်။
လက်ရှိ မြန်မာနိုင်ငံမှာ အသက် ၁၈ နှစ်မှ အသက် ၃၅ နှစ်အတွင်း အမျိုးသားတွေကို ပြည်ပနိုင်ငံတွေဆီ သွားရောက် အလုပ်လုပ်ကိုင်ခွင့် ပိတ်ပင်ထားပြီး အမျိုးသမီးတွေနဲ့ အသက် ၃၅ နှစ်အထက် အမျိုးသားတွေကိုတော့ ပြည်ပကို သွားရောက် အလုပ်လုပ်ခွင့် ပြုနေဆဲဖြစ်တယ်လို့ သိရပါတယ်။
“အခုကတော့ အမျိုးမျိုးကို တင်းကျပ်နေတာပါပဲ။ အခုဖြစ်နေတဲ့ အခြေအနေတွေနဲ့ မြန်မာပြည် ပြန်လာဖို့ ဆိုတာကလည်း မဖြစ်နိုင်သေးပါဘူး။ တချို့ အလည် ပြန်နေတဲ့ သူတွေတော့ရှိတယ်။ ဘာ့ကြောင့်ပြန်ကြလဲ၊ စဉ်းစားမရဘူး။ ပြန်မထွက်ဖို့ ရည်ရွယ်ထားရင်တော့လည်း ပြန်ပေါ့လေ။ အရင်လို ထွက်လို့လွယ်ရင်တော့ လူတိုင်း အလည်ပြန်လာချင်တာပေါ့” လို့ ပြည်ပရောက် မြန်မာလုပ်သားတယောက်က ပြောပါတယ်။
ဒါအပြင် ပြီးခဲ့တဲ့ ဖေဖေါ်ဝါရီ ၁၅ ရက်နေ့က အလုပ်သမားဝန်ကြီး ဦးချစ်ဆွေနဲ့ ပြည်ပအလုပ်အကိုင် ဝန်ဆောင်မှု လုပ်ငန်းရှင်များအသင်းချုပ် (MOEAA) တို့ တွေ့ဆုံတဲ့ အစည်းဝေးမှာလည်း ပြည်ပအလုပ်အကိုင် အေဂျင်စီ လိုင်စင်ကြေးအတွက် ငွေအပေါင်ကြေး တိုးတောင်းဖို့နဲ့ လုပ်သားစေလွှတ်မှုကို တလကို ရာဂဏန်းသာ ခွင့်ပြုဖို့ ဆွေးနွေးပြောကြားခဲ့တယ်လို့ အေဂျင်စီ အကျိုးဆောင်က ပြောပါတယ်။
“အစည်းအဝေးမှာ ဝန်ကြီးက ဘယ်လောက် တိုးကောက်မယ် ဆိုတာကိုတော့ အတိအကျ ပြောမသွားဘူး။ လိုင်စင်ကြေးအတွက် အပေါင်ငွေ တိုးကောက်ဖို့ရှိတယ် ဆိုတာလောက်ကိုပဲ သဘောလောက်သာ ပြောသွားတာ။ နောက်တခု ပြည်ပကို လုပ်သားစေလွှတ်တဲ့ ဦးရေကိုလည်း နိုင်ငံအလိုက် လျှော့ချ ကန့်သတ်တာတွေ ပြုလုပ်ဖို့ ပြောတယ်” လို့ သူက ပြောပါတယ်။
အဲဒီ အစည်းဝေးမှာ ပြည်ပကို လုပ်သားစေလွှတ်တဲ့ အရေအတွက်ကို ထိုင်းနိုင်ငံကို တလလျှင် အလုပ်သမားအရေအတွက် အယောက် ၂၀၀ ၊ ဂျပန်နိုင်ငံကို အယောက် ၂၀၀ ၊ မလေးရှားနိုင်ငံကို အယောက် ၁၀၀ နဲ့ စင်္ကာပူနိုင်ငံကို အယောက် ၅၀ စသဖြင့် အရေအတွက်ကန့်သတ် စေလွှတ်ရမယ့်အပြင် သတ်မှတ်ထားတဲ့ အချက်တွေနဲ့ ကိုက်ညီမှသာ စေလွှတ်ခွင့်ပြုမှာ ဖြစ်ကြောင်းကိုလည်း ထပ်မံ ပြောကြားခဲ့တယ်လို့ ဆိုပါတယ်။
“ဒီက အလုပ်ထွက်လုပ်မယ့်သူတွေလည်း ထွက်မရ။ ပြန်လာတဲ့သူတွေလည်း ပြန်ထွက်မရ။ နောက်ပြီး ပြည်ပအလုပ်အကိုင်ကို လူဦးရေ ကန့်သတ်ထားတာတွေလည်း ရှိလာတော့ ကျွန်တော်တို့ အေဂျင်စီတွေလည်း အတော်လေးကို လုပ်ရကိုင်ရခက်လာတယ်။ အလုပ်မဖြစ်တော့ဘူးပေါ့။ ရေရှည်ဆို ဒီအလုပ် ဆက်လုပ်ဖို့တောင် မလွယ်တော့ဘူး” လို့ သူက ပြောပါတယ်။
ဒါအပြင် အလုပ်သမားဝန်ကြီးက ဖေဖော်ဝါရီ ၁၃ ရက်နေ့က ရန်ကုန်မြို့၊ ဒဂုံမြို့သစ် (မြောက်ပိုင်း) မြို့နယ်ရှိ ကျွမ်းကျင်မှုလေ့ကျင့်ရေး သင်တန်းကျောင်းကို သွားရောက်စစ်ဆေးရာမှာလည်း ပြည်ပကို သွားရောက်လုပ်ကိုင်နေတဲ့ အလုပ်သမားစာရင်းတွေ ရရှိနိုင်ရေး၊ နိုင်ငံအလိုက် လုပ်သားထွက်ခွာမှု စာရင်းတွေကတဆင့် လိုအပ်တဲ့ မူဝါဒတွေ ရေးဆွဲချမှတ်နိုင်ရေးတို့ကို အလုပ်သမားဝန်ကြီးဌာနလက်အောက် အရာရှိတွေကို မှာကြားခဲ့တယ်လို့ သိရပါတယ်။
ဒါအပြင် မြန်မာနိုင်ငံကနေ ပြည်ပကို သွားရောက် အလုပ် လုပ်ကိုင်မယ့် အလုပ်သမားတွေအနေနဲ့ စနစ်တကျ မှတ်ပုံတင်ထားရှိဖို့ လိုအပ်ပြီး ဒီအတွက် ပြည်ပအလုပ်အကိုင် အလုပ်သမား သက်သေခံကတ် (OWIC) တွေရဲ့ အချက်အလက်တွေ လုံခြုံမှုရှိအောင် ထိန်းသိမ်းဖို့ကိုလည်း မှာကြားခဲ့တယ်လို့ သိရပါတယ်။
ဆက်လက်ပြီး ဝန်ကြီးက အလုပ်သမားစေလွှတ်တဲ့ ပြည်ပအလုပ်အကိုင် အကျိုးဆောင်လိုင်စင်ရ အေဂျင်စီတွေအနေနဲ့ ဝင်ငွေခွန်တွေ၊ ကုန်သွယ်ခွန်တွေကို စနစ်တကျ ပေးဆောင်စေကာ နိုင်ငံအတွက် ဝင်ငွေတွေရရှိအောင် လုပ်ဆောင်ဖို့ကိုလည်း ပြောဆိုခဲ့တယ်လို့ သိရပါတယ်။
Photo – CJ
