ဖေဖော်ဝါရီ ၂၂ -၂၀၂၃
GG(VOM)
မကွေးတိုင်း၊ ပခုက္ကူမြို့က New Day ဆီဆိုင်မှာ ညဘက် ဆီချပြီးနောက် ကားအောက်မှာ ဖခင်အပါအဝင် မိသားစုလိုက်အတူအိပ်နေရာကနေ ပျောက်ဆုံးသွားတဲ့ အသက် ၆ နှစ်အရွယ် သားဖြစ်သူကို ဒီနေ့ဖေဖော်ဝါရီလ ၂၂ ရက် မနက်စောက သေဆုံးလျက်ပြန်လည်တွေ့ရှိခဲ့ရတယ်လို့ သိရပါတယ်။
ကလေးငယ်ဟာ ပြီးခဲ့တဲ့ဖေဖော်ဝါရီ၁၈ ရက် ညပိုင်းကတည်းက ပျောက်ဆုံးတာဖြစ်ပြီး ၄ ရက်အကြာမှာ အဲ့ဒီဆီဆိုင်နဲ့ကပ်လျက် အာဇာနည်ဗိမာန်ထဲက ရေကန်ထဲမှာ သေဆုံးနေတာတွေ့ရှိရတာဖြစ်တယ်လို့သိရပါတယ်။
” အခုမနက်ပဲ ကလေးအဖေဖုန်းဆက်လာတာ၊ပြန်တွေ့ပြီပေါ့ ရေကန်ထဲမှာ၊ အဲ့ဒီရေကန်က ဆီဆိုင်နဲ့ကပ်လျက်ပဲလေ၊ကလေးက ယောင်ပြီးလျှောက်သွားမိလားမပြောတတ်ဘူး။ကလေးအဖေက မိသားစုကိုခေါ်လာတာ ပုဂံဘက်ဘုရားဖူးသွားကြမယ်ဆိုပြီးထင်ပါတယ်။ အိပ်တာကလည်း မိသားစုတွေအတူအိပ်နေရာကနေ ကလေးကပျောက်သွားတာ၊အိပ်နေကြတော့ဘယ်လိုထသွားလဲ မသိလိုက်ကြဘူးပေါ့ “လို့ ကူညီပေးခဲ့တဲ့ ပခုက္ကူမြို့ခံတဦးကပြောပါတယ်။
ကလေးငယ်ပျောက်ဆုံးပြီးကတည်းက မိသားစုလိုက် ပခုက္ကူကနေမပြန်ဘဲ ကလေးကိုလိုက်လံရှာဖွေခဲ့တာဖြစ်ကြောင်း၊ ကလေးမိသားစုဟာ ပဲခူးမြို့ကဖြစ်တယ်လို့ သိရပါတယ်။
ရေကန်ထဲကနေ ဆယ်ယူရရှိတဲ့ ကလေးငယ်ရဲ့ ရုပ်အလောင်းရဲ့ ခန္ဓာကိုယ်ပြင်ပမှာ ဒဏ်ရာမှ မတွေ့ရှိရတာကြောင့် ရေနစ်သေဆုံးခြင်းဖြစ်နိုင်ကြောင်းနဲ့လက်ရှိမှာ ကလေးငယ်ရုပ်အလောင်းကို ပခုက္ကူဆေးရုံ ရင်ခွဲရုံကို ကူညီပို့ဆောင်ပေးခဲ့တယ်လို့ သိရပါတယ်။
#voiceofmyanmar #VOM #ပခုက္ကူ #ပျောက်ဆုံးကလေး #သေဆုံးလျက်ပြန်တွေ့
