ဩဂုတ် ၃၁ – ၂၀၂၃
GG( VOM)
ရန်ကုန်၊ မရမ်းကုန်းမြို့နယ် ၊ဘုရင့်နောင်ပွဲရုံဝန်းထဲက ” သုခရှင် “ဆန် နှင့်အထွေထွေပစ္စည်းရောင်းဝယ်ရေးဆိုင် ဓားပြတိုက်သူတွေကို မနေ့ ဩဂုတ် ၃၀ ရက်မှာ လုယက်သွားတဲ့ ငွေသား တွေနဲ့အတူ ဖမ်းဆီးရမိခဲ့တယ်လို့ သိရပါတယ် ။
” ဟုတ်တယ် ၉ ယောက်မိတာ၊ တိုက်တဲ့နေ့ကသိတာက အထဲဝင်လာတဲ့ ၆ ယောက်ပဲသိလိုက်ကြတာ၊ အပြင်မှာ ကျန်တာကိုမသိကြဘူးလေ၊အခုဖမ်းမိပြီး စစ်မှ ၉ ယောက်ဖြစ်နေတာကို သိကြတာပါ။ပိုက်ဆံရော ဖုန်းရော ပြန်ရတယ်လို့ သိရပါတယ် “လို့ ဘုရင့်နောင်ပွဲရုံ ကုန်သည်တစ်ဦးကပြောပါတယ်။
လက်ရှိဖမ်းဆီးရမိသူတွေက ပြည်ဖြိုးအောင် (ခ)သာဓု၊ မောင်မောင်ထွေး၊ ရှိုင်းထက်အောင် (ခ)သံချောင်း၊ ကောင်းစည်သူဖြိုး (ခ)လှစည်သူ၊ကျော်စွာလင်း (ခ)ကျားကြီး၊ လင်းလင်းနိုင် (ခ)ကိုလင်း၊ နိုင်ထက်လင်း (ခ)အဖိုးကြီးနဲ့ အောင်ကျော်ကျော် (ခ)အောင်ကျော်တို့ ဖြစ်တယ်လို့ သိရပါတယ်။
ကျူးလွန်သူတွေနဲ့အတူ ငွေကျပ် သိန်း ၁၈၀ ကျော်နဲ့ ဟန်းဖုန်းတစ်လုံး ပြန်လည်သိမ်းဆည်းရမိခဲ့ကြောင်း ၊ လက်ရှိမှာ မရမ်းကုန်မြို့နယ်ရဲစခန်းမှာ ထိန်းသိမ်းထားတယ်လို့ သိရပါတယ်။
သုခရှင် ဆန်ဆိုင်ကို ဩဂုတ် ၂၉ ရက် နေ့လယ်ပိုင်းမှာ ဓားပြတိုက်ကာ ဆိုင်ကနေ ငွေသိန်း ၂၀၀ လောက်ကို လုယက်သွားတာဖြစ်ကြောင်း ၊ ကျူးလွန်သူတွေဖမ်းမိတဲ့ကိစ္စနဲ့ပတ်သက်ပြီး သုခရှင် ဆန်ရောင်းဝယ်ရေးလုပ်ငန်းကို VOM အနေဖြင့် ဖုန်းနဲ့ဆက်သွယ်ခဲ့ပေမယ့် ဆက်သွယ်လို့မရရှိခဲ့ပါဘူး။
ဒီလ ဩဂုတ် ၈ ရက်ကလည်း ရန်ကုန်၊ဗိုလ်တထောင်မြို့နယ်၊ (၅)ရပ်ကွက်၊ ၅၃ လမ်း၊ အမှတ် (၂၉) မြေညီထပ်က Best Century Travel and Tour လုပ်ငန်း ဓားပြတိုက်ခံရပြီး သိန်း ၁၅၀၀ ပါသွားခဲ့ပေမယ့်လည်း တရားခံတွေနဲ့အတူငွေသားကို နာရီပိုင်းအတွင်း ချက်ခြင်း ဖမ်းဆီးရမိခဲ့တယ်လို့ သိရတယ်။
#voiceofmtanmar #VOM #ရန်ကုန် #ဆန်ဆိုင်ဓားပြမှု #ဖမ်းမိ
