ရန်ကုန်၊ ဒီဇင်ဘာ ၁၁ -၂၀၂၃
GG (VOM)
ကယားပြည်နယ် ၊လွိုင်ကော်မြို့မှာရှိတဲ့ ပြည်နယ်အဆင့် ရဲဌာနချုပ်စခန်းကို KNPDF ဦးဆောင်တဲ့ ဒေသတွင်းလက်နက်ကိုင် ပူးပေါင်းတပ်ဖွဲတွေက ထိန်းချုပ်လိုက်ပြီဖြစ်တယ်လို့ သတင်းတွေ ထွက်ပေါ်နေပါတယ်။
ဒီဇင်ဘာလ ၉ ရက်နေ့ည ပိုင်းမှာ ပြည်နယ်ရဲဌာနချုပ်ကို ထိန်းချုပ်ခဲ့တာဖြစ်ပြီး လက်နက်တွေ၊ ရဲကားတွေ ၊ ဆိုင်ကယ်တွေ အပါအဝင် ပစ္စည်းတွေကို ရရှိခဲ့တယ်လို့ KNDF ရဲ့သတင်းထုတ်ပြန်မှုအရ သိရပါတယ်။
” ဟုတ်တယ် အဲ့ဒီရဲစခန်းကပြည်နယ်အဆင့်ရဲစခန်းပေါ့၊ အဲ့တဝိုက်မှာတိုက်ပွဲတွေဖြစ်နေတာကတော့ကြာပြီ၊ ဘယ်သူမှလည်းမသွားရဲဘူး ။ ရဲစခန်းကိုသိမ်းလိုက်ပြီဆိုတာ ကျနော်တို့လည်း မနေ့က PDF ဘက်ကသတင်းထုတ်တော့မှ သိရတာ၊ ” လို့ လွိုင်ကော်ဒေသခံကပြောပါတယ်။
ပြည်နယ်ရဲဌာနချုပ်စခန်း တိုက်ပွဲမှာ စစ်တပ်နဲ့ PDF တွေ နှစ်ဖက်လုံး အကျဆုံးတွေရှိခဲ့ကြောင်း ၊ PDF တွေဘက်က ၆ ယောက်သေဆုံးခဲ့တယ်လို့ KNDF ရဲ့ ဥက္ကဋ္ဌခေါင်းဆောင်ဖြစ်သူ ခွန်းဘီထူးက ကယားပြည်နယ် ဒေသတွင်း မီဒီယာကိုဖြေဆိုထားတာတွေ့ရပါတယ်။
ပြည်နယ်အဆင့်ရဲစခန်း ထိန်းချုပ်ခံလိုက်ရတာနဲ့ပတ်သက်လို့ နစက ဘက်ကတော့ သတင်းထုတ်ပြန်တာ မတွေ့ရှိရသေးပေမယ့် ထိတွေ့ တိုက်ပွဲတွေဖြစ်ပွားနေတယ်လို့တော့ ထုတ်ပြန်ထားပါတယ်။
လက်ရှိ အချိန်ထိ နစက လုံခြုံရေးတပ်တွေ နဲ့ ဒေသတွင်းလက်နက်ကိုင်တွေအကြား လွိုင်ကော်မှာ ပစ်ခတ်မှုတွေကတော့ ရှိနေဆဲဖြစ်တယ်လို့ သိရပါတယ်။
ဒီဇင်ဘာလ ၁၀ ရက်နေ့တုန်ူကလည်း လွိုင်ကော်မြို့က နှစ်ပေါင်း ၃၀ ကျော်သက်တမ်းရှိပြီး ဆိုင်ခန်းပေါင်း ထောင်ချီရှိတဲ့ သီရိမင်္ဂလာစျေးကြီးထဲကို လက်နက်ကြီးကျရောက်ပေါက်ကွဲလို့ စျေးတခုလုံးမီးလောင်ပျက်စီးခဲ့သလို တောင်ကွဲစေတီလည်း လက်နက်ကြီးထိမှန်ပြီး ထိခိုက်မှုရှိခဲ့တယ်လို့ သိရပါတယ်။
သီရိမင်္ဂလာစျေး မီးလောင်ပျက်စီးမှုက ဒရုန်းဗုံးချတိုက်ခိုက်ခံရပြီး မီးလောင်ကျွမ်းခဲ့တာဖြစ်တယ်လို့ နစက ဘက်ကသတင်းထုတ်ပြန်ထားပါတယ်။
လွိုင်ကော်မြို့မှာ ဒေသတွင်းလက်နက်ကိုင် ပူးပေါင်းတပ်ဖွဲတွေနဲ့ စစ်တပ်အကြား တိုက်ပွဲတွေဖြစ်ပွားနေတာ နိုဝင်ဘာလ ၁၁ ရက်နေ့ကတည်းကဖြစ်လို့ ခုဆိုရင် တိုက်ပွဲကာလ ၁ လဝန်းကျင်အထိ ကြာမြင့်လာနေပြီဖြစ်ပါတယ်။
နှစ်ဖက်တိုက်ပွဲတွေအကြားမှာ အရပ်သားပြည်သူတွေ ထိခိုက် သေဆုံးတာ ဒဏ်ရာရတာတွေရှိသလို နေအိမ်တွေ ၊ဘာသာရေးအဆောက်အဦးတွေ၊ လွိုင်ကော်ဟိုတယ်၊ အခု သိရီမင်္ဂလာစျေး၊ တောင်ကွဲစေတီ စတဲ့ အဆောက်အဦး ထိခိုက်ပျက်စီးမှာတွေရှိနေတယ်လို့သိရပါတယ်။
တိုက်ပွဲပြင်းထန်လာမှုနဲ့အတူ လွိုင်ကော်မြို့ခံတွေထဲကနေ မြို့ကိုစွန့်ခွာပြီး စစ်ဘေးတိမ်းရှောင်သူအများအပြားရှိလာနေသလို မြို့ထဲမှာပဲကျန်ခဲ့ပြီး အကူအညီတွေ ပေးနေတဲ့ ဒေသခံတွေလည်းရှိနေတယ်လို့သိရပါတယ်။
ေဒသတွင်းလက်နက်ကိုင်တွေဖြစ်တဲ့ KA၊ KNDF၊ KNPLF၊ DMO- Local PDF၊ မြို့ပြပျောက်ကြားတပ်နဲ့ အတူ အလယ်ပိုင်းတိုင်းစစ်ဌာနချုပ်၊ ရှမ်းတောင်-ကယား(ကရင်နီ) စစ်တိုင်းဌာနမှ လွိုင်ကော်၊ မိုးဗြဲ၊ ဖယ်ခုံ၊ ဖရူဆို၊ ဒီမောဆိုနဲ့ ရှမ်းတောင် PDF တပ်ရင်းတွေ ပူးပေါင်းပြီး လွိုင်ကော်မှာ မြို့သိမ်းတိုက်ပွဲကိုဆင်နွှဲနေကြတာဖြစ်တယ်လို့ သတင်းထုတ်ပြန်ထားပါတယ်။
Photo Crd: Original Uploader
