ဒါကာ ၊ ဇူလိုင်-၂၁-၂၀၂၅
မျိုးဆက်(VOM)
ဘင်္ဂလားဒေ့ရှ်နိုင်ငံ ဒါကာမြို့မှာ လေတပ်လေ့ကျင့်ရေးလေယာဉ်တစင်း စာသင်ကျောင်းပေါ် ပျက်ကျမှုကြောင့် လူ ၁၉ ယောက်သေဆုံးပြီး ၁၆၄ ယောက်ဒဏ်ရာရခဲ့တယ်လို့ တာဝန်ရှိသူတွေက ပြောပါတယ်။
ဥတာရာပြည်နယ် Milestone School and College ကျောင်းဝင်းထဲ လေယာဉ်ပျက်ကျသွားတာဖြစ်ပြီး နှစ်ထပ်အဆောက်အဦတစ်ခုကို ဝင်တိုက်မိခဲ့ပါတယ်။
လေတပ်ရဲ့ထုတ်ပြန်ချက်အရ F-7 လေယာဉ်ဟာ မွန်းလွဲ ၁ နာရီကျော်က လေ့ကျင့်ရေးပျံသန်းနေစဉ် စက်ချို့ယွင်းမှုဖြစ်ခဲ့တယ်လို့ သိရပါတယ်။ လေယာဉ်မှူးလည်း သေဆုံးသူတွေထဲမှာ ပါဝင်နေပါတယ်။
ကလေးနဲ့လူကြီး ၅၀ ကျော် မီးလောင်ဒဏ်ရာတွေနဲ့ ဆေးရုံတင်လိုက်ရတယ်လို့ ဆရာဝန်တွေက ပြောပါတယ်။ ဒီကျောင်းမှာ ပညာသင်နေတဲ့ ကျောင်းသားတွေဟာ အသက် ၅ နှစ်ကနေ ၁၈ နှစ်အတွင်း ဖြစ်ပါတယ်။
လေယာဉ်ဟာ အဆောက်အဦကို တိုက်ရိုက်ဝင်တိုက်တာ လို့ ကျောင်းဆရာတစ်ဦးက ပြောပါတယ်။ အဲဒီနောက် ပေါက်ကွဲသံကြားပြီး မီးနဲ့မီးခိုးတွေ မြင်ရတယ် လို့ ဆိုပါတယ်။ ကယ်ဆယ်ရေးအဖွဲ့တွေက မီးလောင်ပြာပုံတွေကြားထဲက အသက်ရှင်သူတွေကို ရှာဖွေနေပါတယ်။
ဖြစ်စဉ်အကြောင်းရင်းကို စုံစမ်းစစ်ဆေးပြီး လိုအပ်တဲ့အကူအညီတွေ ပေးသွားမယ် လို့ ဘင်္ဂလားဒေ့ရှ်ယာယီအစိုးရခေါင်းဆောင် မိုဟာမက်ယူနွတ်ကပြောပါတယ်။ ဘင်္ဂလားဒေ့ရှ်အစိုးရက အင်္ဂါနေ့ကို ဝမ်းနည်းခြင်းနေ့အဖြစ် ကြေညာထားပြီး နိုင်ငံအလံတွေကို တဝက်သာလွှင့်ထူသွားမှာဖြစ်ပါတယ်။
Ref:BBC
Photo:Reuters/Getty Images
