မော်လမြိုင်- မတ် ၂၁ – ၂၀၂၄
GG (VOM)
မွန်ပြည်နယ် ၊ သထုံမြို့နယ် ၊ မော်လမြိုင်-ရန်ကုန် ရထားလမ်းပိုင်းမှာရှိတဲ့ သိမ်ဆိပ်နဲ့ ဒုံးဝန်းဘူတာကြား ရထားလမ်းမိုင်းခွဲဖျက်ဆီးခံရမှုကို ပြန်လည်ပြင်ဆင်နေတဲ့အဖွဲ့ ဒရုန်းနဲ့ထပ်မံတိုက်ခိုက်ခံရတာကြောင့် ပြင်ဆင်မှုတွေ ရပ်ထားရတယ်လို့ ဒေသခံတွေဆီကသိရပါတယ်။
” ရထားရော ၊ရထားလမ်းပါပျက်တော့ သူတို့ ပြင်ကြတာမှာ ၁၉ ရက်နေ့က ပြင်တဲ့အဖွဲ့ ဒရုန်းနဲ့ထပ်ပြီး တိုက်ခံရတယ်၊အဲ့ဒီနောက် ပြင်ဆင်တဲ့အဖွဲ့လည်း ဆက်မလုပ်တော့ဘူး။ ခုထိတော့ ပြန်ပြင်နေတာ မကြားမိဘူး။မပြင်နိုင်တော့ ခရီးစဥ်တွေလည်းခုထိ မထွက်နိုင်ဘူး ” လို့ သထုံမြို့နယ် ဒေသခံတယောက်ကပြောပါတယ်။
ရထားလမ်း မိုင်းခွဲဖျက်ဆီးခံရမှုကို ပြန်လည်ပြင်ဆင်တဲ့အဖွဲ့ ထပ်မံတိုက်ခံရပေမယ့် လူထိခိုက်တာမရှိသလို ရထားလမ်းထပ်မံထိခိုက်ပျက်စီးတာမရှိဘူးလို့သိရပါတယ်။
အဆိုပါ မိုင်းခွဲခံရတဲ့ရထားလမ်း ပြန်လည်မပြင်ဆင်နိုင်သေးတာကြောင့် တဖက်မှာလည်း ရန်ကုန် – မော်လမြိုင် အစုန် အဆန် ရထားခရီးစဥ်တွေကို မတ်လ ၁၉ ရက်မှစပြီး မတ်လ ၂၁ ရက်နေ့အထိ ပြေးဆွဲနိုင်ခြင်းမရှိသေးဘူးလို့သိရပါတယ်။
” ဘူတာကြီးကတော့ ၁၉ ရက်နေ့ကစပြီး ရထားလက်မှတ်ဝယ်ပြီးသားတွေကိုပြန်အမ်းပေးနေတာခုထိပဲ ။ ရန်ကုန်ရထားလည်း မလာရဘူး၊ဒီကလည်းရထားထွက်မရဘူးဖြစ်နေတာပေါ့။ ရထားခရီးကိုမှီခိုသွားလာနေရတဲ့ ပြည်သူ
အတွက်ေတာ့ဒုက္ခရောက်တာပေါ့။မေးကြည့်တော့ မနက်ဖန်လည်း ရထားထွက်ဖို့မသေချာဘူးတဲ့၊ ရန်ကုန်ဆေးခန်းပြဖို့သွားရမှာ ခုတော့ဒုက္ခရောက်ရတယ် ” လို့ ရထားနဲ့ခရီးသွားဖို့စောင့်နေတဲ့ မော်လမြိုင်မြို့ ဒေသခံပြည်သူတယောက်က ကပြောပါတယ်။
သိမ်ဆိပ်နဲ့ ဒုံးဝန်းဘူတာကြား ရထားလမ်းမိုင်းခွဲဖျက်ဆီးခံရတာကတော့ မတ်လ ၁၈ ရက်နေ့ မနက်ပိုင်းမှာဖြစ်ပွားခဲ့တာဖြစ်ပြီး မိုင်းခွဲခံရမှုမှာ ကျောက်တင်ရထားတွဲဆိုင်းလည်းလမ်းချော်ကာ တိမ်းမှောက်ပျက်စီးခဲ့ရသလို ကထားလမ်းလည်း ပျက်စီးခဲ့ရတာဖြစ်ပါတယ်။
မတ်လ ဒုတိယပတ်တုန်းကလည်း ရန်ကုန်-မန္တလေး ရထားလမ်းပိုင်းရှိ ကျောက်ဆည်-မင်းစု ဘူတာအကြားမှာ ရထားလမ်း မိုင်းဖောက်ခွဲခံရပြီး ရထားသံလမ်းနဲ့ ကွန်ကရစ်ဇလီဖားတုံးတွေ ပျက်စီးခဲ့ပါတယ်။
၂၀၂၁ ခုနှစ်မှ လက်ရှိကာလ သုံးနှစ်ကျော်အတွင်း ရထားလမ်းနဲ့ ရထားဘူတာနယ်မြေများတွင် မိုင်းခွဲခံရမှု အကြိမ် ၁၃၀ ေကျာ်အထိရှိနေပြီး ရထားတံတား မိုင်းခွဲဖျက်ဆီးခံရမှု ၄၉ ကြိမ်၊ ဘူတာအဆောက်အဦနဲ့ ဝန်ထမ်းနေအိမ် မီးရှို့ဖျက်ဆီးခံရမှု ၁၂ ကြိမ်ရှိခဲ့တယ်လို့ နစကမှ ထုတ်ပြန်ထားပါတယ်။
ရထားလမ်းတွေ မိုင်းခွဲခံရခြင်းကြောင်း ရထားခရီးစဥ်တွေ ကြန့်ကြာခဲ့ရသလို ရထားဆိုင်တွဲပျက်စီးခြင်း တွေလည်း ရှိခဲ့ပါတယ်။
