ZY(VOM)
ဇန်နဝါရီ ၁၆၊ ၂၀၂၅
ရှမ်းပြည်နယ်တောင်ပိုင်းဒေသအတွင်းရှိ ကာလရှည်စစ်ဘေးရှောင် ခြောက်သောင်းကျော်ဟာ လက်ရှိအချိန်မှာ ရိက္ခာမလုံလောက်မှု ပြဿနာနဲ့ ရင်ဆိုင်နေရတယ်လို့ စစ်ဘေးရှောင်အရေးကူညီနေသူတွေထံကနေ သိရပါတယ်။
၂၀၂၄ခု၊ ဇန်နဝါရီ ၂၁ရက်က ရှမ်းပြည်နယ်တောင်ပိုင်း၊ ဟိုပုံးမြို့နယ်၊ မဲနယ်တောင် စံဖူး / လုံးဟီး ဒေသမှာ ဖြစ်ပွားခဲ့တဲ့ တိုက်ပွဲမှစတင်ပြီး ပြည်သူတွေ စစ်ဘေးရှောင်နေရတာဟာ တနှစ်ပြည့်မြောက်တော့မမှာ ဖြစ်တယ်လို့ သိရပါတယ်။
“ရှမ်း/တောင်မှာက တောဘက်ရှောင်တဲ့သူ အင်မတန်များတယ်။ တောဘက်ရှောင်တဲ့သူ တွေက ရေပြဿနာရော၊ စားနပ်ရိက္ခာပြဿနာပါ ထိပ်တိုက်ရင်ဆိုင်နေရတယ်။ ပြီးခဲ့တဲ့နှစ်တွေမှာ သိုလှောင်ထားတဲ့ ရိက္ခာတွေကို ပြန်စားရတယ်။ တောဘက်က သစ်သီးဝလံတွေကို ရောင်းပြီး စားဝတ်နေရေးကို ဖြေရှင်းနေကြရတယ်။ နေတာကတော့ ဘယ်လိုနေနေ၊ ဝတ်တာက ဘယ်လိုဝတ်ဝတ် ရိက္ခာမရှိရင်တော့ ဘယ်လိုမှ အဆင်မပြေနိုင်ဘူးလေ”လို့ စစ်ဘေးရှောင်အရေးကူညီနေသူတယောက်က VOMကို ပြောပါတယ်။
၂၀၂၄ခုနှစ်အတွင်း ရှမ်းပြည်နယ်တောင်ပိုင်း ဟိုပုံး၊ ဆီဆိုင်၊ ပင်လောင်း၊ ဖယ်ခုံနှင့် မောက်မယ်မြို့နယ်တို့တွင် နစကတပ်နဲ့ ဒေသတွင်းလက်နက်ကိုင်တွေ တိုက်ပွဲဖြစ်ပွားခဲ့ပြီး တိုက်ပွဲတွေစတင်ချိန်မှစလို့ လက်ရှိအချိန်ထိ ဆီဆိုင်၊ ပင်လောင်းနဲ့ ညောင်ရွှေမြို့နယ်တို့မှ နေရပ်စွန့်ခွာ စစ်ဘေးရှောင်ပြည်သူ ခြောက်သောင်းခွဲနဲ့ အထက်ရှိနေသလို စစ်ဘေးရှောင်စုစုပေါင်းရဲ့ သုံးပုံနှစ်ပုံခန့်ဟာ အရေးပေါ်အကူအညီ လိုအပ်နေတယ်လို့ ပအိုဝ်းလူငယ် အစည်းအရုံး ( PYO ) ထုတ်ပြန်အသိပေးထားပါတယ်။
၂၀၂၄ ခုနှစ်အတွင်း စစ်ရှောင်စခန်းအချို့မှာ စားနပ်ရိက္ခာမလုံလောက်မှုကြောင့် ထမင်းတနပ်လျှော့ စားခဲ့ရတဲ့ အခြေအနေထိ ဖြစ်ခဲ့ရသလို စစ်ရှောင်ပြည်သူအချို့ဟာ ၎င်းတို့စစ်ရှောင်ရာ ဒေသတွေမှာ ကုန်စိမ်းရောင်းတာ၊ နေ့စားလိုက်တာ စတဲ့ အလုပ်တွေနဲ့ အလုပ်လုပ်ကိုင်ကာ စားဝတ်နေရေး ဖြေရှင်းကြပေမယ့် အလုပ်အကိုင်ရှားပါးမှုနဲ့ ကြုံတွေ့နေရတယ်လို့လည်း သိရပါတယ်။
ဓာတ်ပုံ-ဒေသခံ
