သြဂုတ် ၃-၂၀၂၂
GG(VOM)
နယ်စပ်ဂိတ်နဲ့ လေဆိပ်ကနေ ဝင်ရောက်လာမယ့် မြန်မာနိုင်ငံသားအပါအဝင် ပြည်ပခရီးသွားဧည့်သည်အားလုံး ကိုဗစ်ကာကွယ်ဆေးလက်မှတ်အပြင် တဖက်နိုင်ငံမှာ ကိုဗစ်ပိုးမရှိကြောင်း RDT စစ်ဆေးထားတဲ့ ဆေးစစ်လက်မှတ် ပြသနိုင်ဖို့လိုအပ်တယ်လို့ ကျန်းမာရေးဝန်ကြီးဌာနက စည်းကမ်းချက်အသစ် ထပ်မံထုတ်ပြန်လိုက်ပါတယ်။
တဖက်နိုင်ငံမှာ ၄၈ နာရီအတွင်း RDT စစ်ဆေးထားတဲ့ ကိုဗစ်မရှိကြောင်း ဆေးစစ်ချက်ပြသနိုင်သူတွေကို မြန်မာနိုင်ငံထဲဝင်ရောက်ချိန်မှာလည်း ကိုဗစ်ပိုး ရှိ၊မရှိ ထပ်မံစစ်ဆေးမှာဖြစ်ကြောင်း ၊စစ်ဆေးချိန် ရောဂါပိုးမရှိမှသာ ခရီးဆက်နိုင်မှာဖြစ်တယ်လို့ သိရပါတယ်။
မြန်မာနိုင်ငံနဲ့အိမ်နီးချင်းနိုင်ငံတွေမှာ ကိုဗစ် ၁၉ မျိုးရိုးဗီဇပြောင်း BA4 ၊ BA5 တွေ ဖြစ်ပွားမှု မြင့်တက်နေတာကြောင့် မြန်မာနိုင်ငံတွင်းကို ကူးစက်ဝင်ရောက်လာမှုမရှိအောင် ကြိုတင်ကာကွယ်ခြင်း ဖြစ်တယ်လို့ သိရပါတယ်။
“အရင်က ကာကွယ်ဆေးထိုးပြီးသူတွေဆို ဟိုဘက်ကနေ စစ်လာစရာမလိုဘူး၊ဒီဘက်ရောက်မှ စစ်တာပေါ့။ဟိုဘက်မှာ စစ်လာမယ် Negative ဖြစ်လာမယ်၊ကျနော်တို့ဆီမှာထပ်စစ်မယ် negative ဖြစ်ရင်သွားလိုရာ သွားလို့ရပြီပေါ့။ပိုးတွေ့ခဲ့ရင်တော့ ပိုးတွေ့တဲ့နည်းလမ်းနဲ့ဆောင်ရွက်ရမှာပေါ့။ဟိုဘက်မှာစစ်ပြီးမှဝင်လာတော့ ဘာပဲဖြစ်ဖြစ်စိတ်ချရတာပေါ့။ပြီးခဲ့တဲ့ အပတ်က ၄၃ ယောက်မှာ ၄၁ ယောက်က ဒီဘက်ရောက်မှပိုးတွေ့တာ။RDT ရဲ့သဘောက စစ်ဆေးတိုင်းလည်း တွေ့ချင်မှတွေ့တာ လွတ်သွားတာလည်းရှိတတ်တယ် “လို့ ကျန်းမာရေးဝန်ကြီးဌာနက ပြောရေးဆိုခွင့်ရှိသူ ဒေါက်တာသန်းနိုင်စိုးကပြောပါတယ်။
ကိုဗစ်ပိုးတွေ့သူတွေကတော့ ကျန်းမာရေးဝန်ကြီးဌာနက သတ်မှတ်ထားတဲ့ ဆေးရုံနဲ့ ဟိုတယ်၊ကွာရန်းတင်းစင်တာတွေမှာ နေထိုင်ရမှာဖြစ်တယ်လို့ သိရပါတယ်။
နိုင်ငံခြားသား ခရီးသွားတွေအနေနဲ့ မြန်မာ့အာမခံလုပ်ငန်းကနေ ကိုဗစ်-၁၉ ဆိုင်ရာ ကျန်းမာရေး အာမခံဝယ်ယူရမှာဖြစ်သလို နိုင်ငံခြားသားသံတမန်တွေ၊ ကုလသမဂ္ဂအဖွဲ့အစည်းတွေက နိုင်ငံခြားသား ဝန်ထမ်းနဲ့ မိသားစုဝင်တွေကတော့ သက်ဆိုင်ရာနိုင်ငံကနေ ဝယ်ယူထားတဲ့ ကျန်းမာရေးအာမခံတင်ပြရမှာဖြစ်တယ်လို့ သိရပါတယ်။
RDT နည်းနဲ့ ကိုဗစ်ပိုး ရှိ၊မရှိ စစ်ဆေးခြင်းအတွက်ကုန်ကျစရိတ်က တယောက်ကို ၁၅၀၀၀ကျပ်ဖြစ်ပြီး ခရီးသည်ကျခံရမှာဖြစ်ကြောင်း၊ဓာတ်ခွဲအဖြေကိုတော့ နှာခေါင်းတို့ဖတ်ရယူပြီး ၁ နာရီအတွင်း ခရီးသည်ကို အသိပေးမှာဖြစ်ပါတယ်။
နိုင်ငံခြားသားတွေအနေနဲ့လည်း RT -PCR ဓာတ်ခွဲစစ်ဆေးမှုကုန်ကျစရိတ်ကို ကျခံရမယ်လို့ သိရပါတယ်။
လက်ရှိ ပြည်တွင်းမှာ ကိုဗစ် ၁၉ မျိုးရိုးဗီဇပြောင်း BA4၊ BA5 ရောဂါပိုးတွေ့သူ ၆ ဦးရှိထားပြီး ကိုဗစ်အတည်ပြုလူနာပေါင်းက လက်ရှိအထိ ၆သိန်းကျော် ရှိတယ်လို့ ကျန်းမာရေးဝန်ကြီးဌာနကထုတ်ပြန်မှုအရ သိရပါတယ်။
#voiceofmyanmar #VOM #ကိုဗစ် #လေဆိပ် #ခရီးသည် #၄၈နာရီပိုးမရှိကြောင်းလက်မှတ်
