သြဂုတ် ၁၃၊၂၀၂၂
KK(VOM)
အမျိုသားတစ်သက်တာစာပေဆုရ ဘာသာပြန်စာရေးဆရာကြီး မောင်ပေါ်ထွန်းဟာ ဒီကနေ့ မနက်ပိုင်းက ရန်ကုန်မြို့မှာ ကွယ်လွန်သွားတယ်လို့ စာပေအသိုင်းအဝိုင်းကနေ သိရပါတယ်။
ဆရာမောင်ပေါ်ထွန်းကို ရခိုင်ပြည်နယ်၊ မာန်အောင်မြို့
နယ်၊ ရွှေမျက်ဝရွာမှာ ပန်းချီပန်းပု လက်သမားဆရာကြီး ဦးမောင်ပုနဲ့ ဒေါ်အေး တို့က ၁၉၃၅ ခုနှစ်၊ မေလ ၁၄ ရက်နေ့မှာ မွေးဖွားခဲ့ပါတယ်။
အမည်ရင်း ခင်မောင်စိုး ဖြစ်ပြီး မူလတန်းပညာကို ဇာတိရပ်ရွာ ဘုန်းတော်ကြီးကျောင်းနဲ့ အထက်တန်းကျောင်းတို့မှာ ပညာသင်ကြားခဲ့ပါတယ်။
၁၅ နှစ်အရွယ်မှာ ရန်ကုန်မြို့ရှိ အလွတ်ပညာကျောင်းကိုရောက်လာပြီး လှကော်မာရှယ်ကောလိပ်မှ မြန်မာလက်ရေးတို ပထမဆုရရှိခဲ့ပါတယ်။
၁၉၅၅ ခုနှစ်မှာ မြန်မာနိုင်ငံဘာသာပြန်စာပေအသင်း(စာပေဗိမာန်)အဖွဲ့၌ လက်နှိပ်စက် လက်ရေးတိုစာရေးအဖြစ် စတင်အမှုထမ်းခဲ့ပြီး ၁၉၆၇ -၆၈ ခုနှစ်မှာအခြေခံပညာအထက်တန်းစာမေးပွဲကို အင်္ဂလိပ်ဂုဏ်ထူးနဲ့ အောင်မြင်ခဲ့ပါတယ်။
သတင်းစာပညာ အတတ်သင်ကျောင်း အပတ်စဉ် ၁ မှာလည်းပထမဆု ရရှိခဲ့ပြီး ၁၉၇၃ ခုနှစ်မှာတော့ လုပ်သား
များကောလိပ်မှ ဝိဇ္ဇာ (သမိုင်းဘွဲ့) ရရှိခဲ့ပါတယ်။
၁၉၅၈ ခုနှစ်မှာ စာပန်းချီမဂ္ဂဇင်းထဲက ခုနစ်နှစ်အရွယ် သမီးငယ် (Seven Year Old Girls)ရုရှားပုံပြင် ဘာသာပြန်နဲ့ စာပေလောကကို စတင်ဝင်ရောက်ခဲ့ပါတယ်။
မဂ္ဂဇင်း၊ ဂျာနယ်တွေမှာ ဘာသာပြန်ဝတ္ထု၊ ဆောင်းပါးများ မကြာခဏ ရေးသားခဲ့ရာကနေ စာအုပ်လောက စာစောင်၊ ပန်မဂ္ဂဇင်း၊ ချယ်ရီ မဂ္ဂဇင်းနဲ့ စီးပွားရေးမဂ္ဂဇင်းတို့မှာ အယ်ဒီတာ၊ အယ်ဒီတာချုပ်နဲ့ အတိုင်ပင်ခံအယ်ဒီတာအဖြစ် လုပ်ကိုင်ခဲ့ပါတယ်။
“စာအုပ်ဟူသည် “စာအုပ်ကို မောင်ဆုရှင်နဲ့ တွဲဖက်ရေးသားခဲ့သလို “စာနယ်ဇင်းဟူသည်” စာအုပ်ကိုလည်း မောင်ဆုရှင်သိန်းတင် (ဟံသာဝတီ) တို့နဲ့ တွဲဖက်ရေးသားကာ ထုတ်ဝေခဲ့ပါတယ်။
ဆရာကြီးဟာ ၁၉၇၈ ခုနှစ်မှာ စာပေဗိမာန် စာအုပ်သင်းရဲ့ ကြီးကြပ်ရေးမှူးတာဝန်ကနေ အနားယူခဲ့ပါတယ်။
၁၉၉၇ ကန္တာရစမ်းရေအိုင်စာအုပ်နဲ့ ဘာသာပြန် အမျိုးသားစာပေဆုရရှိခဲ့တဲ့အပြင်၂၀၀၆ ခုနှစ်မှာ ကံကြမ္မာ အကျဥ်းသား ဘာသာပြန်စာအုပ် နဲ့ ဒုတိယအကြိမ်အမျိုးသားစာပေဆု ထပ်မံရရှိခဲ့ပါတယ်။
ဘာသာပြန်စာပေတွေကို အစဥ်တစိုက်ရေးခဲ့တဲ့ ဆရာကြီး မောင်ပေါ်ထွန်းကို ၂၀၁၄ ခုနှစ်မှာ အစိုးရက အမျိုသားတစ်သက်တာစာပေဆုကို ချီးမြှင့်ခဲ့ပါတယ်။
ဆရာကြီးရေးသားခဲ့တဲ့ ဘာသာပြန်စာအုပ်များမှာ နိုင်းမြစ်ဝှမ်းမှတော်လှန်ရေး၊ ကျွန်မချစ်တဲ့ ဆူကာနို၊ ပင်တဂွန်၊ ယက်ဖ်တူရှင်ကို၊ မောင့်ဘက်တန်နှင့် အိန္ဒိယလွတ်လပ်ရေးတိုက်ပွဲ၊ ကမ္ဘာ့ရန်၊ အကြီးအကဲ၊ ကျေရာကျေကြောင်း၊ ငွေရှာနည်း ငွေသုံးနည်း၊ စံပြအရောင်းသမား၊ ဟားဗတ်စီးပွားရေးတက္ကသိုလ်မှာ မသင်ခဲ့ရသမျှ၊ စံပြ ခေါင်းဆောင်မှု၊ ကိုယ်စွမ်းကိုယ်စဖြင့် ကြီးပွားရေး၊ မဟာဒီလှိုင်း၊ အောက်စဖို့ တက္ကသိုလ်သုံး အင်္ဂလိပ်သဒ္ဒါကျမ်း၊ ခေတ်သစ် ရောင်းဝယ်ရေး ဗျူဟာ၊ ကန္တာရ စမ်းရေအိုင် စတဲ့ ဘာသာပြန်လုံးချင်း စာအုပ်ပေါင်း ၅ဝ ခန့် ပြန်ဆိုထုတ်ဝေခဲ့ပါတယ်။
အမျိုးသားစာပေတစ်သက်ဆုရှင် ဆရာကြီးမောင်ပေါ်ထွန်းဟာ ကွယ်လွန်ချိန်မှာတော့ အသက် ၈၇ နှစ်ရှိပြီဖြစ်ပါတယ်။
#voiceofmyanmar #VOM #အမျိုးသားတစ်သက်တာစာပေဆုရဘာသာပြန်စာရေးဆရာကြီးမောင်ပေါ်ထွန်း #ကွယ်လွန်
