ဆူးငှက်
မန္တလေးအငြိမ့် လူရွှင်တော်တွေရဲ့ ပြက်လုံးတစ်ခုရှိ တယ်။
ချစ်စရာ – ဟေ့… ကိုဒီပါ။ ခင်ဗျား မင်းသမီးနဲ့ မင်္ဂလာမဆောင် ချင်ဘူးလား။
ဒီပါ – အမလေး…။ မင်္ဂလာဆောင်ချင်တာပေါ့ကွယ်။
ချစ်စရာ – မင်္ဂလာဆောင်မယ်ဆိုရင် ကလေးမလေးကို တစ်သက်လုံး ရိုးမြေကျ ပေါင်းမှာလား။
ဒီပါ – မေးရက်ပါ့ ချစ်စရာရယ်။
ပေါင်းမှာဗျား၊ ပေါင်းမှာဗျား။
ချစ်စရာ – ကိုင်း…၊ ပေါင်းမယ်ဆိုရင် ရော့…
ကောက်ညှင်း။
ဒီပါ – ဟင်း… မင်းဟာက ဘာဆိုင်လဲကွယ်။
ချစ်စရာ – ဆိုင်ပါသော်ကောကွယ်။ အဲဒါမှ မင်္ဂလာဆောင်နဲ့
ကောက်ညှင်းပေါင်းနဲ့ လိုက်တော့မပေါ့။
(အဝတ်တုတ်နဲ့ ခေါင်းကို ရိုက်)
ဒီပါ – သြော်…၊ မင်းက ဒီလိုလား…။
ချစ်စရာ – ဟုတ်တယ်ဗျား…။ ကလေးမလေးနဲ့ မင်္ဂလာဆောင်
တော့ တစ်မြို့လုံး ဟိုးလေးတကျော်ဖြစ်မသွားချင်ဘူး
လား။
ဒီပါ – ဟော်လေးတကျိုး၊ ဟိုးလေးတကျော်ဖြစ်ချင်တာ
ပေါ့ကွယ်။
ချစ်စရာ – ကိုင်း… အဲလို ကြော်ချင်ရင် ရော့… မတ်ပဲ။
ဒီပါ – ဟင်း… မင်းဟာက ဘာဆိုင်လဲ…။
ချစ်စရာ – ဆိုင်ပါသော်ကော…။ အဲဒါမှ မင်္ဂလာဆောင်နဲ့
ကောက်ညှင်းပေါင်းနဲ့ အကြော်နဲ့ လိုက်တော့မပေါ့။
(အဝတ်တုတ်နဲ့ ဒီပါ့ခေါင်းရိုက်)
အဲဒီလိုနဲ့ မင်္ဂလာဆောင်နဲ့၊ ကောက်ညှင်းပေါင်းနဲ့ အကြော်နဲ့၊ ရေနွေးကြမ်းနဲ့ သတင်းစာနဲ့… စသည်ဖြင့် ပြက်လုံး ထုတ်ပြကြတယ်။
မြန်မာ့အစားအစာမှာ ကောက်ညှင်းပေါင်းနဲ့ အကြော် ဟာ အခုထိ မရိုးဘူး။ ခေတ်တိုင်းမှာ မြန်မာ့ပါးစပ်က နှစ်သက်တဲ့အစားအသောက်ပါ။ လယ်ယာစိုက်ပျိုးတဲ့ နိုင်ငံအဖို့ ဆန်စပါးနဲ့ အတူ ကောက်ညှင်းကိုလည်း စိုက်ကြတယ်။ ကောက်ညှင်းက သူ့ကိုပေါင်းပြီး ‘ကောက်ညှင်းပေါင်း’အဖြစ်စားကြသလို ကြိတ် ပြီးလည်း မုန့်အမျိုးမျိုးပြုလုပ်ကြတယ်။ ကောက်ညှင်းမုန့်ကို ဗမာလူမျိုးက ရိုးရာနတ်တင်တဲ့နေရာမှာလည်း မုန့်ဖြူ မုန့်နီ၊ မုန့်ဆီကြော် စသည်အဖြစ် တွင်တွင် ကျယ်ကျယ် သုံးတယ်။ တိုင်းရင်းသားတွေကတော့ ကောက်ညှင်းကို နေ့စဉ်အစားအသောက်အဖြစ် အမျိုးမျိုး ပြုလုပ်စားသောက်ကြတယ်။ တိုင်းရင်းသားတို့အစား အသောက်များမှာတော့ ကောက်ညှင်းက မပါမဖြစ်ပါပဲ။
မြန်မာတွေစားတဲ့ ကောက်ညှင်းပေါင်းကတော့ အကြော်နဲ့ တွဲဖက် စားသုံးကြတယ်။ အများဆုံး တွဲဖက် စားတဲ့အကြော်ကတော့ မတ်ပဲကို ကြိတ်ကြော်တဲ့ ‘ဘယာကြော်’နဲ့ပါပဲ။ ဘယာ ကြော်အပြင် ကုလားပဲကို ငရုပ်သီးစိမ်း နံနံပင်တို့ပါ ရောကြော်တဲ့‘ကုလားဘယာကြော်’၊ ဘူးသီးကြော်တွေနဲ့လည်း စားကြတယ်။ ကောက်ညှင်းပေါင်းထဲမှာ စားတော်ပဲလည်း ပါတယ်။ အကြော်နဲ့စားရာမှာ ကောက်ညှင်းပေါင်းအပြင် ငချိပ်ပေါင်းနဲ့လည်း စားကြ တယ်။ ကောက်ညှင်းပေါင်းနဲ့အကြော်က မနက်ခင်း အစားအစာတင်မဟုတ်ဘူး။ နေ့လယ်နေ့ခင်းမှာလည်း အဆာပြေ စားကြ တယ်။
အတိတ်၊ နိမိတ်ကောက်တဲ့ မြန်မာတွေက ကောက် ညှင်းပေါင်းက ‘ကောင်းခြင်းပေါင်း’သတဲ့။ ဘယာကြော်က ဘေးဘယာတွေကို ကျော်လွှားနိုင်တယ်။ အသက်ရာကျော် ရှည်တယ်တဲ့။ ဒီအယူအဆနဲ့ ကောက်ညှင်းပေါင်းနဲ့ ဘယာကြော်ကိုအလှူဒါနပြုကြတာပါ။ အခုတော့ ဘယာကြော်ကို အကွင်းကြော်လို့ပဲ ခေါ်နေ သိနေကြတော့ ကောင်းခြင်းတွေက ကွင်းကုန်ကျော်ကုန်နေကြပုံရရဲ့။ အကွင်းကြော်ပျောက် ဘယာကြော် အမည် တည်စေသောဝ်။ မြန်မာပြည်ကြီး ကောင်းခြင်းတွေဆီဘေးဘယာကင်းစွာ အလျင်အမြန်ရောက်ရှိဖို့ ကောက်ညင်းပေါင်းနဲ့ ဘယာကြော် စားကြစို့။
ဆူးငှက်
#voiceofmyanmar #VOM #ဆူးငှက် #ကောက်ညှင်းပေါင်းဘယာကြော်
