နိုင်ဂျီးရီးယားမှာ လောင်စာကားနဲ့ ကုန်တင်ကားတိုက်မိပြီး ပေါက်ကွဲမီးလောင်လို့ ၄၈ ယောက်သေဆုံး

အဘူဂျာ ၊ စက်တင်ဘာ-၉-၂၀၂၄
မျိုးဆက်(VOM)

နိုင်ဂျီးရီးယားနိုင်ငံ အလယ်ပိုင်းမှာ လောင်စာတင်ကားတစီးနဲ့ ခရီးသည်၊ ကျွဲနွားတွေကို တင်ဆောင်လာတဲ့ ကုန်တင်ကားတစီးတို့ တိုက်မိပြီး မီးလောင်ပေါက်ကွဲမှုကြောင့် လူ ၄၈ ယောက်သေဆုံးသွားပါတယ်။

ဒီမတော်တဆမှုအတွင်း ယာဉ်နှစ်စီးစလုံး ပေါက်ကွဲသွားခဲ့ပြီး အခြားမော်တော်ယာဉ်အများအပြားလည်း ပျက်စီးခဲ့တယ်လို့ တာဝန်ရှိသူတွေက ဆိုပါတယ်။ အခင်းဖြစ်ပွားရာနေရာမှာ ကျွဲနွားတွေလည်း အများအပြား မီးလောင်သေဆုံးခဲ့ပါတယ်။

လက်ရှိမှာတော့ အခင်းဖြစ်ရာနေရာကို ကယ်ဆယ်ရေးသမားတွေက ရှင်းလင်းဖို့ ကြိုးစားနေဆဲဖြစ်ပြီး ယာဉ်အတွင်းမှာ တိရိစာ္ဆန်အသေတွေရှိနေတယ်လို့ ဆိုပါတယ်။ ယာဉ်တိုက်မှုကြောင့် သေဆုံးခဲ့သူတွေအတွက် မိသားစုနဲ့ ထပ်တူ ဝမ်းနည်းကြောင်း နိုင်ဂျာပြည်နယ် အုပ်ချုပ်ရေးမှူးက ပြောပါတယ်။

နိုင်ဂျီးရီးယားနိုင်ငံမှာ လမ်းဆိုင်ရာ အခြေခံအဆောက်အအုံတွေ ညံ့ဖျင်းမှု၊ ဝန်ပိုတင်ဆောင်မှုနဲ့ လမ်းစည်းကမ်း ဖောက်ဖျက်မှုတွေကြောင့် လောင်စာကာတွေ တိမ်းမှောက်မှုအပါအ၀င် လူအများအပြား သေဆုံးစေတဲ့ယာဉ်တိုက်မှုတွေ မကြာခဏဆိုသလို ဖြစ်ပွားလေ့ရှိပါတယ်။

နိုင်ငံတွင်းမှာ လောင်စာဆီစျေးကို နို်ငငံပိုင်ရေနံကုမ္ပဏီက ပြီးခဲ့တဲ့သီတင်းပတ်ကစပြီး ၃၉ ရာခိုင်နှုန်း တိုးမြှင့်လိုက်ပြီး ဒါဟာ တနှစ်ကာလအတွင်း နှစ်ဆမြင့်တက်ခဲ့ပေမယ့် ရှားပါးပြတ်လပ်မှုတွေနဲ့ ရင်ဆိုင်နေရဆဲဖြစ်ပါတယ်။

Ref:BBC
Photo:Reuters